اپتا بويى توقتاماي تۇرعان اقجاۋىن نيۋ-يورك پەن ونىڭ ىرگەسىندەگى ەلدى مەكەندەردى سۋ استىندا قالدىردى. قالا مەرى توتەنشە جاعداي تۋرالى جاريالادى، ال شتات گۋبەرناتورى ادام ومىرىنە ءقاۋىپ بار ەكەنىن مالىمدەدى. بيىلعى قىركۇيەك نيۋ-يوركتەگى 1882 جىلدان بەرگى ەڭ جاڭبىرلى اي دەپ تانىلعان، دەپ حابارلايدى اlmaty-akshamy.kz ۆۆس-گە سىلتەمە جاساپ.
اي باسىنان بەرى جۇمانىڭ تاڭىن قوسقاندا نيۋ-يوركتە 350 مم جۋىق جاۋىن جاۋعان. ازىرگە قالا مەن شتات بيلىگى تاسقىن سالدارىنان قازا تاپقاندار مەن اۋىر جاراقات العانداردى تىركەمەگەنىمەن، قۇتقارۋ قىزمەتى سۋ باسقان ءۇي استىنداعى جايلاردان ادامداردى التى رەت شىعارىپ العان.
نيۋ-يورك مەرى ەريك ادامس مەكتەپتەردى جاپپاۋ تۋرالى شەشىم قابىلدادى، سەبەبى وقۋشىلارعا ءقاۋىپ ءتونىپ تۇرعان جوق. دەگەنمەن ول قالا تۇرعىندارىن سۋ باسىپ قالۋى ىقتيمال جەرلەردە اباي بولۋعا شاقىردى.
نيۋ-يورك شتاتىنىڭ گۋبەرناتورى كەتي حوكۋل نوسەر جاۋىندى ادام ومىرىنە ءقاۋىپ ءتوندىرۋى مۇمكىن دەپ اتاپ، نيۋ-يورك، لونگ-ايلەند پەن حادسون-ريۆەر-ۆەللي تۇرعىندارىن تاۋەكەل ەتپەي بيىكتەۋ جەرلەردە بولۋعا شاقىردى.
قالا پوليسياسى كوپتەگەن جولدى تاسقىنعا بايلانىستى جابۋعا تۋرا كەلگەنىن حابارلادى. اسىرەسە كوپىر استىنان نەمەسە تۋننەل ارقىلى وتەتىن ماگيسترالدارداعى قوزعالىس شەكتەلگەنىن ايتتى.
ءتورت مەترو جەلىسى تولىقتاي جابىلعان، ال 12 جەلىدە كەي بەكەتتەر جۇمىس ىستەمەيدى نەمەسە كەشىگىپ جاتىر. اڭگىمە ميلليونداعان ادام پايدالاناتىن نەگىزگى مارشرۋتتار تۋرالى بولىپ وتىر.
كۋينس اۋدانىنداعى لا-گۋارديا اۋەجايى ا تەرمينالى ۋاقىتشا جابىق بولاتىنىن ءمالىم ەتتى.
تاڭنان بەرى ۇشۋ جولاعىنا 100 مم استام جاۋىن-شاشىن تۇسكەن دجون كەننەدي اتىنداعى حالىقارالىق اۋەجاي اكىمشىلىگى اۋا رايىنىڭ قولايسىزدىعىنا بايلانىستى رەيستەر كەشىگۋى، ءتىپتى ۇشپاۋى دا مۇمكىن ەكەنىن ەسكەرتىپ، جولاۋشىلاردى كەستەنى الدىن الا تەكسەرىپ الۋعا شاقىردى.