ولار نارەستەلەردى بالاسى جوق وتباسىلارعا ۇسىنعان.
الماتىدا نارەستەلەردى ساتۋمەن اينالىسقان ۇيىمداسقان قىلمىستىق توپقا قاتىستى تەرگەۋ شارالارى باستالدى، دەپ حابارلايدى Almaty-akshamy.kz
قازىرگى كەزدە كۇدىكتىلەر ۇستالىپ، ۋاقىتشا ۇستاۋ يزولياتورىنا قامالدى.
«الدىن الا ءسوز بايلاسقان ادامدار توبى وزدەرىنىڭ بالالارىنان باس تارتقىسى كەلەتىن جۇكتى ايەلدەردى جانە بالالارى جوق ەرلى-زايىپتىنى ىزدەگەن. سونداي-اق بالالاردىڭ تۋۋ تۋرالى جالعان كۋالىگىن دايىنداۋمەن اينالىسقانى انىقتالدى. اتالعان فاكتى بويىنشا «كامەلەتكە تولماعانداردى ساتۋ» بابى بويىنشا سوتقا دەيىنگى تەرگەپ-تەكسەرۋ باستالدى»، - دەدى ىشكى ىستەر مينيسترلىگىنىڭ رەسمي وكىلى شۇعىلا تۇرلىبەك.
ايتا كەتەرى، قىلمىستىق كودەكستىڭ 135-بابى («كامەلەتكە تولماعاندار ساۋداسى، ادامدار توبىنىڭ الدىن الا ءسوز بايلاسۋىمەن جاسالعان ارەكەت») بويىنشا توعىز جىلدان ون ەكى جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان. كىنالى ادامداردىڭ مۇلكى تاركىلەنەدى.