الماتى قالاسى ءماسليحاتىندا وتكەن سەسسيادا قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى لايلا يمانعالييەۆا جەرگىلىكتى بيۋدجەت ەسەبىنەن تەگىن بەرىلەتىن دارىلەر مەن مەديسينالىق بۇيىمدار تىزىمىندەگى وزگەرىستەردى تانىستىردى، دەپ حابارلايدى aqshamnews.kz
فورمۋليارلىق كوميسسيا ءۇش جاڭا پرەپاراتتى ەنگىزۋدى ۇسىندى:
انيفرولۋماب – جۇيەلى قىزىل جەگى دياگنوزى بار ناۋقاستارعا. بۇرىن قولدانىلعان بەليمۋماب جەتكىزىلمەي قالعاندىقتان، ونى انيفرولۋمابپەن الماستىرۋ جوسپارلانىپ وتىر. بۇل جاڭا بۋىن بيولوگيالىق ءدارى اۋرۋدىڭ بەلسەندىلىگىن تومەندەتىپ، اسقىنۋ ءقاۋپىن ازايتادى.
تەدۋگلۋتيد – قىسقا ىشەك سيندرومى بار ءبىر بالاعا. جىلىنا 372 فلاكون قاجەت. ءدارى ىشەكتىڭ ءسىڭىرۋ قابىلەتىن جاقسارتىپ، پارەنتەرالدى (تامىر ارقىلى) قورەكتەنۋگە تاۋەلدىلىكتى ازايتادى.
ريتۋكسيماب – ديەۆيك اۋرۋى (وپتيكونيەۆروميەليت) دياگنوزى بار ءبىر ناۋقاسقا. بۇل ءدارى اۋىر اۋتويممۋندى قابىنۋدى باسىپ، كورۋ قابىلەتىن جوعالتۋ ءقاۋپىن تومەندەتەدى.
تىزىمنەن الىنىپ تاستالاتىن دارىلەر مەن بۇيىمدار
ەندوپروتەز – وستەوارتروز دياگنوزى ورفاندىق اۋرۋلار تىزىمىندە جوق بولعاندىقتان.
بەليمۋماب – جەتكىزۋشىلەر بولماعاندىقتان ساتىپ الىنبادى. ونىڭ ورنىنا انيفرولۋماب ەنگىزىلەدى.
ريۆاروكسابان – جۇرەكشە فيبريللياسياسى مەن ترەپەتىندە قولدانىلاتىن ءدارى. ول دەنساۋلىق ساقتاۋ مينيسترلىگىنىڭ امبۋلاتورلىق تەگىن دارىلەر تىزىمىنە ەنگىزىلگەندىكتەن، باسقارما جەلىسى بويىنشا ساتىپ الىنبايدى.
ەپلەرەنون (ەكى دوزادا) – ديلاتاسيالىق كارديوميوپاتياعا ارنالعان، سوڭعى ءۇش جىلدا ساتىپ الىنباعان.
قارجىلىق تيىمدىلىك
ءماسليحات دەپۋتاتى ايگۇل شالبايەۆا جاڭا دارىلەردىڭ بيۋدجەتكە اسەرىن سۇرادى. لايلا يمانعالييەۆا انيفرولۋمابتىڭ باعاسى بەليمۋمابقا شامالاس ەكەنىن، قاراجات جىل سايىن جوسپارلانعانىن، ال بەليمۋماب 2025 جىلى جەتكىزىلمەگەندىكتەن، انيفرولۋماب كلينيكالىق تۇرعىدان دا، ەكونوميكالىق جاعىنان دا ءتيىمدى بالاما ەكەنىن ايتتى.