523 شارۋاشىلىق 1 ملرد تەڭگەدەن استام سۋبسيديا العان
جەتىسۋ وبلىسىندا اسىل تۇقىمدى مال سانى ۇلعايىپ كەلەدى. جالپى، وڭىردە مال شارۋاشىلىعى باعىتىندا 2561 شارۋاشىلىق تىركەلگەن، ولارداعى ءىرى قارا سانى جارتى ميلليونعا جەتەدى، سونىڭ ىشىندە اسىل تۇقىمدى مالدىڭ ۇلەسى 20،2% نەمەسە 108،2 باسقا كوبەيگەن، دەپ حابارلايدى Almaty-akshamy.kz.
وتكەن جىلمەن سالىستىرعاندا ءوسىم 12%-دى قۇرادى. وسى باعىت بويىنشا 523 شارۋاشىلىق 1 ملرد تەڭگەدەن استام سۋبسيديا العان، قوسىمشا وتىنىمدەر ءالى دە بار.
ماسەلەن، كەربۇلاق اۋدانىندا ءىرى قارا سانى 65 مىڭنان استام، ۇساق مال 324 مىڭ، قۇس 71 مىڭداي، جىلقى 23 مىڭ باستان اسادى. اۋداندا 2400-دەي شارۋاشىلىق اۋىل شارۋاشىلىعىمەن اينالىسادى. سونىڭ ىشىندە اسىل تۇقىمدى مال وسىرۋگە ەرەكشە كوڭىل بولىنەدى. 22 شارۋا قوجالىعى 2400 باس اسىل تۇقىمدى ءىرى قارا، 2500 باس اسىل تۇقىمدى ۇساق مال ءوسىرىپ وتىر. سول قاتاردا تابيعي تۇرلەندىرۋمەن اينالىسىپ جۇرگەن شارۋا قوجالىقتارىنىڭ ءبىرى - «وماروۆ» شق.
قوجالىق 1993 جىلى قۇرىلعان. ءقازىر وندا جالپى اۋماعى 1814 گا استام جەر بار، سونىڭ 921 گا - ەگىستىك، جايىلىمدىق جانە شابىندىق جەرى – 893 گا. بيىل 771 گا جەرگە كۇزدىك بيداي، 729 گا ارپا سەبىلگەن. جالپى شىعىمدىلىعى ءار گەكتارىنا 21 سەنتنەردەن اينالدى. شارۋاشىلىقتا 140 باس قوي، 300 باس ءىرى قارا، 100 جىلقى بار. وعان قوسا تاۋىق، كۇركەتاۋىق، ۇيرەك اسىرايدى. قىسقى مال ازىعى رەتىندە 500 توننا ءشوپ، 200 توننا سابان دايىندالعان. مۇندا سيىردىڭ «اۋليەكول» تۇقىمىن ءوسىرۋ قولعا الىنعان.
شارۋا قوجالىعىنىڭ باسشىسى جانات وماروۆتىڭ ايتۋىنشا، ءار ەكى جىل سايىن ءتول جاڭارتۋ جۇمىستارى جۇرگىزىلەدى.
- اسىل تۇقىمدى مال وسىرۋمەن اينالىسقانىما 10 جىلداي بولدى. باستاپقىدا 30 باس قۇناجىن مەن اۋليەكول تۇقىمدى بۇقا ساتىپ الدىق. ءقازىر اسىل تۇقىمدى مال باسى 150-گە جەتتى. شاعىن بورداقى الاڭىمىز بار، وندا ساتۋعا قويىلاتىن 60-70 باستى ۇستايمىز، 20-30-ىن قىسقا قالدىرامىز. تۇقىمنىڭ تازالىعىن ساقتاۋ ءۇشىن ءار ەكى جىل سايىن مال باسىن جاڭالاپ ساتىپ الىپ وتىرامىز. سونىڭ ارقاسىندا بورداقىلانعان ءبىر بۇقادان 350 كگ دەيىن تازا ەت الامىز، - دەيدى ول.
جالپى، وتكەن 9 ايدا كەربۇلاق اۋدانىندا 6990،7 توننا ەت، 37 مىڭ تونناداي ءسۇت، 6 مىڭ داناداي جۇمىرتقا وندىرىلگەن، 213 مىڭداي توننا ءشوپ جينالعان.
فەرمەردىڭ ايتۋىنشا، اۋىل شارۋاشىلىعىنىڭ ەڭ باستى پروبلەمالارىنىڭ ءبىرى – كادر ماسەلەسى.
- ءقازىر اگروونەركاسىپ كەشەنىندە نەگىزىنەن اعا ۇرپاق ەڭبەك ەتەدى، اۋىل شارۋاشىلىعىنا جاستاردىڭ دا قىزىعۋشىلىعىن ارتتىرۋمىز كەرەك. اگرونوم، مەحانيزاتور، كومباينەر، تراكتوريست، ۆەتەرينار ماماندىقتارىن مەڭگەرسە دەيمىن. بىزدە وسى ماماندىقتاردىڭ ءبارى سۇرانىستا. بۇلار - تۇراقتى تابىسى بار ماماندىقتار، ءتيىستى الەۋمەتتىك جەڭىلدىكتەرى دە بار. اۋىل شارۋاشىلىعىندا مەملەكەتتىڭ قولداۋىنسىز وڭاي ەمەس. اسىرەسە، مينەرالدى تىڭايتقىشتار، تۇقىم، جانار-جاعارماي، گەربيسيد، تەحنيكا بولشەكتەرى - ءبارىنىڭ باعاسى ءوسىپ جاتقان قازىرگى ۋاقىتتا مۇنداي قولداۋدىڭ كومەگى بىزگە ەداۋىر، - دەيدى ج. وماروۆ.
اتاپ وتسەك، بيىلعى جىلى كوكتەمگى دالا جۇمىستارىنا اۋدانعا جەڭىلدىك باعامەن 1600 توننا قاجەتتى جانار-جاعارماي بولىنگەن بولاتىن. جىل باسىنان بەرى ماشينا-تراكتور پاركتەرىن جاڭارتۋ ءۇشىن 954 ملن. تەڭگەگە 40 بىرلىك ارنايى تەحنيكا ساتىپ الىنعان، سونىڭ 20-سى - تراكتور، 6-ۋى - كومباين. جالپى اۋداندا 4 سەرۆيستىك دايىنداۋ ورتالىعى جۇمىس ىستەيدى، وندا قۇنى 1،6 ملرد. تەڭگە بولاتىن 43 بىرلىك اۋىل شارۋاشىلىعى تەحنيكاسى بار. وتكەن توعىز ايدا اۋىل شارۋاشىلىعىندا كەربۇلاق اۋدانىندا 47،6 ملرد. تەڭگەنىڭ ءونىمى وندىرىلگەن، ناقتى كولەم يندەكسى - 101،4%.