اباي اتىنداعى قازاق ۇلتتىق وپەرا جانە بالەت تەاترىندا جاڭا ماۋسىم اشىلدى
اباي اتىنداعى وپەرا جانە بالەت تەاترىندا 89-شى ماۋسىم اشىلىپ، OPERALIA كلاسسيكالىق ونەردىڭ حالىقارالىق فەستيۆالى باستالدى.
وتكەن دەمالىس كۇندەرى اباي اتىنداعى قازاق ۇلتتىق وپەرا جانە بالەت تەاترى ونەرسۇيەر قاۋىم ءۇشىن ەسىگىن ايقارا اشتى. قالىپتاسقان ءداستۇر بويىنشا جاڭا ماۋسىم OPERALIA فەستيۆالىنىڭ ءبىرىنشى كۇنگى باعدارلاماسىنا ەنگەن احمەت جۇبانوۆ پەن لاتيف ءحاميديدىڭ «اباي» وپەراسىمەن اشىلدى. وپەرانىڭ باستى پارتيالارىن قازاقستان رەسپۋبليكاسىنىڭ ەڭبەك سىڭىرگەن قايراتكەرى، اباي اتىنداعى قازۇوبت جەتەكشى ءسوليسى تالعات كۇزەمبايەۆ (اباي)، قازاقستاننىڭ ەڭبەك سىڭىرگەن ءارتىسى، شىمكەنت قالالىق وپەرا جانە بالەت تەاترىنىڭ ديرەكتورى، پاريجدىك «گراند وپەراداعى» قازاقستاننان شىققان العاشقى سوليست مايرا مۇحامەد قىزى (اجار)، ق ر ەڭبەك سىڭىرگەن قايراتكەرى، «استانا وپەرا» تەاترىنىڭ جەتەكشى ءسوليسى مەيىر باينەش (ايدار) ورىندادى.
مايرا مۇحامەد قىزى مەن مەيىر باينەش – اباي اتىنداعى الماتى وپەرا جانە بالەت تەاترىنىڭ تالىمگەرلەرى. بۇگىندە حالىقارالىق دارەجەدە تانىلعان ارتىستەر ۇزاق جىلدار بويى وسى تەاترعا قىزمەت ەتىپ، ونەر ورداسىنا تۋعان ۇيىندەي باۋىر باسقان. «اباي» وپەراسىنىڭ كورسەتىلىمى الدىندا وتكەن باسپا ءسوز ءماسليحاتىندا مايرا مۇحامەد قىزى مەن مەيىر باينەش ءتالىم العان «قارا شاڭىراققا» العىس ايتىپ، الماتىلىقتاردى شۋاقتى قالامىزدىڭ تۋعان كۇنىمەن قۇتتىقتادى. ماۋسىماشاردىڭ ەكىنشى كۇنى كورەرمەندەرگە كلاسسيكالىق بالەت – پەتر چايكوۆسكييدىڭ «اققۋ كولى» كورسەتىلدى. ونداعى باستى پارتيالاردى اباي اتىنداعى قازۇوبت سوليستەرى، حالىقارالىق كونكۋرستاردىڭ لاۋرەاتتارى ماليكا ەلچيبايەۆا (ودەتتا، وديلليا) جانە ازامات اسقاروۆ (روتبارت)، سونداي-اق سانكت-پەتەربۋرگتەن كەلگەن قوناق، «ماريين» تەاترىنىڭ ءسوليسى – نيكيتا كورنەيەۆ (زيگفريد حانزادا) ورىندادى.
«جەرگىلىكتى بالەت ترۋپپاسىنىڭ ونەرى مەن كاسىبي دەڭگەيى ءبىزدىڭ تەاترلارىمىزدان، سونىڭ ىشىندە ماريين تەاترلارىنان ەش كەم تۇسپەيدى. بارلىق ونەرپازدار ناعىز كاسىبي ماماندار، بارلىعى جاقسى دايىندىقتان وتكەن ءارى شىنايى ار-ۇجدانمەن ەڭبەك ەتەدى. مۇنداي جۇمىستى، كاسىبي ەتيكانى كورۋ وتە جاقسى. ماليكا ەلچيبايەۆامەن ءبىز ماسكەۋدەگى كونكۋرستا تانىستىق، ەندى بىرگە جۇمىس ىستەۋگە مۇمكىندىك تۋدى»، – دەپ پىكىر ءبىلدىردى نيكيتا كورنەيەۆ. ول باسپا ءسوز كونفەرەنسياسىندا الماتى تۋرالى ويىمەن دە ءبولىستى:
– مەن جەرگىلىكتى ارتىستەرمەن بارىنشا ارالاستىم، ەڭ جاقسى ناتيجە كورسەتۋ ءۇشىن سپەكتاكلدەن بىرنەشە كۇن بۇرىن ارنايى كەلدىم. وسى بىرنەشە كۇن ىشىندە الماتىنى تەك جاقسى قىرىنان تانىدىم، كەرەمەت تابيعات كورىنىسى مەن جەرگىلىكتى حالىقتىڭ مادەنيەتى ماعان تەك جاقسى اسەر قالدىردى.
فەستيۆالدىڭ ءۇشىنشى كۇنى، 14 قىركۇيەكتە ۇيىمداستىرۋشىلار قازاقستاندىق كومپوزيتور ەركەش شاكەيەۆتىڭ سيمفونيالىق شىعارمالارىنان تۇراتىن REMEMBER ME بىرەگەي كونسەرتتىك باعدارلاماسىن ۇسىنادى. قازۇوبت باس ديريجەرى، ق ر ەڭبەك سىڭىرگەن قايراتكەرى ەربولات احمەدياروۆتىڭ ايتۋىنشا، بۇل كونسەرت ءبىر-اق رەت تەك لوندوندا كورسەتىلگەن:
– بۇل كوپشىلىكتى ەركەش شاكەيەۆتىڭ سيمفونيالىق شىعارمالارىمەن تانىستىرعان العاشقى كونسەرت بولدى، بۇعان دەيىن ول نەگىزىنەن ەسترادا ءۇشىن جۇمىس ىستەيتىن كومپوزيتور رەتىندە تانىمال بولعان. ەندى ەركەش شاكەيەۆ ءوزىن باسقا قىرىنان كورسەتۋگە بەل بۋدى. لوندونداعى كونسەرتتە كورولدىك فيلارمونيا وركەسترى ونىڭ شىعارمالارىن وينادى. بۇل كونسەرتتى مادەنيەت جانە سپورت ءمينيسترى كورىپ، الماتىدا قايتالاۋدى ءوتىندى. ءبىزدىڭ تەاتردىڭ سيمفونيالىق وركەسترىنىڭ جاندى ورىنداۋىندا ەركەش شاكەيەۆتىڭ تۋىندىلارى وسى فەستيۆالدە شىرقالادى، كونسەرتكە ۇلىبريتانيادان كەلگەن پيانيست وليۆەر پۋل جانە ۆەنادان كەلگەن سكريپكاشى رۋساندا پانفيلي قاتىسادى. بۇل لوندون كونسەرتىنىڭ قايتالانۋى بولادى، وندا كونسەرت ەكى جارىم ساعات ءوتتى. ال مۇندا ءبىز كونسەرتتى كورەرمەندەرىمىز وزدەرىن جايلى سەزىنۋ ءۇشىن مۇمكىندىككە قاراي جانە كومپوزيتوردىڭ الماتىدا تىڭداعىسى كەلەتىن باعدارلاماسى بويىنشا ۇيىمداستىرامىز.
ديريجەردىڭ ايتۋىنشا، كونسەرتكە ەركەش شاكەيەۆتىڭ ءوزى كورەرمەن رەتىندە قاتىسۋى كەرەك.
ال 16 قىركۇيەك كۇنى وڭتۇستىك كورەيانىڭ مادەنيەت قايراتكەرلەرىنىڭ كونسەرتى وتەدى. ساحنادا Kim Se Yun (باريتون)، Kim Hye Jin (سوپرانو)، Yoo Sanghyun (تەنور) ونەر كورسەتەدى. اباي اتىنداعى قازۇوبت سيمفونيالىق وركەسترىنە «پونگتەك فيلارمونيا» وركەسترىنىڭ كوركەمدىك جەتەكشىسى ءارى باس ديريجەرى، سەۋلدىڭ كونسەرتتىك وركەسترىنىڭ باس ديريجەرى، پونگتەك ۋنيۆەرسيتەتىنىڭ پروفەسسورى تە چول ديريجەرلىك ەتەدى.
فەستيۆال 18 قىركۇيەكتە مايرا مۇحامەد قىزى، مەيىر باينەش، Kim Se Yun، Kim Hye Jin، Yoo Sanghyun جانە ارنايى شاقىرىلعان قوناق – بەلگىلى چەح باريتونى، ەۋروپالىق ونەر وداعىنىڭ كوركەمدىك جانە مادەني قىزمەت سالاسىنداعى ەڭ جوعارى ناگراداسىنىڭ يەگەرى – فيليپ بانجاكتىڭ قاتىسۋىمەن وتەتىن گالاكونسەرتپەن اياقتالادى. بۇل ءىس-شارالار اباي اتىنداعى وپەرا جانە بالەت تەاترىنىڭ الماتىلىقتار مەن قالا قوناقتارىنا ارناعان سىيى بولماق.