الماتىدا العاش رەت City Makers: Jastar qalasy اۋقىمدى قالالىق قاۋىمداستىقتار فەستيۆالى ءوتتى. اشىق اسپان استىنداعى بىرەگەي ءىس-شاراعا 7 000-نان استام كورەرمەن جينالدى. سونىمەن قاتار، 107 قاۋىمداستىق پەن 50-دەن استام جۇمىس بەرۋشى قاتىسىپ، قالا تۇرعىندارى مەن قوناقتارىنا باستاماسى مەن الەۋمەتتىك جوباسىن ۇسىندى. جوبا الماتى قالاسى جاستار ساياساتى باسقارماسىنىڭ قولداۋىمەن جۇزەگە استى.
City Makers – جاستاردىڭ باستاماسىن قولداۋعا، شىعارماشىلىقتى جانە سالاۋاتتى ءومىر سالتىن ناسيحاتتاۋعا جانە جاستار قاۋىمداستىقتارىنىڭ بىرىگۋىنە باعىتتالعان جاڭا فورماتتاعى الاڭ. مۇندا قاۋىمداستىقتار، مادەني باستامالار جانە قالاداعى ءتۇرلى ورتالىقتار باس قوسىپ، تاجىريبە الماسىپ، جاڭا سەرىكتەستىك بايلانىس ورناتتى. قاتىسۋشىلار ءۇشىن بۇل تەك كورمە ەمەس، سونىمەن بىرگە جان-جاقتى نەتۆوركينگ الاڭىنا اينالدى. فەستيۆالگە كەلگەن جاستار وزدەرىنە ۇناعان باعىت بويىنشا قاۋىمداستىقتارعا جازىلىپ، الداعى ۋاقىتتا بەلسەندى مۇشەسى بولۋعا نيەت ءبىلدىردى.
«ءبىز بۇگىنگى ءىس-شارا ارقىلى قالامىزداعى ەڭ بەلسەندى قاۋىمداستىقتاردى ءبىر ورتاعا جيناپ، قالا تۇرعىندارىنا تانىستىرۋدى ماقسات ەتتىك. بۇل الماتى جاستارىنىڭ الەۋەتىن اشىپ، ولاردىڭ قوعامعا قوسىپ جاتقان ۇلەسىن كەڭىنەن دارىپتەۋگە ارنالعان ەرەكشە باستاما. وسىنداي جوبالار ارقىلى ازاماتتىق جاۋاپكەرشىلىگى جوعارى، شىعارماشىل ءارى بەلسەندى بۋىن قالىپتاسادى»، – دەدى الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك.
فەستيۆال باعدارلاماسى دا ەرەكشە بولدى. قوناقتار «قامقورلىق داڭعىلى»، «ءتارتىپ داڭعىلى»، «ەكو Town»، «شىعارماشىلىق شاعىن اۋدانى» سىندى ارنايى ايماقتاردى ارالاپ، تەاترلاندىرىلعان جانە مۋزىكالىق قويىلىمداردى تاماشالادى. سونىمەن قاتار، شەبەرلىك دارىستەرىنە قاتىسىپ، پىكىرتالاس الاڭدارىندا وزەكتى ماسەلەلەردى تالقىلاپ، سپورتتىق ويىندارعا قاتىستى. الەۋمەتتىك جانە ەكولوگيالىق جوبالاردىڭ تۇساۋكەسەرلەرى كورەرمەندەرگە ەرەكشە اسەر قالدىردى.
فەستيۆال جاستاردى الەۋمەتتەندىرۋدىڭ تىڭ قۇرالى رەتىندە دە باعالاندى. اسىرەسە، ايماقتاردان الماتىعا كەلگەن ستۋدەنتتەر قالا ومىرىنە بەيىمدەلىپ، قىزىعۋشىلىقتارىنا سايكەس قاۋىمداستىق تاۋىپ، جاڭا ورتاعا تەز ءسىڭىسۋ مۇمكىندىگىنە يە بولدى. بۇل باستاما ولاردىڭ بەلسەندىلىگىن ارتتىرىپ قانا قويماي، ۇلكەن مەگاپوليستەگى ومىرگە سەنىمدى قادام باسۋىنا جول اشتى.
«مەن الماتىعا ەندى عانا كەلدىم. بۇگىن وزىمە قىزىق بىرنەشە قاۋىمداستىق تاۋىپ، جازىلىپ قويدىم. وسىنداي ءىس-شارانى ۇيىمداستىرعاندارعا ەرەكشە العىس بىلدىرەمىن»، – دەدى فەستيۆالگە قاتىسقان ءبىرىنشى كۋرس ستۋدەنتى ايدانا سەيىتوۆا.
City Makers: Jastar qalasy فەستيۆالى الماتىلىق جاستاردىڭ جىگەرى مەن شىعارماشىلىق الەۋەتىن، ولاردىڭ قالا ومىرىنە بەلسەندى قاتىسىپ، قوعامنىڭ دامۋىنا ۇلەس قوسۋعا دەگەن تالپىنىسىن كورسەتتى. ۇيىمداستىرۋشىلاردىڭ ايتۋىنشا، الداعى ۋاقىتتا فەستيۆال اۋقىمىن كەڭەيتىپ، جالعاسىن تابادى.