الماتى پوليسياسى 30 قىركۇيەكتە ۋەفا اياسىندا وتەتىن الماتىلىق "قايرات" پەن مادريدتىك "رەال" اراسىنداعى حالىقارالىق فۋتبول ماچى ءۇشىن تولىق دايىن ەكەنىن مالىمدەدى، - دەپ حابارلايدى اqshamnews.kz ءتىلشىسى.
بۇل وقيعا بۇكىل قالا ءۇشىن ناعىز سپورت مەرەكەسىنە اينالىپ وتىر جانە قاۋىپسىزدىك پەن تارتىپكە ەرەكشە نازار اۋدارۋدى تالاپ ەتەدى.
قالالىق پوليسيا دەپارتامەنتىنىڭ باسپا ءسوز قىزمەتىنىڭ حابارلاۋىنشا، قۇقىقتىق ءتارتىپ پەن قاۋىپسىزدىكتى قامتاماسىز ەتۋ ءۇشىن كەشەندى شارالار قابىلدانعان. قوعامدىق ءتارتىپتى قورعاۋعا 2،5 مىڭنان استام قىزمەتكەر تارتىلادى. نەگىزگى مىندەتتەرى - جانكۇيەرلەر مەن ويىنعا قاتىسۋشىلاردىڭ قاۋىپسىزدىگىن قامتاماسىز ەتۋ جانە جول قوزعالىسىن رەتتەۋ.
"قۇرمەتتى الماتىلىقتار، مەگاپوليس قوناقتارى! ەرتەڭ ءبىزدىڭ قالامىز ۇلكەن وقيعانىڭ ارەناسىنا اينالادى - حالىقارالىق "قايرات – رەال مادريد" فۋتبول ماچى وتەدى. ءبىز الەمنىڭ تۇكپىر-تۇكپىرىنەن كەلگەن جانكۇيەرلەردى قارسى الۋعا قۋانىشتىمىز. بۇل ءبىز ءۇشىن تەك سپورت مەرەكەسى عانا ەمەس، الماتىنىڭ شىنايى بەينەسىن - قوناقجايلىقتى، قۇرمەتتى جانە جوعارى مادەنيەتتى كورسەتەتىن مۇمكىندىك"، - دەدى الماتى قالاسى دپ جەرگىلىكتى پوليسيا قىزمەتى باسقارماسى باستىعىنىڭ ورىنباسارى تيمۋر نوعايبايەۆ.
قۇقىق قورعاۋ ورگاندارىنىڭ وكىلى ماچ وتەتىن كۇنى قوزعالىسقا ءىشىنارا شەكتەۋلەر ەنگىزىلەتىنىن اتاپ ءوتتى. بيلىك وكىلدەرى تۇرعىنداردان جولداردى الدىن الا جوسپارلاۋدى، ۋاقىتشا شارالارعا تۇسىنىستىكپەن قاراۋدى جانە كوشە مەن كولىكتە، ستاديوندا ءتارتىپتى قاتاڭ ساقتاۋدى سۇرايدى.
"كوماندانى قىزۋ قولدايىق، ءبىراق مادەنيەتتى تۇردە. بىرگە تازالىقتى ساقتاپ، بىر-بىرىمىزگە جانە قوناقتارىمىزعا قۇرمەت كورسەتەيىك. جاۋاپتى مىنەز-قۇلىق - الماتى مەن بۇكىل ەلدىڭ يميدجىنە قوسقان ۇلەسىمىز"، - دەپ قوستى ول.
سونىمەن قاتار، الماتىلىق "قايراتتىڭ" الداعى قارسىلاسى مادريدتىك "رەال" فۋتبولشىلارى الماتىعا كەلدى. ولاردىڭ كەلۋى فۋتبول جانكۇيەرلەرى ءۇشىن ۇلكەن وقيعا بولدى: اۋەجايدا قارسى الۋعا جينالعان جانكۇيەرلەر مەن جۋرناليستەر اتى اڭىزعا اينالعان ويىنشىلاردى كورۋگە اسىقتى.