ارحيۆ كۇندەرى اياسىندا قازاقستان دەلەگاسياسى وزبەكستان ارحيۆتەرى مەن مۋزەيلەرىنىڭ قىزمەتىمەن تانىستى، دەپ حابارلايدى aqshamnews.kz ق ر مادەنيەت جانە اقپارات مينيسترلىگىنىڭ باسپا ءسوز قىزمەتىنە سىلتەمە جاساپ.
قازاقستان مەن وزبەكستان ارحيۆتەرىندە ساقتالعان بىرەگەي تاريحي قۇجاتتار نەگىزىندە «تاريحي جادىنى ساقتاعان ارحيۆتەر»، «مادەني مۇرا جانە ارحيۆ قازىنالارى»، «قازاقستان مەن وزبەكستاننىڭ تاريحي بايلانىستارى ارحيۆ دەرەكتەرىندە» اتتى تاقىرىپتىق كورمەلەردىڭ اشىلۋى ءوتتى.
سونىمەن قاتار ەكى ەلدىڭ ورتاق مادەني جانە تاريحي بايلانىسىن پاش ەتەتىن «ارحيۆ فوتوقۇجاتتارىندا قازاقستان مەن وزبەكستاننىڭ مادەني ىنتىماقتاستىعى» اتتى بىرەگەي كىتاپ-البومنىڭ تۇساۋى كەسىلدى.
قازاقستان ارحيۆشىلەرى مەن عىلىمي قاۋىمداستىق وكىلدەرى «اقپاراتتىق قوعامداعى ارحيۆتەردىڭ ءرولى مەن ماڭىزى» اتتى حالىقارالىق عىلىمي-پراكتيكالىق كونفەرەنسياعا قاتىستى. فورۋمدا ەكى ەلدىڭ وكىلدەرى ارحيۆتەردى سيفرلاندىرۋ، قۇجاتتىق مۇرانى ساقتاۋ، ارحيۆ قورلارىن تولىقتىرۋ جانە قولجەتىمدى ەتۋ ماسەلەلەرىن تالقىلادى.
اتالعان ءىس-شارا قازاقستان رەسپۋبليكاسى مادەنيەت جانە اقپارات مينيسترلىگىنىڭ ارحيۆ، قۇجاتتاما جانە كىتاپ ءىسى كوميتەتى مەن وزبەكستان رەسپۋبليكاسى ادىلەت مينيسترلىگى جانىنداعى «ۋزارحيۆ» اگەنتتىگى اراسىنداعى مادەني-گۋمانيتارلىق ىنتىماقتاستىقتى كەڭەيتۋ جونىندەگى كەلىسىمدەردى جۇزەگە اسىرۋ تۋرالى 2023–2026 جىلدارعا ارنالعان ءىس-قيمىل جوسپارى اياسىندا ۇيىمداستىرىلدى.