28 گۆاردياشى-پانفيلوۆشىلار اتىنداعى قالالىق ساياباقتا اۋعان سوعىسىنىڭ ارداگەرى پولكوۆنيك بوريس كەرىمبايەۆتى ەسكە الۋعا ارنالعان ءىس-شارا ءوتتى.
12 قاڭتاردا اتى اڭىزعا اينالعان قارا مايور بوريس كەرىمبايەۆ 76 جاسقا تولار ەدى. ينتەرناسيوناليست-جاۋىنگەردى ەسكە الۋعا ارنالعان جيىنعا راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ مەرزىمدى قىزمەت ساربازدارى، پولكوۆنيك بوريس كەرىمبايەۆ جانە «كيروۆ» اتىنداعى اسكەري-پاتريوتتىق كلۋبتاردىڭ تاربيەلەنۋشىلەرى جينالدى.
– ءبىز اتى اڭىزعا اينالعان قارا مايوردىڭ ارامىزدان كەتكەنىنە قايعىرا وتىرىپ، ول كىسىنىڭ جانقيارلىق ەرلىگىگىنەن قۋات الامىز. بوريس توكەن ۇلىنىڭ ونەگەسى ەڭ قيىن جاعدايلار مەن بىتىسپەس قاقتىعىستاردا دا ديالوگقا ورىن بار ەكەنىن كورسەتەدى، – دەدى اسكەري ينستيتۋتتىڭ بەسىنشى كۋرس كۋرسانتى مەيىرجان دوساحمەتوۆ.
بوريس توكەن ۇلى كەرىمبايەۆ اسكەري قىزمەتكە ءومىرىنىڭ 35 جىلدان استام ۋاقىتىن بەردى. ونىڭ ەڭ قيىن، ءارى جاۋاپتى كەزەڭى اۋعانستاندا ءوتتى. ول الماتى وبلىسىنىڭ قاپشاعاي قالاسىنداعى 22ء-شى ارنايى ماقساتتاعى قۇراما بازاسىندا ۇيىمداستىرىلعان 177ء-شى ارنايى ماقساتتاعى جاساقتى باسقاردى. بۇل قۇرىلىم نەگىزىنەن قىرعىزداردان، قازاقتاردان، وزبەكتەردەن جانە تاجىكتەردەن قۇرالعان سوڭ «مۇسىلمان باتالونى» دەپ اتالاتىن.
اۋعانستاننىڭ پاندجشەر شاتقالىندا مودجاحەدتەر مەن كەڭەس اسكەرى ارنايى كۇشتەرى اراسىنداعى قيان-كەسكى ۇرىستار بولدى. دارىندى كوماندير بوريس كەرىمبايەۆ از عانا كۇشپەن توسقاۋىل قويىپ، بيىكتىكتەرگە شابۋىلدار جاسادى، جاۋدى شاتاستىرۋ ءۇشىن جالعان مانيەۆرلەر ۇيىمداستىردى. سوندىقتان ونىڭ بولىمشەسى ەڭ ءقاۋىپتى دەگەن جەرلەردەن ءارقاشان از شىعىنمەن شىعاتىن.
كارا مايور كەرەمەت كەلىسسوز جۇرگىزۋشى دە بولا ءبىلدى. ول مودجاحەدتەردىڭ ەڭ ىقپالدى دەگەن دالا كومانديرىن بىتىمگە كەلۋگە ءماجبۇر ەتتى. سول سەبەپتى بوريس توكەن ۇلىنىڭ «پاندجشەر پاتشاسى» دەپ اتالۋى كەزدەيسوقتىق ەمەس.
قارۋلى كۇشتەردىڭ اسكەري قىزمەتشىلەرى، اسكەري جوعارى وقۋ ورىندارىنىڭ كۋرسانتتارى، ۇلاندار مەن جاساربازدىقتار داڭقتى باتىردى ەشقاشان ۇمىتپاق ەمەس. مەملەكەتتىك اسكەري-تاريحي مۋزەيدە باتىرعا ارنالعان ەكسپوزيسيالار ورنالاسقان. تۋعان جەرى الماتى وبلىسىنىڭ رايىمبەك كەنتىندە مەموريالدىق ەسكەرتكىش، تۇرعان ءۇيىنىڭ قابىرعاسىنا مەموريالدىق تاقتا ورناتىلعان.