جىل باسىنان بەرى سەگىز مىڭعا جۋىق شەتەلدىك مىندەتتى داكتيلوسكوپيالىق تىركەۋدەن ءوتتى. سونىمەن قاتار قۇجاتتاردى ازىرلەۋ كەزىندە داكتيلوسكوپيالىق تىركەۋدەن جەتى مىڭنان استام قازاقستاندىق ەرىكتى تۇردە ءوتتى، – دەپ حابارلايدى Polisia.kz
ساۋساق ءىزىن تىركەۋ – بۇل ساۋساقتاردىڭ پاپيلليارلىق ۇلگىلەرىنىڭ قۇرىلىمدىق ەرەكشەلىكتەرى تۋرالى اقپارات الۋ. مۇنداي تىركەۋ حالىققا قىزمەت كورسەتۋ ورتالىقتارىندا جۇرگىزىلەدى.
داكتيلوسكوپيالىق تىركەۋدەن 16 جاسقا تولعان، قازاقستان رەسپۋبليكاسى ازاماتىنىڭ جەكە كۋالىگىن جانە (نەمەسە) پاسپورتىن الۋ ءۇشىن العاش رەت جۇگىنگەن، سونداي-اق قۇجاتتارىن اۋىستىرۋ ءۇشىن جۇگىنگەن قازاقستان رەسپۋبليكاسىنىڭ ازاماتتارى ءوز ەركىمەن وتە الادى.
ال مىندەتتى داكتيلوسكوپيالىق تىركەۋگە 16 جاسقا تولعان شەتەلدىكتەر مەن ازاماتتىعى جوق ادامدار جاتادى. قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 443-1-بابىنا سايكەس شەتەلدىكتەردىڭ نەمەسە ازاماتتىعى جوق ادامداردىڭ مىندەتتى داكتيلوسكوپيالىق تىركەۋدەن باس تارتۋى قازاقستان رەسپۋبليكاسى اۋماعىنان شىعارۋ تۇرىندەگى جازانى كوزدەيدى.
بۇل ءراسىم ادامنىڭ مۇددەلەرىن قورعاۋ جانە ونىڭ زاڭدى قۇقىقتارىن قامتاماسىز ەتۋ ءۇشىن جۇرگىزىلەدى. ەگەر ادام قۇجاتتارىن جوعالتىپ السا، ساۋساق ءىزىن تىركەۋ ولاردى قىسقا مەرزىمدە قالپىنا كەلتىرۋگە كومەكتەسەدى.
سونىمەن قاتار ونىڭ كومەگىمەن جەكە تۇلعانى تەز ارادا انىقتاۋ مۇمكىندىگى بار. مىسالى، ونىڭ تيىمدىلىگىن ەستە ساقتاۋ قابىلەتى ناشار نەمەسە ەسىنەن تانىپ قالعان ازاماتتى تانۋ كەزىندە بايقاۋعا بولادى. قازاقستان ازاماتتارىنىڭ داكتيلوسكوپيالىق دەرەكتەرى مەملەكەت تاراپىنان قورعالادى