كەشە ازيا ويىندارىندا قازاقستان كومانداسى ءبىر كۇمىس جانە ءۇش قولا مەدال جەڭىپ الدى، دەپ حابارلايدى almaty-akshamy.kz.
ساپىندا رۋسلان قۇربانوۆ، ەلمير ءالىمجانوۆ، ەرلىك سەرتاي، ۆاديم شارلايموۆ بار سەمسەرلەسۋدەن قازاقستاننىڭ ەرلەر قۇراماسى ازيا ويىندارىنىڭ كۇمىس مەدالىن جەڭىپ الدى. فينالدا ءبىزدىڭ سپورتشىلار جاپونيانىڭ كومانداسىنا (35:36) ەسە جىبەرىپ الدى.
ۆەلوترەكتەن قازاقستان ەرلەر قۇراماسى (راميس دىنمۇحامەدوۆ پەن ارتەم زاحاروۆ) مەديسون باعدارلاماسىنىڭ فينالىندا 37 ۇپاي جيناپ، قورجىنعا قولا مەدال سالدى.
1: 52: 25 ۋاقىت ارالىعىندا ءۇش كەزەڭنەن وتكەن ايان بەيسەنبايەۆ ترياتلوننان قولاعا قول جەتكىزدى.
جەڭىل اتلەتيكادان ەلىمىزدىڭ قورجىنىنا العاشقى جۇلدەنى كارولين چەپكوەچ كيپكيرۋي سالدى. 10 شاقىرىمدىق جارىستا ول مارە سىزىعىن ءۇشىنشى كەسىپ ءوتتى.
شاحماتتان ايەلدەر قۇراماسى ءبىرىنشى تۋردا ءباا كومانداسىن 4:0 ەسەبىمەن جەڭدى، ەرلەر قۇراماسى تايلاندتان 3،5:0،5 ەسەبىمەن وزىق شىقتى.
سۋ دوبىنان قازاقستان ايەلدەر قۇراماسى ازيا ويىندارىندا 4ء-شى ماچتا تايلاند كومانداسىن 13:8 ەسەبىمەن جەڭدى.
حوككەيدەن قازاقستاننىڭ ايەلدەر كومانداسى يندونەزيادان كەلگەن قارسىلاستارىن 2:1 ەسەبىمەن جەڭدى.
92 كەلىگە دەيىنگى سالماقتا ونەر كورسەتكەن بوكسشى ساعىندىق توعايباي يراننان كەلگەن قارسىلاسىن مەرزىمىنەن بۇرىن جەڭىپ، ازيا ويىندارىنىڭ جارتىلاي فينالىنا شىقتى. ال كارينا يبراگيموۆا (57 كگ) سولتۇستىك كورەيادان كەلگەن سپورتشىنى جەڭدى.
6-شى جارىس كۇنىنىڭ قورىتىندىسى بويىنشا قازاقستان قۇراماسىنىڭ قورجىنىندا 3 التىن، 4 كۇمىس جانە 19 قولا جۇلدە بار.