الماتىدا «حالىق قاتىساتىن بيۋدجەت» باعدارلاماسى ءساتتى جۇزەگە اسىرىلىپ كەلەدى. بۇل جوبا تۇرعىندارعا ءوز يدەيالارىن ورتاعا سالىپ، قالانىڭ كوركەيىپ، اباتتانۋىنا تىكەلەي اتسالىسۋعا مۇمكىندىك بەرەدى. سوڭعى ءۇش جىلدا مەگاپوليستە جالپى قۇنى 39،1 ملرد. تەڭگەنى قۇرايتىن 938 جوبا ىسكە اسقان. ال بيىلعى 2025 جىلدىڭ قالالىق بيۋدجەتىندە باعدارلاماعا 17،1 ملرد. تەڭگە قاراستىرىلعان.
ادەمى زاماناۋي سكۆەرلەر
ءبىز وتكەن اپتادا ءدال وسى جوبا اياسىندا اۋەزوۆ اۋدانىنداعى جاڭارعان اۋماقتاردى ارالاپ قايتتىق. كورگەن ساتتەن-اق باعدارلامانىڭ يگىلىگىن تۇرعىندار سەزىنىپ جۇرگەنى انىق بايقادىق. ولار قالا باسشىلىعىنا دەگەن ريزاشىلىقتارىن جاسىرماي ايتىپ، العىستارىن جاۋدىرىپ جاتتى.
اكىمدىك قىزمەتكەرلەرىنىڭ مالىمەتىنشە، OpenBudget پورتالى ارقىلى اۋدان تۇرعىندارى بىرنەشە بوس اۋماقتى جاسىل ساياباققا اينالدىرۋعا ءوتىنىش بىلدىرگەن. سونىڭ ءبىرى – №8 ىقشاماۋدانداعى التىنسارين كوشەسىنىڭ بويىنداعى №37 ءۇيدىڭ جانى. بۇرىن قاڭىراپ بوس جاتقان جەر ءقازىر تۇرعىندار دەمالاتىن ادەمى زاماناۋي سكۆەرگە اينالعان. ۇزىندىعى 16 مەترلىك جايلى ورىندىقتار، اينالا تولىق جاسىل جەلەكپەن كومكەرىلگەن قوعامدىق كەڭىستىككە گازون توسەلىپ، ونداعان اعاش پەن بۇتا، كوپجىلدىق گۇلدەر وتىرعىزىلىپتى. ادەمى جارىق شامدار مەن بەينەباقىلاۋ كامەرالارى، قوقىس جاشىكتەرى دە قاراستىرىلعان. اسفالت پەن برۋسچاتكا توسەلگەن سەرۋەندەيتىن جولدار ايماققا ەرەكشە ءسان بەرىپ تۇر. ال جاسىل جەلەكتەر ءۇشىن ورناتىلعان سۋارۋ جۇيەسى ونداعى كوگالدىڭ جىل بويى جاسىل كۇيىن ساقتاپ تۇرۋىنا مۇمكىندىك بەرمەك. بۇل جۇمىستار مەردىگەر ۇيىم – «سۇلتان قۇرىلىس» ج ش س تاراپىنان جاسالعان كەلىسىم-شارت اياسىندا جۇزەگە اسىرىلعان. بۇگىندە اباتتاندىرۋ جۇمىستارى تولىق اياقتالىپ، نىسانداردى قابىلداپ الۋ شارالارى جۇرگىزىلىپ جاتىر.
اۋدان اكىمدىگىنىڭ مالىمەتىنشە، «حالىق قاتىساتىن بيۋدجەت» جوباسى اياسىندا قوسىمشا كوگالداندىرۋ شارالارى دا جۇرگىزىلگەن. سونىڭ ناتيجەسىندە 180-نەن استام اعاش پەن بۇتا وتىرعىزىلىپ، 400 دانا جاسىل قورشاۋ جاسالدى. سونىمەن قاتار، 1200 شارشى مەتر اۋماققا زاماناۋي اۆتوسۋارۋ جۇيەسى ورناتىلدى. بۇل جۇمىستاردىڭ بارلىعى قالا ەكوجۇيەسىن ساقتاۋعا باعىتتالعان.
جاڭا سكۆەرگە ءجيى كەلەتىن الماتىلىقتار اينالاداعى وزگەرىستەرگە ءدان ريزا. قىزىن ەمحاناعا الىپ كەلگەن قالا تۇرعىنى سالتانات قاشاعانوۆا ەم-شارا كەزىندە وسى ساياباقتا تىنىعىپ الاتىنىن ايتادى:
– مۇندا وتە جايلى. وتكەن جىلى كەلگەنىمدە بۇل جەردە ەشتەڭە بولماعان ەدى. ءقازىر جازدىڭ اپتاپ ىستىعىندا ساياباقتا وتىرىپ تىنىعۋعا بولادى. قالادا وسىنداي ورىنداردىڭ كوبەيۋى بىزگە ۇلكەن قۋانىش سىيلايدى. بۇل – بيلىكتىڭ تۇرعىندارعا شىن مانىندە قامقورلىق جاساپ وتىرعانىنىڭ ايعاعى، – دەدى ول.
اناداي جەردەگى جايلى ورىندىقتا ۇلىمەن دەمالىپ وتىرعان الماتىلىق تۇرعىنعا جاقىنداپ ءجون سۇرادىق. ءوزىن ميرا قارعابايەۆا دەپ تانىستىرعان انا اۋەزوۆ اۋدانىنا قاراستى №127 مەكتەپتە قازاق ءتىلى مەن ادەبيەتى ءپانىنىڭ ءمۇعالىمى بولىپ قىزمەت اتقارادى. مۇندا ۇلىمەن بىرگە قىدىرىپ كەلە جاتىپ، دەمالىپ وتىر ەكەن.
– بۇرىن بۇل جەر قاراۋسىز، قوقىسقا تولى بولاتىن. ەندى برۋسچاتكا توسەلىپ، ورىندىقتار قويىلىپ، گۇلدەر مەن اعاشتار وتىرعىزىلعان. قالامىز جىل وتكەن سايىن كوركەيىپ كەلەدى. مۇنداي وزگەرىستەردىڭ بارلىعى قالا اكىمى دارحان ساتىبالدىنىڭ ەڭبەگى دەپ ويلايمىن. الماتىنىڭ بۇگىنگى بەينەسى بۇرىنعىدان مۇلدە بولەك. ءار قادام سايىن اسەمدىك پەن تازالىقتى كورىپ، شەتەلدىك قالالارعا ۇقساي باستاعانىنا قۋانامىز، – دەيدى ميرا جەڭىس قىزى.
دەمالىس ايماقتارى
اۋدان تۇرعىندارىنىڭ ۇسىنىسى نەگىزىندە جۇزەگە اسقان تاعى ءبىر ءساتتى جوبالاردىڭ ءبىرى – پياتنيسكيي كوشەسىنىڭ بويىنداعى №86 ءۇي مەن اسكەري مەكتەپ اراسىنداعى اۋماق. بۇگىندە ادام تانىماستاي وزگەرىپ، زاماناۋي قوعامدىق كەڭىستىككە اينالعان ايماققا 680 شارشى مەتر اسفالت پەن 220 شارشى مەتر برۋسچاتكا توسەلىپ، بالالارعا ارنالعان ءتۇرلى-تۇستى ويىن الاڭدارى ورناتىلعان. الىستان كوز تارتاتىن 6 ترەناجەر مەن ۆوركاۋت الاڭى جاسوسپىرىمدەردىڭ ۋاقىتىن ءتيىمدى وتكىزۋگە تاپتىرماس ورىن، ۇلكەندەر تىنىعاتىن كولەڭكەلى ورىندىقتار دا ادەمى ورنالاستىرىلىپتى. اينالانى كوگالداندىرۋ جۇمىستارى دا جۇيەلى جۇرگىزىلىپ، 600 مەترلىك اۆتوسۋارۋ جۇيەسى تارتىلعان.
وسى دەمالىس ورنىندا ءبىز اسكەري مەكتەپتىڭ قىزمەتكەرى وكسانا دجاريمبەتوۆا مەن الماتى تەحنيكالىق بايلانىس كوللەدجىنىڭ مامانى قاناپيا ايشولپانمەن تىلدەستىك. كۇننىڭ ىستىعىنا قاراماي، كولەڭكەدە، تەربەتىلەتىن ورىندىقتا اڭگىمەلەسىپ وتىرعان ولار قۋانىشتارىن جاسىرعان جوق.
– قانداي كەرەمەت! بۇرىن بۇل جەردەن ءجيى وتەتىنبىز. قاڭعىباستار جۇرەتىن، قاراۋسىز قالادى دەپ ويلايتىنبىز. ال ءقازىر قاراڭىزشى، تۋرا شەتەلدەگىدەي بولىپ وزگەرىپتى. بالالار دا ءقاۋىپسىز وينايتىن الاڭ تاپتى. وسىنداي ورىندار قالامىزدا كوپ بولسا ەكەن، – دەيدى قىزدار شاتتانا.
تۇرعىنداردىڭ شىنايى قۋانىشى بۇل جوبانىڭ قانشالىق ماڭىزدى ءارى قاجەتتى ەكەنىن تاعى ءبىر دالەلدەپ بەردى.
قالا ءۇشىن ءاربىر كوگالداندىرىلعان اۋلانىڭ، ءاربىر ويىن الاڭىنىڭ ماڭىزى زور. ويتكەنى، مۇنداي يگىلىكتى ىستەر تۇرعىنداردىڭ ءومىر ءسۇرۋ ساپاسىن ارتتىرىپ قانا قويماي، قوعامداعى ءوزارا سىيلاستىق پەن بىرلىكتى دە نىعايتادى. بۇل باستامالار الداعى ۋاقىتتا دا جالعاسىن تاۋىپ، الماتىنى ودان ءارى جايلى دا كورىكتى قالاعا اينالدىرارى ءسوزسىز.