دەپۋتات اسحات ايماعامبەتوۆ تەلەگرام-ارناسىندا The Economist جۋرنالى كوتەرگەن ماڭىزدى ماسەلەگە نازار اۋداردى، دەپ حابارلايدى aqshamnews.kz
ونىڭ ايتۋىنشا، جاساندى ينتەللەكت تەك ەكونوميكا نەمەسە ساياساتتى عانا ەمەس، بالالاردىڭ بالالىق شاعىن دا قالىپتاستىرۋعا كىرىسكەن.
«The Economist جۋرنالىنداعى ماقالا جاساندى ينتەللەكتتىڭ جۇمىستى، ەكونوميكا مەن ساياساتتى عانا ەمەس، سونىمەن قاتار مىزعىماستاي كورىنگەن بالالىق شاقتى دا وزگەرتىپ جاتقانىن كورسەتەدى»، - دەيدى.
ايماعامبەتوۆ قازىرگى ويىنشىقتاردىڭ تەحنولوگيالانىپ بارا جاتقانىن اتاپ ءوتتى.
«قازىرگى ويىنشىقتار "اقىلدى" بولىپ بارادى، سول جي قوسىلعان جاڭا قۋىرشاقتار بالالارمەن سويلەسەدى، رەپەتيتورلار سيفرلىق فورماتقا كوشۋدە. ال كەيبىر ەلدەردە بالالار دوستارىنا قاراعاندا، چات-بوتتارمەن كوبىرەك سىرلاساتىن بولعان»، — دەيدى دەپۋتات.
بۇل ترەند بالالارعا جاڭا مۇمكىندىكتەر اشسا دا، الەۋمەتتىك دامۋ تۇرعىسىنان ۇلكەن سۇراقتار تۋىنداتىپ وتىر.
دەپۋتات ءجي-دىڭ وڭ اسەرىن دە اتاپ وتەدى:
«بۇرىن تەك اۋقاتتى ادامدارعا عانا قولجەتىمدى بولعان دۇنيەلەر، مىسالى، دەربەس وقىتۋ ەندى كوپشىلىككە قولجەتىمدى بولۋدا» – دەيدى دەپۋتات.
الايدا ايماعامبەتوۆ قاۋىپتەردى دە جاسىرمايدى:
«جي ەشقاشان شارشامايدى، رەنجىمەيدى جانە داۋلاسپايدى. ونىمەن عانا سويلەسۋ ارقىلى بالا شىدامدىلىققا، ەموسيانى وقۋعا جانە ءوز پىكىرىن قورعاۋعا ۇيرەنبەيدى»، — دەيدى ول.
ونىڭ پىكىرىنشە، سيفرلىق ورتاعا تىم بەيىمدەلگەن بالا ەرتەڭ شىنايى ومىردەگى ادامدارمەن قاتىناس جاساۋعا قينالۋى مۇمكىن.
الەۋمەتتىك داعدىلاردى دامىتۋ ءۇشىن شىنايى ورتا كەرەك.
«بۇل بىزگە شىنايى، جاندى قارىم-قاتىناستى بارىنشا كۇشەيتۋ كەرەكتىگىن تاعى ءبىر دالەلدەيدى. كىتاپ وقۋ، پىكىرسايىس قوزعالىسى، ءوزىن-وزى باسقارۋ سياقتى ءبىزدىڭ مەكتەپ جوبالارىمىز جي داۋىرىندە ومىرلىك قاجەتتىلىككە اينالىپ وتىر».- دەيدى دەپۋتات.