– تاۋەلسىزدىكتىڭ 30 جىلدىعىندا كەشەندى رەفورمالار جۇرگىزىلەتىن بولادى. بارلىق كۇش-جىگەرىمىزدى ءتيىمدى مەملەكەت پەن ادىلەتتى قوعام قۇرۋعا جۇمىلدىرۋىمىز كەرەك. باستى باسىمدىق – حالىقتىڭ تۇرمىس ساپاسىن جاقسارتىپ، ءال-اۋقاتىن ارتتىرۋ. جۇرت جاساندى جەتىستىكتەردى ەمەس، كوزبەن كورىپ، قولمەن ۇستايتىن ناقتى ناتيجەنى كۇتەدى. حالىق ەكونوميكالىق جانە الەۋمەتتىك باعدارلامالاردىڭ جەمىستى بولعانىن قالايدى.
قاسىم-جومارت توقايەۆ.
2021 جىلعى 1 قىركۇيەك پەن 30 قازان ارالىعىندا ەلىمىزدە كەزەكتى ۇلتتىق حالىق ساناعى ءوتتى. ساناققا دايىندىق اياسىندا نۇسقاۋشىلار مامىر-شىلدە ارالىعىندا، تىركەۋشىلەر 1 ماۋسىمنان باستاپ 30 ماۋسىمعا دەيىن جۇمىس ىستەدى.
2021 جىلدىڭ باستى وقيعالارى
- ەل تاۋەلسىزدىگىنىڭ 30 جىلدىعىن مەرەكەلەۋ جونىندەگى مەملەكەتتىك كوميسسيانىڭ العاشقى باسقوسۋى.
- ۇلتتىق قوعامدىق سەنىم كەڭەسىنىڭ بەسىنشى وتىرىسى. جەر ساتىلمايدى.
- COVID-19 كوروناۆيرۋس ينفەكسياسىمەن كۇرەس. قازاقستاندىق ۆاكسينا.
- حالىق ساناعى – 2021.
- سەمەي پوليگونىنىڭ جابىلعانىنا – 30 جىل.
- ۇلى اعارتۋشى ىبىراي ءالتىنساريننىڭ – 180، جىر الىبى جامبىلدىڭ – 175، الاش ارىسى ءاليحان بوكەيحانوۆتىڭ – 155، كۇش اتاسى قاجىمۇقاننىڭ – 150، مۇزبالاق اقىن مۇقاعالي ماقاتايەۆتىڭ – 90 جىلدىعى...
2020 جىلعى 14 جەلتوقساندا تاۋەلسىزدىك كۇنى قارساڭىندا وتكەن مەملەكەتتىك ناگرادالار تاپسىرۋ راسىمىندە سويلەگەن سوزىندە قاسىم-جومارت توقايەۆ: «مىنە، ەگەمەن ەلىمىزدىڭ ومىرىندەگى تاعى ءبىر مەرەيلى بەلەس جاقىنداپ كەلەدى. ءبىز قاستەرلى تاۋەلسىزدىكتىڭ 30 جىلدىعىنا قادام باسامىز. بۇل – بارشامىزعا ورتاق ونەگەلى ولشەم، تاعىلىمدى كەزەڭ. جاڭا مەملەكەت قۇرۋعا اتسالىسقان بۇكىل حالقىمىزدىڭ ەرەن ەڭبەگىنىڭ تاريحي شەجىرەسى»،– دەي كەلە 2021 جىلدى «تاۋەلسىزدىكتىڭ 30 جىلدىعى» دەپ جاريالادى. پرەزيدەنت تاريحى باي، تامىرى تەرەڭ قازاق ەلى ءۇشىن بۇدان اسقان قاستەرلى قۇندىلىق جوق ەكەنىن، ەگەمەندىك – ءار حالىققا بۇيىرا بەرمەيتىن باعا جەتپەس باقىت ەكەنىن قاداپ ايتتى.
تاۋەلسىزدىگىمىزدىڭ ءتورتىنشى ونجىلدىعىنىڭ بەتاشار جىلىنداعى باستى ساياسي وقيعالاردىڭ ءبىرى – ءماجىلىس پەن ءماسليحات دەپۋتاتتارىنىڭ سايلاۋى. ەكى ناۋقاندى ءبىر ۋاقىتتا وتكىزۋ بيۋدجەت قارجىسىن ۇنەمدەۋگە مۇمكىندىك بەردى. سايلاۋعا «قازاقستان حالىق پارتياسى»، «Nur Otan»، «ADAL»، «اۋىل»، «اق جول» پارتيالارى قاتىستى.
2021 جىلعى 5 اقپاندا قازاقستان رەسپۋبليكاسى تاۋەلسىزدىگىنىڭ 30 جىلدىعىن مەرەكەلەۋگە دايىندىق جونىندەگى مەملەكەتتىك كوميسسيانىڭ ءبىرىنشى وتىرىسى ءوتتى. ەلىمىز ەگەمەندىگىنىڭ ءتورتىنشى ونجىلدىعىنا قادام باستى. قازاق ەلى ءۇشىن بۇل ارينە اسا ماڭىزدى كەزەڭ. سوندىقتان دا پرەزيدەنت اتاۋلى جىلعا دايىندىقتىڭ ساقاداي ساي بولۋى كەرەكتىگىن ەسكەرتتى.
مەملەكەت باسشىسى بارلىق باستامالاردىڭ تياناقتى ىسكە اسىرىلۋى قاجەتتىگىن، قۇر داڭعازا مەن ىسىراپشىلدىققا جول بەرۋگە بولمايتىنىن، ءاربىر ءىس-شارانى ەلگە پايداسى تيەتىن ناقتى ىستەرگە ۇلاستىرۋ قاجەتتىگىن اماناتتادى.
بۇل جىلى ەكونوميكا، الەۋمەتتىك سالا، ءبىلىم، عىلىم جانە باسقا دا باعىتتار بويىنشا تىڭ جوبالار قولعا الىندى. تاۋەلسىزدىكتىڭ 30 جىلدىق تۇجىرىمداماسى نەگىزىندە ۇكىمەت ارنايى جوسپار ازىرلەدى. ارينە، پرەزيدەنت ايتقانداي، مۇنداي تۇتاس مەملەكەتتى قامتيتىن اۋقىمدى ءىس-شارالاردى وتكىزگەن كەزدە ايقىن كوزقاراس، ناقتى ۇستانىم بولۋى شارت. ياعني، تاۋەلسىزدىكتىڭ 30 جىلدىعىن تەك مەرەيتوي دەپ ساناۋعا بولمايدى. ەڭ الدىمەن، بۇل تاريحي وقيعاعا يدەولوگيالىق تۇرعىدان قاراۋىمىز كەرەك. «ءتيىمسىز فورۋمدار مەن كونفەرەنسيالار وتكىزۋ دە قاجەت ەمەس. تاعىلىمدىق ءمانى بار شارالارعا باسا نازار اۋدارعان ءجون. ءبىز ءۇشىن حالىقتىڭ الەۋمەتتىك جاعدايىن جاقسارتۋ – باستى مىندەت. ەلدىڭ تۇرمىسى تۇزەلمەسە، جەتىستىكتەردى ماقتان ەتۋ ارتىق. جۇرت بىزدەن ومىرىنە وزگەرىس اكەلەتىن ناقتى قادامدار كۇتەدى. مەملەكەتتىك اپپارات وسى سەنىم مەن ءۇمىتتى اقتاۋعا ءتيىس.ۇكىمەت مەنىڭ تاپسىرمام بويىنشا الەۋمەتتىك كودەكستىڭ جوباسىن دايىنداپ جاتىر. كودەكس ازاماتتاردىڭ، اسىرەسە، كومەككە مۇقتاج ادامداردىڭ سۇرانىسىنا تولىق ساي كەلۋى كەرەك. مينيسترلەر مەن اكىمدەر «حالىق ۇنىنە قۇلاق اساتىن مەملەكەت» قاعيداسىن بەرىك ۇستانۋعا ءتيىس. ازاماتتاردىڭ ارىز-تىلەكتەرىنە جەدەل جاۋاپ بەرۋ قاجەت. ەڭ باستىسى، تاۋەلسىزدىكتىڭ يگىلىكتەرىن ءاربىر وتانداسىمىز كۇندەلىكتى تىرشىلىگىندە سەزىنە الاتىن بولسا – ماقساتىمىزدىڭ ورىندالعانى»،– دەدى مەملەكەت باسشىسى.
پرەزيدەنت تاپسىرماسىنا وراي جاستار ساياساتىنا ارنالعان «تاۋەلسىزدىك ۇرپاقتارى» اتتى ءبىرتۇتاس ۇلتتىق جوبا ازىرلەۋ قولعا الىندى. ءار باعىت بويىنشا بىتىراڭقى جۇزەگە اسىرىلىپ جاتقان جوبالار ءبىر ارناعا توعىستىرىلدى. 30 جىلدىققا بايلانىستى شارالار حالىققا رۋحاني سەرپىلىس اكەلۋى قاجەتتىگىنە، ءاربىر ءىس-شارا مەملەكەتشىلدىك سانانى نىعايتۋعا ارنالۋى كەرەكتىگىنە ماڭىز بەرىلدى. ۇلت تاريحىندا وشپەس ءىز قالدىرعان كورنەكتى تۇلعالاردىڭ ەڭبەگىن ناسيحاتتاۋعا دا كوڭىل ءبولىندى. بۇل جىلى حالىقارالىق قاۋىمداستىق ءۇشىن دە ايرىقشا ماڭىزدى وقيعا سانالاتىن سەمەي پوليگونىنىڭ جابىلعانىنا 30 جىل تولسا، ەلىمىزدە ۇلى اعارتۋشى ىبىراي ءالتىنساريننىڭ – 180، جىر الىبى جامبىلدىڭ – 175، الاش ارىسى ءاليحان بوكەيحانوۆتىڭ – 155، كۇش اتاسى قاجىمۇقاننىڭ – 150 جىلدىعى جانە تاعى باسقا دا بىرنەشە تاريحي تۇلعالاردىڭ مەرەيتويلارىنا وراي ءتۇرلى ءىس-شارالار ۇيىمداستىرىلدى.
مەملەكەت باسشىسى جانە ءبىر ءۇش ماڭىزدى ماسەلەنى قوزعادى – قازاقستاننىڭ اكادەميالىق ۇلگىدەگى تاريحىن جازۋدى جەدەل باستاۋدى، مەملەكەتتىك رامىزدەرىمىزدى قولدانۋ ەرەجەسىن قايتا قاراۋدى تاپسىردى.قاسيەتتى كوك بايراعىمىزدى ءۇي سىرتىنا جانە باسقا دا كورنەكتى جەرلەرگە ىلۋگە تىيىم سالۋعا بولمايتىنى، كەرىسىنشە، ازاماتتاردىڭ مۇنداي ارەكەتىن قۇپتاۋ كەرەكتىگى، قازاق ءتىلىن مەڭگەرۋ – ءبىرتۇتاس ۇلت بولۋ جولىنداعى ايرىقشا ماڭىزدى قادام ەكەندىگى تۋرالى پرەزيدەنت اماناتتارى قوعامنىڭ ايىرىقشا قولداۋىنا يە بولدى.
2021 جىلعى 1 قىركۇيەكتە مەملەكەت باسشىسى پارلامەنت پالاتالارىنىڭ بىرلەسكەن وتىرىسىندا «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى جولداۋىن جاريالاپ، قازاقستاننىڭ الداعى دامۋ ستراتەگياسىن ايقىنداپ بەردى.
تاۋەلسىزدىك شەجىرەسى. 2021 جىلعى قاڭتار – ماۋسىم ايلارى
1 قاڭتار
مەملەكەت باسشىسى قاسىم-جومارت توقايەۆ تۇركيا پرەزيدەنتى رەجەپ تاييپ ەردوعانمەن تەلەفون ارقىلى سويلەستى.
كوروناۆيرۋس پاندەمياسىنا قاراماستان ەكى ەل اراسىنداعى ءوزارا ساۋدا كولەمى 2،6 ميلليارد دوللاردى قۇراعان. مەملەكەت باسشىسى ساۋدا-ساتتىقتى ارتتىرۋعا جانە ينۆەستيسيالىق ىنتىماقتاستىقتى جانداندىرۋعا كۇش سالۋدى ۇسىندى. تۇركيا پرەزيدەنتى مۇنداي ۇسىنىستى قابىل الىپ، سونىڭ ناتيجەسىندە بىرلەسە وتىرىپ ساۋدا كولەمىن ءۇش ەسەگە ۇلعايتۋعا بولاتىنىن ايتتى. ىندەتكە قارسى ەكى ەلدىڭ ءىس-قيمىلىن جوعارى باعالاپ، قازاقستان باسشىلىعىنىڭ باتىل ارەكەتىنىڭ ارقاسىندا مەملەكەتتەگى ەپيدەميولوگيالىق جاعداي باقىلاۋعا الىنعانىن جەتكىزدى.
10 قاڭتار
مەملەكەت باسشىسى ءال-فارابي اتىنداعى وقۋشىلار سارايىندا ورنالاسقان سايلاۋ ۋچاسكەسىنە بارىپ، قازاقستان رەسپۋبليكاسى ءماجىلىسى مەن جەرگىلىكتى ءماسليحاتتار سايلاۋىندا ءوز تاڭداۋىن جاسادى.
– بۇل سايلاۋ مەملەكەتىمىزدىڭ ودان ءارى دامۋىنا سەرپىن بەرەدى. جالپى ءبىزدىڭ پارلامەنتكە نەعۇرلىم كوپ پارتيا كىرسە، ەلىمىزدىڭ بولاشاعى ءۇشىن دە سوعۇرلىم جاقسى بولادى. سوندىقتان سايلاۋ ءادىل وتەدى دەپ سەنەمىن. پارلامەنتتىڭ نەگىزگى مىندەتى ساپالى زاڭدار قابىلداۋ. قازاقستانعا ساپالى زاڭناما جۇيەسى قاجەت. سول سەبەپتى ءبارىمىز وسى مۇمكىندىكتى پايدالانىپ داۋىس بەرۋىمىز كەرەك، – دەدى قاسىم-جومارت توقايەۆ.
26 قاڭتار
مەملەكەت باسشىسى ۇكىمەتتىڭ كەڭەيتىلگەن وتىرىسىن وتكىزدى.
– بيىل شاعىن جانە ورتا بيزنەسكە قولداۋ كورسەتۋ ەڭ باستى نازاردا بولۋعا ءتيىس. ۇكىمەتكە «اتامەكەن» ۇلتتىق كاسىپكەرلەر پالاتاسىمەن بىرلەسىپ، ءبىر ايدىڭ ىشىندە وسىعان قاجەتتى ءىس-شارالار توپتاماسىن ازىرلەۋدى تاپسىرامىن. «ەڭبەك» مەملەكەتتىك باعدارلاماسى – حالىقتى جۇمىسپەن قامتۋدىڭ نەگىزگى قۇرالى...حالىققا بەرىلەتىن شاعىن نەسيەلەردىڭ ستاۆكاسى 6 پايىزدان اسپاۋعا ءتيىس، – دەدى مەملەكەت باسشىسى.ول ازىق-تۇلىك قاۋىپسىزدىگىن قامتاماسىز ەتۋ اسا ماڭىزدى مىندەت ەكەنىن قاداپ ايتتى. ۇكىمەتكە 2021-2025 جىلدارعا ارنالعان «جاسىل قازاقستان» ۇلتتىق جوباسىن ازىرلەۋ تاپسىرىلدى. قازاقستان تاريحى جانە دۇنيەجۇزى تاريحى پاندەرى بويىنشا ءبىرىڭعاي وقۋلىق ازىرلەپ، ەنگىزۋ كەرەكتىگى ءسوز بولدى.
29 قاڭتار
اقوردادا مەملەكەت باسشىسىنىڭ توراعالىعىمەن رەفورمالار جونىندەگى جوعارى كەڭەستىڭ ءۇشىنشى وتىرىسى ءوتتى.
جيىندا قازاقستان رەسپۋبليكاسىنىڭ 2025 جىلعا دەيىنگى ۇلتتىق دامۋ جوسپارىن ازىرلەۋ، مەملەكەتتىك جوسپارلاۋدىڭ جاڭا جۇيەسى، مەملەكەتتىك باسقارۋدى دامىتۋدىڭ 2030 جىلعا دەيىنگى تۇجىرىمداماسى، 2021-2025 جىلدارعا ارنالعان جەكەشەلەندىرۋ جوسپارىنىڭ جوباسى، سونداي-اق، جەدەل رەفورمالار پاكەتى جانە ۇلتتىق حالىق ساناعىن وتكىزۋ ماسەلەلەرى قاراستىرىلدى.
31 قاڭتار
الماتى اۋەجايىنا ەلوردادان رەسەيدىڭ «سپۋتنيكV» ۆاكسيناسىنىڭ العاشقى 2050 دوزاسى جەتكىزىلدى. بۇعان دەيىن ەلىمىزگە رەسەيدە شىعارىلعان «سپۋتنيك V» ۆاكسيناسىنىڭ 22 مىڭ دوزاسى اكەلىندى. قازاقستان بۇل ۆاكسينانى تىركەگەن الەمدەگى 27ء-شى مەملەكەت بولدى. «سك-فارماسيا» ج ش س الماتى قالاسى بويىنشا وكىلدىگى ۆاكسينانى قابىلداپ، جان-جاققا تاراتتى.ال،1 اقپاندا ەلىمىزدە رەسەيدىڭ «سپۋتنيكV» ەكپەسىمەن حالىقتى ەرىكتى ۆاكسينالاۋ ناۋقانى باستالدى. دەنساۋلىق ساقتاۋ ءمينيسترى الەكسەي سوي قاراعاندى فارماسيەۆتيكا كەشەنى بازاسىندا وندىرىلەتىن «سپۋتنيك V» ۆاكسيناسىن تىركەۋ جوسپارلانىپ وتىرعانىن حابارلادى.«سپۋتنيك V» – الەمدە العاش تىركەلگەن ۆاكسينا. ول – تيىمدىلىگى 90% -تەن اساتىن الەمدەگى ءۇش ۆاكسينانىڭ ءبىرى. ۆاكسينانىڭ تيىمدىلىگى 91،6% كورسەتتى، بۇل مالىمەت 19 866 ەرىكتىگە سىناق جۇرگىزىلگەننەن كەيىن الىندى.
5 اقپان
قاسىم-جومارت توقايەۆتىڭ توراعالىعىمەن ەل تاۋەلسىزدىگىنىڭ 30 جىلدىعىن مەرەكەلەۋ جونىندەگى مەملەكەتتىك كوميسسيانىڭ العاشقى وتىرىسى ءوتتى.
مەملەكەت باسشىسى ەل تاريحىنداعى ەلەۋلى مەرەكە كەزىندە قۇر داڭعازا مەن ىسىراپشىلدىققا جول بەرۋگە بولمايتىنىن، ءاربىر شارانى ەلگە پايداسى تيەتىن ناقتى ىستەرگە ۇلاستىرۋ قاجەت ەكەنىن باسا ايتتى. ەكونوميكا، الەۋمەتتىك سالا، ءبىلىم، عىلىم جانە باسقا دا باعىتتار بويىنشا تىڭ جوبالار قولعا الىناتىنىنا توقتالدى. قازاق ءتىلىن مەڭگەرۋدى ءبىرتۇتاس ۇلت بولۋ جولىنداعى ايرىقشا ماڭىزدى قادام دەپ باعالادى.
25 اقپان
مەملەكەت باسشىسى ۇلتتىق قوعامدىق سەنىم كەڭەسىنىڭ بەسىنشى وتىرىسىنا قاتىستى
قاسىم-جومارت توقايەۆ ءوز سوزىندە ۇلتتىق قوعامدىق سەنىم كەڭەسىنىڭ «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋعا زور ۇلەس قوسىپ كەلە جاتقانىن جانە كەڭەستە قابىلدانعان شەشىمدەر ەلىمىزدەگى جۇرگىزىلىپ جاتقان رەفورمالارعا تىڭ سەرپىن بەرگەنىن ايتتى.مەملەكەت باسشىسى جەر ماسەلەسىنىڭ ەرەكشە ماڭىزدى ەكەنىن اتاپ ءوتتى. «بۇل ماسەلەگە قاتىستى قاۋەسەتتەردى توقتاتۋ قاجەت. سوندىقتان مەن مىناداي ناقتى شەشىمدەر قابىلدادىم. بىرىنشىدەن، شەتەلدىكتەرگە جانە شەتەلدىك زاڭدى تۇلعالارعا اۋىل شارۋاشىلىعى جەرلەرىن ساتۋعا، جالعا بەرۋگە زاڭ جۇزىندە ءبىرجولا تىيىم سالۋدى تاپسىرامىن. بۇل شەتەلدىكتەردىڭ ۇلەسى بار زاڭدى تۇلعالارعا دا قاتىستى. مەن مۇنى پرەزيدەنتتىڭ زاڭ شىعارۋ باستاماسى ارقىلى جەدەل تۇردە جۇزەگە اسىرۋ قاجەت دەپ شەشتىم. پرەزيدەنت اكىمشىلىگى ءدال وسى ماسەلەگە بايلانىستى ءتيىستى زاڭ جوباسىن ازىرلەۋى كەرەك. ەكىنشىدەن، ءبىر ايدىڭ ىشىندە جەر رەفورماسى جونىندەگى كوميسسيانى قۇرىپ، 25 ناۋرىزدا جۇمىسقا كىرىسۋدى تاپسىرامىن. كوميسسيانىڭ قۇرامىنا اگرارلىق سەكتوردىڭ بەدەلدى وكىلدەرىن جانە جەر ماسەلەسىن جەتىك بىلەتىن ساراپشىلاردى قوسۋ كەرەك. ۇشىنشىدەن، ۇكىمەتكە بيىلعى تامىز ايىنىڭ سوڭىنا دەيىن جەر رەفورماسىنىڭ نەگىزگى ماسەلەلەرى بويىنشا ورتاق مامىلە ارقىلى تۇبەگەيلى بايلام جاساۋدى تاپسىرامىن. تورتىنشىدەن، كوميسسيا جۇمىسىنىڭ ءاربىر كەزەڭى جانە وندا ۇسىنىلعان شارالار تۋرالى حالىقتى ۇنەمى حاباردار ەتىپ وتىرۋ كەرەك. باستى مىندەتتىڭ ءبىرى – كوميسسيا جۇمىسىنىڭ جانە شەشىم قابىلداۋدىڭ مەيلىنشە اشىقتىعىن كورسەتۋ. ەڭ باستىسى، جەر شەتەلدىكتەرگە ساتىلمايتىنى تۋرالى تۇبەگەيلى شەشىم قابىلداندى»، – دەدى مەملەكەت باسشىسى.
12 ناۋرىز
اقش پرەزيدەنتى دجو بايدەننىڭ قۇتتىقتاۋ جەدەلحاتى كەلدى
مەملەكەت باسشىسى قاسىم-جومارت توقايەۆتىڭ اتىنا ناۋرىز مەرەكەسىنە وراي امەريكا قۇراما شتاتتارىنىڭ پرەزيدەنتى دجو بايدەننىڭ قۇتتىقتاۋ جەدەلحاتى كەلىپ ءتۇستى.
بيىل قازاقستان رەسپۋبليكاسى ءوز تاۋەلسىزدىگىنىڭ 30 جىلدىعىن اتاپ وتەدى. ءسىزدى وسى اتاۋلى وقيعامەن قۇتتىقتاي وتىرىپ، اقش پرەزيدەنتىنىڭ اكىمشىلىگى وزىڭىزبەن جانە قازاقستان حالقىمەن ەتەنە جۇمىس ىستەۋگە زور ءمان بەرەتىنىن ايتقىم كەلەدى. ۇزاق جىلدار بويى ءبىز يادرولىق قارۋدى تاراتپاۋ، بەيبىتشىلىك پەن قاۋىپسىزدىكتى نىعايتۋ باعىتىنداعى تىعىز سەرىكتەستى قولداپ كەلەمىز. مەنىڭ اكىمشىلىگىم ستراتەگيالىق سەرىكتەستىگىمىزدى تەرەڭدەتۋگە جانە بۇدان 5 جىل بۇرىن مەملەكەتتىك حاتشى دجون كەرريدىڭ قاتىسۋىمەن باستالعان «س5+1» ديالوگ پروسەسىن جالعاستىرۋعا مۇددەلى، – دەپ جازىلعان جەدەلحاتتا. ناۋرىز مەرەكەسى قارساڭىندا دجو بايدەن قاسىم-جومارت توقايەۆقا جانە قازاقستان حالقىنا بەيبىتشىلىك پەن قۇت-بەرەكە تىلەدى.
31 ناۋرىز
مەملەكەت باسشىسى ونلاين فورماتتا وتكەن تۇركىتىلدەس مەملەكەتتەردىڭ ىنتىماقتاستىق كەڭەسىنىڭ بەيرەسمي سامميتىنە قاتىستى.
– ءبىزدىڭ ماقساتىمىز – تۇركى الەمىن XXI عاسىردا ماڭىزدى ەكونوميكالىق جانە مادەني-گۋمانيتارلىق كەڭىستىكتىڭ بىرىنە اينالدىرۋ. تۇركى وركەنيەتىن جاڭعىرتۋدى، ەڭ الدىمەن، ياساۋي مۇراسى مەن قاسيەتتى تۇركىستاندى الەمگە تانىتۋدان باستاۋعا شاقىرامىز. سول سەبەپتى بۇگىنگى سامميت «تۇركىستان – تۇركى الەمىنىڭ رۋحاني استاناسى» دەپ اتالىپ وتىر، – دەدى مەملەكەت باسشىسى.
تۇركىتىلدەس مەملەكەتتەردىڭ ىنتىماقتاستىق كەڭەسىنىڭ بەيرەسمي ءسامميتىنىڭ قورىتىندىسى بويىنشا تۇركىستان دەكلاراسياسى قابىلداندى.
28 ءساۋىر
«ۆەچەرنيي Almaty» گازەتىنە – 85 جىل! بۇل – ەلىمىزدىڭ مەدياكەڭىستىگىندەگى ماڭىزدى وقيعا.
بيىل 85 جىلدىق مەرەيتويىن اتاپ وتكەن گازەتتىڭ ءتۇپ نەگىزى 1936 جىلى 28 ساۋىردە جارىق كورگەن «سوسياليستيچەسكايا الما-اتا» گازەتىنەن باستاۋ الادى. مەملەكەت باسشىسى گازەت ۇجىمىنا ارنايى قۇتتىقتاۋ جولدادى. ال، 25 ماۋسىم كۇنى «قازمەديا ورتالىعىندا» قازاقستان رەسپۋبليكاسى پرەزيدەنتىنىڭ بۇقارالىق اقپارات قۇرالدارى سالاسىنداعى سىيلىقتارى مەن گرانتتارىن تابىستاۋ ءراسىمى ءوتتى. سالتاناتتى ءىس-شارا بارىسىندا پرەزيدەنت اكىمشىلىگى باسشىسىنىڭ ءبىرىنشى ورىنباسارى داۋرەن ابايەۆ مەملەكەت باسشىسى قاسىم-جومارت توقايەۆتىڭ ب ا ق قىزمەتكەرلەرىنىڭ كاسىبي مەرەكەسىنە ارنالعان قۇتتىقتاۋىن وقىپ، پرەزيدەنت سىيلىعى مەن گرانتىنىڭ يەگەرلەرىن، العىسىن العان شىعارماشىلىق ۇجىمداردى ماراپاتتادى. قازاقستان رەسپۋبليكاسى پرەزيدەنتىنىڭ العىسىنا ءبىزدىڭ ارىپتەستەرىمىز، «ۆەچەرنيي Almaty» گازەتىنىڭ شىعارماشىلىق ۇجىمى دا – قوعامدىق-ساياسي، الەۋمەتتىك-ەكونوميكالىق جانە مادەني-گۋمانيتارلىق سالالاردىڭ دامۋىن اقپاراتتىق تۇرعىدان قامتاماسىز ەتۋگە قوسقان زور ۇلەسى ءۇشىن يەلەندى. پرەزيدەنت اكىمشىلىگى باسشىسىنىڭ ءبىرىنشى ورىنباسارى داۋرەن ابايەۆ سالتاناتتى راسىمدە العىس حاتتى «الاتاۋ اقپارات» مەدياحولدينگىنىڭ باس ديرەكتورى تولەمىس باقتىباي ۇلى كۇلمۇحامەدوۆكە تاپسىردى.
28 مامىر
مەملەكەت باسشىسى دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادحانوم گەبرەيەسۋسپەن ۆيدەو كونفەرەنسيا رەجيمىندە كەزدەسۋ وتكىزدى.
كەزدەسۋ بارىسىندا قازاقستان مەن دۇنيەجۇزىلىك دەنساۋلىق ساقتاۋ ۇيىمى اراسىنداعى، اتاپ ايتقاندا، كوروناۆيرۋس پاندەمياسىنا قارسى ءىس-قيمىل بويىنشا ىنتىماقتاستىقتى نىعايتۋدىڭ پەرسپەكتيۆالارى قاراستىرىلدى.
31 مامىر
مەملەكەت باسشىسى قاسىم-جومارت توقايەۆتىڭ ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە بايلانىستى ۇندەۋى جاريالاندى.
«بۇگىن، 31 مامىر – ەل تاريحىنداعى ەڭ ازالى كەزەڭنىڭ ءبىرىن ەسكە الۋ كۇنى. حالقىمىز نەبىر زوبالاڭدى كورسە دە رۋحىن الاسارتقان جوق. بىرلىگىن بەكەمدەپ، ىنتىماعىن ارتتىرا ءتۇستى.تاۋەلسىزدىك تاڭى اتقاننان كەيىن ءبىز ارىستارىمىزدى اقتاۋعا كىرىستىك. كەزىندە جازىقسىز جازالانعان مىڭداعان ازاماتتىڭ ەسىمىن ەل جادىندا جاڭعىرتتىق.بىلتىر قۋعىن-سۇرگىن قۇرباندارىن تولىق اقتاۋ ءۇشىن مەملەكەتتىك كوميسسيا قۇرىلدى. كوميسسيا سولاقاي ساياساتتان جاپا شەككەن قازاقستاندىقتارعا قاتىستى تاريحي ادىلدىكتى قالپىنا كەلتىرۋگە ءتيىس. بۇل – مەملەكەتتىڭ عانا مىندەتى ەمەس، بۇكىل قوعامنىڭ پارىزى»،–دەدى پرەزيدەنت.
2 ماۋسىم
مەملەكەت باسشىسى قاسىم-جومارت توقايەۆ قحر ءتوراعاسى سي سزينپينمەن تەلەفون ارقىلى سويلەستى.
مەملەكەت باسشىلارى الەمدىك جانە وڭىرلىك كۇن تارتىبىندەگى وزەكتى ماسەلەلەر بويىنشا پىكىر الماستى. ولار بۇۇ، شىۇ جانە «ورتالىق ازيا – جۇڭگو» فورماتى سياقتى كوپجاقتى الاڭدارداعى ءوزارا ءىس-قيمىلداردىڭ زور الەۋەتى بار ەكەنىن اتاپ ءوتتى. ەكى ەل باسشىلارى جاڭا ءداۋىر كەزەڭىندە مۋلتيلاتەراليزم تۇجىرىمداماسىن جانە «ادامزاتتىڭ ورتاق تاعدىرى» قوعامداستىعىن قۇرۋدىڭ اسا قاجەت ەكەنىن ايتتى.
4 ماۋسىم
مەملەكەت باسشىسى قاسىم-جومارت توقايەۆ ۆيدەو كونفەرەنسيا رەجيمىندە بۇۇ باس حاتشىسى انتونيۋ گۋتەرريشپەن كەزدەسۋ وتكىزدى.
كەلىسسوز بارىسىندا قازاقستاننىڭ بىرىككەن ۇلتتار ۇيىمىمەن اراداعى ىنتىماقتاستىعىنىڭ باسىم باعىتتارى تالقىلاندى. پاندەمياعا جانە كليماتتىڭ وزگەرۋىنە قارسى كۇرەسكە، سونداي-اق، وڭىرلىك قاۋىپسىزدىك پەن تۇراقتىلىقتى قامتاماسىز ەتۋ ءۇشىن كۇش جۇمىلدىرۋعا ەرەكشە نازار اۋدارىلدى. انتونيۋ گۋتەرريش كوروناۆيرۋس ىندەتىنە قارسى قازاقستاندىق ۆاكسينانىڭ ازىرلەمەسىن جانە جاپپاي ەكپە سالۋ ناۋقانىنىڭ تابىستى جۇرگىزىلىپ جاتقانىن، تەڭىزگە شىعاتىن جولى جوق دامۋشى ەلدەر توبىنا كىرەتىن مەملەكەتتەردىڭ مۇددەسىن قورعاۋعا باعىتتالعان قازاقستاننىڭ باستاماسىن قۇپتادى.
18 ماۋسىم
مەملەكەت باسشىسى كوروناۆيرۋس ىندەتىنە قارسى كۇرەسكە زور ۇلەس قوسقان مەديسينا قىزمەتكەرلەرىنە ارناپ تۇرعىزىلعان «التىن جۇرەك» ەسكەرتكىشىنىڭ اشىلۋ راسىمىنە قاتىستى.
ەسكەرتكىش ەلوردانىڭ سول جاعالاۋىندا الماتى مەن اقمەشىت كوشەلەرىنىڭ قيىلىسىنداعى جاڭا ساياباقتىڭ اۋماعىندا ورنالاسقان.
23 ماۋسىم
مەملەكەت باسشىسى وبلىستاردىڭ جانە رەسپۋبليكالىق ماڭىزى بار قالالاردىڭ اكىمدەرىمەن اۋىل اكىمدەرىن سايلاۋ ماسەلەلەرى جونىندە كەڭەس وتكىزدى.
جيىنعا پرەزيدەنت اكىمشىلىگى مەن ۇكىمەتتىڭ باسشىلىق قۇرامى دا قاتىستى. پرەزيدەنت الداعى سايلاۋ ناۋقانىنىڭ ماڭىزدى ەكەنىن اتاپ ءوتتى.
– وسى وقيعانى ەلىمىزدىڭ تاريحىنداعى ايتۋلى بەلەس دەپ ايتۋعا بولادى. نەگىزى، بۇل ءبىز ءۇشىن ستراتەگيالىق ءمانى ايرىقشا مىندەت. ازاماتتارىمىز تۇڭعىش رەت جەرگىلىكتى اتقارۋشى بيلىكتىڭ باسشىسىن تىكەلەي سايلاۋ مۇمكىندىگىنە يە بولماق. ءبىز بۇعان بىرتىندەپ، جوسپارلى تۇردە كەلدىك، – دەدى مەملەكەت باسشىسى.
30 ماۋسىم
قاسىم-جومارت توقايەۆ شۆەيساريانىڭ ىسكەرلىك توپتار وكىلدەرىمەن كەزدەسۋ وتكىزدى.
«قازاقستان تاۋەلسىزدىگىن العان ۋاقىتتان بەرى شۆەيساريا ەكونوميكامىزعا 30 ميلليارد دوللارعا جۋىق ينۆەستيسيا سالدى. ەكى مەملەكەت اراسىنداعى تاۋار اينالىمى، ءتىپتى، بىلتىرعى داعدارىس كەزىندە 1،7 ميلليارد دوللار بولدى»، – دەدى پرەزيدەنت. بۇگىندە قازاقستاندا شۆەيساريا كاپيتالىنىڭ قاتىسۋىمەن 400-دەن استام كاسىپورىن جۇمىس ىستەۋدە.
3 شىلدە
قازاقستان پرەزيدەنتى ەلوردا كۇنىنە وراي مەملەكەتتىك تۋ كوتەرۋ سالتاناتتى راسىمىنە قاتىستى. «بيىل قاستەرلى تاۋەلسىزدىگىمىزگە – 30 جىل. سوندىقتان بۇل ءراسىمنىڭ تاريحي ءمان- ماڭىزى ايرىقشا. كوك تۋىمىز – تاۋەلسىز قازاقستاننىڭ ەڭ باستى ءرامىزى. حالقىمىز ءۇشىن ازاتتىقتان اسىل، بايراقتان بيىك قۇندىلىق جوق. قازاقتىڭ تاريحى «تۋىڭ جىعىلماسىن!» دەگەن ءبىر اۋىز تىلەككە سىيىپ تۇر. بابالارىمىز قاشاندا تۋىن بيىك ۇستاعان. ەلدىگى سىنعا تۇسكەن ساتتە بايراق استىنا بىرىگىپ، تۇتاستىعىن تانىتقان. ەرلىك پەن بىرلىكتىڭ ءداستۇرى ۇرپاقتان-ۇرپاققا جالعاسىپ، تاۋەلسىزدىك داۋىرىنە ۇلاستى. ەگەمەن ەلدىڭ كوك بايراعى – مىزعىماس مەملەكەتتىگىمىزدىڭ بەلگىسى»، – دەدى مەملەكەت باسشىسى.
4 شىلدە
قاسىم-جومارت توقايەۆ قازاقستاندىقتاردى ۇلتتىق دومبىرا كۇنىمەن قۇتتىقتادى.
«بۇل – حالقىمىزدىڭ تامىرى تەرەڭدە جاتقان ءتول ونەرىن دارىپتەيتىن مەيرام. قازاق پەن دومبىرا – بىر-بىرىنەن بولە-جارۋعا بولمايتىن ەگىز ۇعىم. دومبىرا – كونە زاماننىڭ اڭىزدارىنا ارقاۋ بولعان كيەلى اسپاپ. «اقساق قۇلان» كۇيىنىڭ شىعۋ توركىنىن بىلمەيتىن قازاق كەمدە-كەم. ەجەلگى داۋىردەن جەتكەن قاستەرلى دومبىرا ۇرپاقتان-ۇرپاققا ميراس بولىپ كەلەدى. قازاق سان عاسىرلىق شەجىرەسىنىڭ كۋاسى بولعان قاسيەتتى اسپاپتى بويتۇمارىنا بالاعان. قازىرگى تىلمەن ايتساق، بۇل – ءبىزدىڭ ۇلتتىق برەندىمىز. ۇلتىمىزدىڭ رۋحىن كوتەرەتىن دومبىراعا ءار شاڭىراقتىڭ تورىندە ورىن بار. سەبەبى، دومبىرا – قازاقتىڭ جانى»، – دەدى پرەزيدەنت.
3 تامىز
«Alataý اqparat» مەدياحولدينگىنىڭ ۇجىمى قازاقستان رەسپۋبليكاسى تاۋەلسىزدىگىنىڭ 30 جىلدىعى، «ۆەچەرنيي Almaty» گازەتىنىڭ 85 جىلدىعى جانە «Almaty aqshamy» گازەتىنىڭ العاش شىعا باستاعان داتالى كۇنىنە وراي «اعاشتاردى ايالايىق» چەللەندجىن ۇيىمداستىردى. جۋرناليستەر مەكەمە اينالاسىنداعى جانە ءبىر جىل بۇرىن اباي داڭعىلىنىڭ بويىنا ءوزدەرى وتىرعىزعان جاسىل جەلەكتى سۋاردى، اينالاسىن قوقىستان تازارتتى. ءىس-شارا وڭتۇستىك استانانىڭ بارلىق مەكەمەلەرى قىزمەتكەرلەرىن وزدەرىنە قاراستى جانە جاقىن ماڭداعى اعاشتارعا قامقورلىق جاساۋعا، سونداي-اق، ەكولوگيالىق تازالىقتى ساقتاۋعا شاقىرۋدى كوزدەدى. ىزگى باستامانى جالعاستىرۋ اماناتى قازاقستان جۋرناليستەر وداعىنا، «قازاق ءۇنى» مەن «نوۆوە پوكولەنيە» گازەتتەرىنە جولداندى. قازاقستان جۋرناليستەر وداعى باسقارماسىنىڭ ءتوراعاسى سەيىتقازى ماتايەۆ چەللەندجدى قازاقستاننىڭ حالىق جازۋشىسى ولجاس سۇلەيمەنوۆكە جولدادى.
17 تامىز
مەملەكەت باسشىسى قاسىم-جومارت توقايەۆ سەۋلدەگى كيبەر ۋنيۆەرسيتەتتىڭ اۋماعىنا ورناتىلعان ۇلى اباي ءبيۋستىنىڭ اشىلۋ سالتاناتىنا قاتىستى.
– سەۋل تورىندە قازاق حالقىنىڭ ۇلى پەرزەنتى، اقىن اباي قۇنانباي ۇلىنىڭ ءبيۋستى ورناتىلدى. بۇل – كورەي باۋىرلارىمىزدىڭ قازاق حالقىنا دەگەن زور قۇرمەتىنىڭ بەلگىسى، – دەدى قازاقستان پرەزيدەنتى. ءبيۋستتىڭ جوباسى قازاقستاندا دايىندالىپ، تۇتاس ءمۇسىنى كورەيادا قولادان قۇيىلعان.
21 تامىز
نۇر-سۇلتاندا قوعام جانە مەملەكەت قايراتكەرى جۇمابەك تاشەنيەۆكە ەڭسەلى ەسكەرتكىش اشىلدى.
ەسكەرتكىش قارۋلى كۇشتەردىڭ ۇلتتىق اسكەري-پاتريوتتىق ورتالىعى عيماراتىنىڭ الدىنداعى الاڭدا،تاشەنيەۆ كوشەسىندە ورنالاسقان.
30 تامىز
قاسىم-جومارت توقايەۆتىڭ اتىنا اقش پرەزيدەنتى دجوزەف بايدەننەن حات كەلدى.
دجوزەف بايدەن سەمەي يادرولىق پوليگونىنىڭ جابىلعانىنا وتىز جىل تولۋىنا وراي قۇتتىقتاۋىن جەتكىزگەن. «29 تامىز كۇنى سەمەي يادرولىق پوليگونىنىڭ جابىلعانىنا 30 جىل تولۋىنا وراي امەريكا قۇراما شتاتتارىنىڭ اتىنان قازاقستان رەسپۋبليكاسىنىڭ حالقىنا ەڭ ىزگى قۇتتىقتاۋىمدى بىلدىرگىم كەلەدى. امەريكا قۇراما شاتتارى بۇرىنعى سىناق پوليگونى ايماعىن قالپىنا كەلتىرۋ مەن ونىڭ قاۋىپسىزدىگىن قامتاماسىز ەتۋ بويىنشا ءسىزدىڭ ۇكىمەتىڭىزبەن اراداعى جالعاسىپ جاتقان ىنتىماقتاستىقتى قوسا العاندا، قازاقستانمەن بەرىك سەرىكتەستىگىن نىعايتا بەرمەك. امەريكا قۇراما شتاتتارى قازاقستاننىڭ تاۋەلسىزدىك العان العاشقى كۇنىنەن باستاپ سەمەي ايماعىندا ارىپتەستىك قارىم-قاتىناستا جۇمىستار اتقارىپ كەلەدى»، – دەپ جازدى اقش پرەزيدەنتى.
1 قىركۇيەك
2021 جىلدىڭ 1 قىركۇيەگى مەن 30 قازانى ارالىعىندا «قازاقستاندا اركىم ماڭىزدى!» ۇرانىمەن ەلىمىزدە جالپىۇلتتىق حالىق ساناعى ونلاين جانە وفلاين فورماتتا ءوتتى.
ونىڭ العاشقى ءناتيجەلەرى دە كۇنى كەشە عانا بەلگىلى بولدى. پرەمەر- مينيستر اسقار ءماميننىڭ مالىمەتى بويىنشا، قازاقستاندىقتاردىڭ جالپى سانى – 19 169 550 ادام. وتانداستارىمىزدىڭ 48،71 پايىزى – ەرلەر، 51،29 پايىزى – ايەلدەر. قازاقستان حالقىنىڭ ورتا جاسى 31،94 جاس دەپ كورسەتىلگەن. جالپى حالىقتىڭ 33،97 پايىزى – 17 جاسقا دەيىنگى بالالار، 19،72 پايىزى – 14–28 جاس ارالىعىنداعى جاستار. ەلىمىزدەگى قازاقتاردىڭ ۇلەسى – 70،18 پايىزعا جەتكەن.
حالىقتىڭ 59،05 پايىزى، ياعني 11 320 410 ادام ەڭبەككە جارامدى دەپ تانىلعان.
30 قىركۇيەك
قازاقستان مەن رەسەيدىڭ XVII ءوڭىرارالىق ىنتىماقتاستىق فورۋمى ءوتتى.
پرەزيدەنت ايتقانداي، قازاقستاندا 7500-دەن استام رەسەيلىك جانە 3500-گە جۋىق بىرلەسكەن كاسىپورىن تابىستى جۇمىس ىستەپ جاتىر. ىنتىماقتاستىق ورناتقان ۋاقىتتان بەرى فورۋم اياسىندا 200-گە جۋىق كەلىسىم مەن شارتقا قول قويىلدى. وسى كەزەڭدە تاۋار اينالىمى 3،5 ەسەگە ءوسىپ، 19 ميلليارد دوللارعا جەتتى. رەسەيدەن تارتىلعان تىكەلەي ينۆەستيسيانىڭ كولەمى سوڭعى 15 جىلدا 16 ميلليارد دوللاردان استى. ءوز كەزەگىندە رەسەيگە سالىنعان قازاقستاندىق ينۆەستيسيانىڭ كولەمى 4،5 ميلليارد دوللارعا جۋىقتادى. ەلدەرىمىز اراسىنداعى ءىس-قيمىلدار ەكونوميكانىڭ بارلىق سالاسى: ونەركاسىپ، اۋىل شارۋاشىلىعى جانە ينفراقۇرىلىم باعىتتارى بويىنشا جۇرگىزىلۋدە.
1 قازان
قازاق حالقىنىڭ رۋحاني تىرەگى، ۇلتتىڭ ءۇنى – قازاق راديوسىنىڭ حابار تاراتا باستاعانىنا 100 جىل، «شالقار» راديوسىنا – 55 جىل تولدى. قازاق راديوسى 1921 جىلعى 1 قازاندا العاش حابار تاراتتى. وسىعان وراي، مەملەكەت باسشىسى قاسىم-جومارت توقايەۆ 1 قازاندى راديو قىزمەتكەرلەرى كۇنى دەپ جاريالاۋدى ۇسىندى. پرەزيدەنت ۇسىنىسىمەن 13 تامىزدا ق ر ۇكىمەتىنىڭ قاۋلىسى شىقتى.
4 قازان
قاسىم-جومارت توقايەۆتىڭ جامبىل وبلىسىنا جۇمىس ساپارى قورداي اۋدانىنداعى بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنا قاراستى QazVac ۆاكسيناسىن شىعاراتىن بيوفارماسيەۆتيكا زاۋىتىنىڭ قىزمەتىمەن تانىسۋدان باستالدى.
زاۋىت وندىرىستىك تاجىريبە بويىنشا حالىقارالىق ستاندارتتارعا (GMP) ساي كەلەتىن يممۋنوبيولوگيالىق دارى-دارمەكتەر، ونىڭ ىشىندە كوروناۆيرۋس ىندەتىنە قارسى ۆاكسينا، تۇماۋعا، تۋبەركۋلەزگە، برۋسەللەزگە، نودۋليارلى دەرماتيتكە جانە باسقا دا جۇقپالى اۋرۋلارعا قارسى ۆاكسينالار شىعاراتىن بولادى. جىلىنا بيوفارماسيەۆتيكا پرەپاراتتارىنىڭ 30-دان 60 ميلليونعا دەيىن دوزاسىن ازىرلەۋ جوسپارلانىپ وتىر. جوبانىڭ جالپى قۇنى – 15،6 ميلليارد تەڭگە. 16 قىركۇيەك كۇنى 100 مىڭ دوزا كولەمىندە ۆاكسينا قۇيۋ ءوندىرىسى ىسكە قوسىلعانى تۋرالى مالىمەت بەرىلدى. «بارشاڭىزدى قۇتتىقتايمىن. شىن ءمانىندە، بۇل – ۇلكەن جەتىستىك. ەلىمىز ءۇشىن قاجەتتى ءوندىرىس. نەگىزگى جۇمىس ورىندالدى.
ءبارى دۇرىس. كەلەسى جىلى وسى جۇمىستى جالعاستىرامىز. ۆاكسينا وتە ءتيىمدى. گۋمانيتارلىق كومەك رەتىندە بۇل ۆاكسينانى اۋعانستانعا جانە باسقا دا مۇسىلمان ەلدەرىنە جىبەرەمىز. ۆاكسينامىز دۇنيە جۇزىندە مويىندالىپ جاتىر. سوندىقتان بارشاڭىزدى قۇتتىقتايمىن! ريزاشىلىعىمدى ءبىلدىرەمىن. بۇل – وتە كۇردەلى پروسەسس، ءوندىرىس. شىن مانىندە، دۇنيە جۇزىندە، شەت ەلدە مۇنداي ءوندىرىس جاساۋ ءۇشىن ءۇش-تورت جىل كەتەدى. ءبىز توعىز ايدىڭ ىشىندە جۇمىستى ورىندادىق. سوندىقتان ەڭبەكتەرىڭىز مەملەكەت تاراپىنان جوعارى باعالانادى»، – دەدى قاسىم-جومارت توقايەۆ.
14 قازان
تاۋەلسىزدىكتىڭ 30 جىلدىعى قارساڭىندا الاش رۋحى بيىككە كوتەرىلدى. الماتى قالاسىنىڭ اكىمى باقىتجان ساعىنتايەۆ ۇلتتىڭ ۇلى ۇستازى، كورنەكتى اعارتۋشى احمەت بايتۇرسىنوۆتىڭ تاريحي-مادەني مۇراسىن ساقتاۋ ماقساتىندا ءتيىستى شەشىم قابىلدادى. «Almaty aqshamy» گازەتىندە تالاي رەت كوتەرىلىپ، جازىلعان ماسەلە – احمەت بايتۇرسىن ۇلىنىڭ مۋزەي-ۇيى قالا مەنشىگىنە الىندى. «كەلەر جىلى كورنەكتى اعارتۋشى ا.بايتۇرسىنوۆتىڭ تۋعانىنا 150 جىل تولادى. مەرەيتويعا دايىندىق بارىسىندا قوعام قايراتكەرى تۇرعان ءمۇراجاي-ۇيدى قالا مەنشىگىنە قايتاردىق. ونىڭ مۇراسى ماڭگىلىك ساقتالادى»، – دەدى ب.ساعىنتايەۆ.
20 قازان
مەملەكەت باسشىسى قاراعاندى وبلىسىنا جۇمىس ساپارى اياسىندا ۇلىتاۋ اۋدانىنداعى «جوشى حان» تاريحي-مادەني كەشەنىن ارالاپ كوردى.
پرەزيدەنتكە جوشى حان كەسەنەسى، مۇراجاي، جوشى حان ەسكەرتكىشى، جورىق شاتىرى جانە قوناقۇيدەن تۇراتىن كەشەننىڭ زاماناۋي تەحنولوگيالىق مۇمكىندىكتەرى مەن قورداعى قۇندى جادىگەرلەر تانىستىرىلدى. مەملەكەت باسشىسى قاسيەتتى تاريحي نىساننىڭ ۇنەمى عالىمداردىڭ نازارىندا بولىپ، عىلىمي اينالىمعا ءتۇسۋى كەرەك ەكەنىنە باسا ءمان بەردى.
12 قاراشا
قاسىم-جومارت توقايەۆ تۇركىتىلدەس مەملەكەتتەردىڭ ىنتىماقتاستىق كەڭەسىنىڭ VIII سامميتىنە قاتىستى.
تۇركىتىلدەس مەملەكەتتەردىڭ ىنتىماقتاستىق كەڭەسىنىڭ VIII ءسامميتى ىستامبۇل قالاسىنىڭ وڭتۇستىك-شىعىسىندا ءمارمار تەڭىزىندە ورنالاسقان دەموكراتيا جانە بوستاندىق ارالىندا ءوتتى. سامميت قورىتىندىسى بويىنشا ءبىرقاتار قۇجاتتارعا قول قويىلدى. «تۇركىتىلدەس مەملەكەتتەردىڭ ىنتىماقتاستىق كەڭەسىنىڭ» اتاۋىن «تۇركى مەملەكەتتەرى ۇيىمى» اتاۋىنا وزگەرتۋ تۋرالى شەشىم قابىلداندى.
29 قاراشا
قاسىم-جومارت توقايەۆتىڭ شۆەيساريا كونفەدەراسياسىنا رەسمي ساپارى اياسىندا ددسۇ باس ديرەكتورى تەدروس ادحانوم گەبرەيەسۋسپەن كەزدەستى.
اڭگىمە بارىسىندا قازاقستان مەن ددسۇ اراسىنداعى ىقپالداستىقتىڭ وزەكتى ماسەلەلەرى مەن پەرسپەكتيۆالارى تالقىلاندى. مەملەكەت باسشىسى باس ديرەكتورعا ەلىمىزدىڭ پاندەمياعا قارسى ءىس-قيمىلدار جونىندە قابىلداپ جاتقان شارالارى، ونىڭ ىشىندە قازاقستاندىق عالىمداردىڭ كوروناۆيرۋسقا قارسى ازىرلەگەن پرەپاراتتارى مەن حالىققا جاپپاي ۆاكسينا سالۋ جۇمىستارىنىڭ جۇرگىزىلۋ بارىسى تۋرالى مالىمەت بەردى. ەكىنشى جاڭا QazCoVac-P ۆاكسيناسى تۋرالى ايتتى. اتالعان پرەپارات كلينيكالىق زەرتتەۋلەر فازاسىنا كانديدات ۆاكسينالار تىزىمىنە ەنگىزىلدى. پرەزيدەنت قازاقستاندىق ۆاكسيناعا قولداۋ كورسەتكەنى ءۇشىن ددسۇ باسشىسىنا العىس ايتتى.