جەتىسۋدا سوت ورىنداۋشىسى اليمەنت تولەۋگە ارنالعان قارجىنى جىمقىرعان

جەتىسۋدا سوت ورىنداۋشىسى اليمەنت تولەۋگە ارنالعان قارجىنى جىمقىرعان، - دەپ حابارلايدى اqshamnews.kz ءتىلشىسى.
 
تالدىقورعاندا جەكە سوت ورىنداۋشىسى زاڭسىز جولمەن بايۋ سحەماسىن قولدانىپ، بالالاردى اليمەنتسىز قالدىرعان.

ءبىرىنشى كەزەڭدە ول اليمەنت تولەمدەرىن ءوندىرىپ الۋ تۋرالى اتقارۋشىلىق قۇجاتتار بويىنشا زاڭدى تۇردە بورىشكەرلەردىڭ جالاقىسىنان سومالاردى ۇستاپ قالۋ تۋرالى قاۋلى شىعارىپ، جۇمىس بەرۋشىلەرگە جىبەرگەن.

ودان ءارى بورىشكەرلەردىڭ جۇمىس بەرۋشىلەرىنەن اقشا تۇسكەننەن كەيىن اقشانىڭ كوپ بولىگىن وزىنە قالدىرىپ، قالعانىن اليمەنت ءوندىرىپ الۋشىلارعا اۋدارعان.

مىسالى، ءبىر جاعدايدا سوت ورىنداۋشىسى بورىشكەردىڭ جالاقىسىنان ءوندىرىپ الۋدى 2025 جىلعى ساۋىردەن باستاعان.

جۇمىس بەرۋشى ساۋىردەن ماۋسىمعا دەيىن جەكە سوت ورىنداۋشىسىنىڭ شوتىنا 570 مىڭ تەڭگەدەن اسا سوماعا اليمەنت تولەمدەرىن اۋدارعان.

سوت ورىنداۋشىسى الىنعان سومانىڭ 170 مىڭ تەڭگەسىن عانا ءوندىرىپ الۋشىعا اۋدارىپ، قالعانىن جىمقىرعان.

تەكسەرۋ كەزىندە بەلگىلى بولعانداي، ول وسىعان ۇقساس سحەمانى بىرنەشە رەت قولدانىپ، ونىڭ كومەگىمەن 2 ملن تەڭگەدەن اسا سومانى قالتاسىنا سالعان.

تالدىقورعان قالاسىنىڭ پروكۋراتۋراسى وكىلەتتىگىن اسىرا پايدالانۋ دەرەكتەرى بويىنشا جەكە سوت ورىنداۋشىسىنا قاتىستى قىلمىستىق كودەكستىڭ 251-بابىمەن سوتالدى تەرگەپ-تەكسەرۋدى باستادى.