قازاقستان رەسپۋبليكاسى دەنساۋلىق ساقتاۋ مينيسترلىگى استانا قالاسىنىڭ اكىمدىگىمەن جانە Yandex Qazaqstan كومپانياسىمەن بىرلەسىپ، ەلوردا تۇرعىندارىنىڭ شاقىرىلعان جەدەل جاردەم بريگاداسىنىڭ قوزعالىسىن ناقتى ۋاقىت رەجيمىندە قاداعالاۋعا مۇمكىندىك بەرەتىن جاڭا سيفرلىق سەرۆيستى ەنگىزۋ بويىنشا پيلوتتىق جوبانىڭ ىسكە قوسىلعانىن حابارلايدى.
جەدەلدىكتىڭ ءبىرىنشى ساناتى بويىنشا شاقىرتۋ تۇسكەن جاعدايدا، جۇيە ءوتىنىش بەرۋشىگە اۆتوماتتى تۇردە ينتەراكتيۆتى كارتاعا سىلتەمەسى بار SMS-حابارلاما جىبەرەدى. كارتانى براۋزەر ارقىلى اشقان پايدالانۋشى جەدەل جاردەم كولىگىنىڭ باعىتىن ناقتى ۋاقىتتا باقىلاي الادى.
بۇل شەشىم شۇعىل قىزمەتتەردىڭ جۇمىسىن اشىق ەتۋگە، ازاماتتاردىڭ الاڭداۋشىلىعىن ازايتۋعا، سونداي-اق ديسپەچەرلەرگە تۇسەتىن جۇكتەمەنى تومەندەتۋگە باعىتتالعان.
استانا قالاسى جەدەل جاردەم قىزمەتىنىڭ مالىمەتىنشە، وپەراتورلار كۇن سايىن 6000-عا دەيىن كىرىس قوڭىراۋ قابىلدايدى، ولاردىڭ 40%-عا جۋىعى — جەدەل جاردەمنىڭ كەلۋ ۋاقىتىن ناقتىلاۋعا بايلانىستى قايتالاما قوڭىراۋلار.
اۆتوماتتاندىرىلعان حابارلاندىرۋ جۇيەسىن ەنگىزۋ وسىنداي قوڭىراۋلاردىڭ سانىن ايتارلىقتاي ازايتىپ، رەسۋرستاردى جاڭا شۇعىل شاقىرتۋلاردى وڭدەۋگە جۇمىلدىرۋعا مۇمكىندىك بەرەدى.
جوبا العاشقى كەزەڭدە استانا قالاسىندا جەدەلدىكتىڭ ءبىرىنشى ساناتى بويىنشا كەيبىر شاقىرتۋلارعا قولجەتىمدى بولادى. الداعى ۋاقىتتا بۇل جوبانى قازاقستان اۋماعىنداعى بارلىق شۇعىل شاقىرتۋلارعا كەڭەيتۋ جوسپارلانۋدا.
«جەدەل جاردەم بريگاداسىنىڭ قوزعالىسىن كورۋ مۇمكىندىگى — تەحنولوگيالار ارقىلى اشىقتىقتى قامتاماسىز ەتۋ، شاقىرعان ادامداردىڭ الاڭداۋشىلىعىن ازايتۋ جانە ديسپەچەرلەرگە تۇسەتىن جۇكتەمەنى ازايتۋدىڭ ءبىر مىسالى. سونىمەن قاتار، سيفرلىق حابارلاما بەرۋ بريگادانىڭ كەلۋىنە دايىندالۋعا كومەكتەسەدى، مىسالى، اۋلاداعى شلاگباۋمدى اشۋ نەمەسە پاسيەنتتىڭ قۇجاتتارىن دايىنداۋ سەكىلدى»، — دەدى ق ر دەنساۋلىق ساقتاۋ ۆيسە-مينيسترى ەربول وسپانوۆ.
دەنساۋلىق ساقتاۋ مينيسترلىگى ەلدىڭ بارلىق ازاماتتارى ءۇشىن مەديسينالىق كومەكتىڭ ساپاسىن، قولجەتىمدىلىگىن جانە جەدەلدىگىن ارتتىرۋ ماقساتىندا دەنساۋلىق ساقتاۋ جۇيەسىنە سيفرلىق شەشىمدەردى ەنگىزۋدى جالعاستىرادى.
فۋنكسيا API ياندەكس كارتانىڭ JavaScript API شەشىمى ارقىلى جۇزەگە اسىرىلعان.