VII Baiqonyr International Short Film Festival شىمىلدىعى رەسمي جابىلدى. كينوفەستيۆالدىڭ ۇلتتىق بايقاۋىنداعى باستى ماراپات – «ۇزدىك فيلم» اتاعىن رەجيسسەر ميحايل پليسكونىڭ «رۋح» اتتى قىسقامەتراجدى كارتيناسى جەڭىپ الدى.
فيلم ءومىردىڭ ءمانىن ماتەريالدىق پايداعا اۋىستىرعان ەرعالىم ەسىمدى ورتا جاستاعى جۇرگىزۋشىنىڭ وقيعاسىن باياندايدى. ول بالاسىز ايەلى جۇلدىزبەن اجىراسۋعا ءوتىنىش بەرەدى. وسى ۋاقىتتا بالالار ۇيىنەن 12 جاسار بالا فارۋح قاشىپ كەتەدى. تاعدىر ەرعالىم مەن فارۋحتى كەزدەستىرەدى، ناتيجەسىندە ەكەۋىنىڭ دە ءومىرى تۇبەگەيلى وزگەرەدى.
بايقاۋدا ساحا رەسپۋبليكاسىنان (رف) كەلگەن رەجيسسەر يللاريون ياكوۆليەۆتىڭ «تاكسيست» كارتيناسى دا ۇزدىك اتاندى. بۇل جۇمباق جولاۋشىنى كەزدەستىرگەن تولي ەسىمدى جۇرگىزۋشىنىڭ وقيعاسى... انيماسيالىق بايقاۋدا ۇلتتىق كينونى قولداۋ مەملەكەتتىك ورتالىعىنىڭ كومەگىمەن تۇسىرىلگەن ديلشات ءراحماتۋلليننىڭ «بەسىك جىرى» تۋىندىسى دا ۇزدىكتەر قاتارىنان تابىلدى.
ۇلتتىق بايقاۋدا ۇكقمو-نىڭ قولداۋىمەن تۇسىرىلگەن تاعى ءبىر كارتينا جۇلدەلى بولدى – «قۇس» فيلمىندەگى ءرولى ءۇشىن اقمارال زىقايەۆا «ۇزدىك اكتريسا» اتاندى. سونىمەن بىرگە، «قازاقفيلم» كينوستۋدياسىنىڭ ارنايى سىيلىعىن – تولىقمەتراجدى كوركەم ءفيلمدى بىرلەسىپ شىعارۋ كەزىندە تەحنيكالىق قامتاماسىز ەتۋ مۇمكىندىگىن الىشەر جادىگەروۆ «قاڭتار» اتتى جۇمىسىمەن ۇتىپ الدى. بۇل - الىشەردىڭ حالىقارالىق كينوفەستيۆالدەردەگى ءبىرىنشى جۇلدەسى ەمەس. بۇعان دەيىنگى ەڭبەكتەرى – «وتاۋ» جانە «بالىق سورپا» قىسقامەتراجدى فيلمدەرى وڭتۇستىك كورەيا، پورتۋگاليا، يران، تۇركيا جانە يتالياداعى بايگەلەردىڭ جۇلدەگەرلەرى اتانعان. ال «كارانتين» اتتى دەرەكتى ءفيلمى 5ء-شى Baiqonyr ISFFء-نىڭ «ەڭ ۇزدىك دەرەكتى فيلم» دەپ تانىلعان ەدى.
ەستەرىڭىزگە سالا كەتەيىك، «Baiqonyr» – قازاقستانداعى تۇڭعىش حالىقارالىق قىسقامەتراجدى فيلمدەر كينوفەستيۆالى. ول جەتى جىلدان بەرى جاس كينەماتوگرافيستەرگە قولداۋ كورسەتىپ كەلەدى جانە قازاقستاندا عانا ەمەس، جاقىن جانە الىس شەتەلدەردىڭ ونداعان ەلىندە دە جاڭا ەسىمدەردى تانىتۋدا.