استانا قالاسىنىڭ نۇرا اۋدانىندا كولىك قۇرالدارىن تەحنيكالىق قىزمەت كورسەتۋ، جوندەۋ جانە پايدالانۋ سالاسىنداعى كاسىپورىن وكىلدەرى مەن استانا قالاسى اكىمدىگىنىڭ كاسىپتىك-تەحنيكالىق كوللەدجى باسشىلىعىنىڭ كەزدەسۋى ءوتتى. شارادا وقۋ ورنى تۇلەكتەرىن جۇمىسپەن قامتۋ، دۋالدى وقىتۋدى دامىتۋ جانە سەرىكتەستىكتى كەڭەيتۋ ماسەلەلەرى ءسوز بولدى.
كوللەدج ديرەكتورى ريمما يمانعازينوۆانىڭ ايتۋىنشا، بۇل وقۋ ورنى ەلوردادا كولىك جوندەۋ جانە قىزمەت كورسەتۋ ماماندارىن دايارلايتىن جەتەكشى ءبىلىم بەرۋ مەكەمەسى سانالادى.
«نۇرا اۋدانىندا اۆتوكولىك جوندەۋمەن اينالىساتىن 40-قا جۋىق ءىرى كاسىپورىن جۇمىس ىستەيدى. سوندىقتان ءبىز ولارعا وقۋ بازامىزدى، ستۋدەنتتەرىمىزدىڭ دايارلىعىن كورسەتۋدى ماڭىزدى دەپ ەسەپتەدىك»، – دەدى كوللەدج باسشىسى.
كوللەدج دۋالدى وقىتۋ جۇيەسىمەن جۇمىس ىستەيدى: 60% – وندىرىستىك تاجىريبە، 40% – تەوريالىق ءبىلىم. قازىرگى تاڭدا شامامەن 40 كاسىپورىنمەن كەلىسىمشارت جاسالعان. جىل سايىن كوللەدج 100-150 مامان دايىندايدى، ولاردىڭ قاتارىندا دانەكەرلەۋشىلەر، ەلەكتريكتەر، قۇرىلىسشىلار، اسپازدار، تىگىنشىلەر جانە كونديتەرلەر بار. بارلىعى – 11 ماماندىق جانە 16 بىلىكتىلىك بويىنشا.
وقۋ مەرزىمى – ءۇش جىل. ءبىرىنشى جىلى – جالپى ءبىلىم بەرۋ، ال ەكىنشى كۋرستان باستاپ كاسىبي دايىندىق پەن وندىرىستىك تاجىريبە باستالادى. ستۋدەنتتەر 1400 ساعاتتان استام تاجىريبە جيناقتاپ، كاسىپورىندا جۇمىس ىستەۋ مۇمكىندىگىنە يە بولادى.
نۇرا اۋدانى اكىمىنىڭ ورىنباسارى ءاليا ابسەمەتوۆا كەزدەسۋدىڭ ماڭىزىن اتاپ ءوتىپ:
«پرەزيدەنت 2025 جىلدى جۇمىسشى ماماندىقتار جىلى دەپ جاريالادى. بۇل – دەر كەزىندە جاسالعان شەشىم. كوللەدج ستۋدەنتتەرى ەرتەڭگى كۇنى قالا ءۇشىن ناقتى پايدا اكەلەتىن ماماندارعا اينالادى. سوندىقتان ءبىز سەرىكتەس كومپانيالار سانىن ارتتىرىپ، ناقتى تاجىريبەلىك مۇمكىندىك بەرۋدى كوزدەپ وتىرمىز»، – دەدى ول.
كەزدەسۋ قورىتىندىسى بويىنشا كوللەدج بەن جۇمىس بەرۋشىلەر پراكتيكاعا نەگىزدەلگەن وقىتۋدى، كادرلارعا ماقساتتى سۇرانىس بەرۋدى جانە ماماندار دايارلاۋداعى ىنتىماقتاستىقتى كۇشەيتۋگە ۋاعدالاستى.