ءقازىر ءبىز ەل دامۋىنىڭ شەشۋشى كەزەڭىنە قادام باستىق. مەملەكەتتىك اپپارات ءبىرتۇتاس قۇرىلىم رەتىندە جۇمىس ىستەۋگە مىندەتتى. سولاي بولعان جاعدايدا عانا ءبىز كوزدەگەن ماقساتتارىمىزعا قول جەتكىزەمىز. مىقتى مەملەكەت بولۋ ءۇشىن ۇلتتىڭ ۇيىسا ءبىلۋى ايرىقشا ماڭىزدى.
قاسىم-جومارت توقايەۆ.
2020 جىلدىڭ باستى وقيعالارى
- 2020 جىل – ەرىكتىلەر جىلى. پرايمەريز.
- ۇلى ابايدىڭ 175، ءال-فارابيدىڭ – 1150، التىن وردانىڭ 750 جىلدىق مەرەيتويلارى، ۇلى وتان سوعىسىنداعى جەڭىستىڭ 75 جىلدىعى.
- ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ قۇرىلۋى
- زەينەتاقى جيناعىن مەرزىمىنەن بۇرىن باسپانا ساتىپ الۋعا جانە ەمدەلۋگە جۇمساۋعا مۇمكىندىك بەرۋ جونىندەگى شەشىم
- COVID-19 كوروناۆيرۋس ينفەكسياسىمەن كۇرەس. ەلىمىزدە توتەنشە جاعدايدىڭ ەنگىزىلۋى.بلوكبەكەكتتەر. قازاقستاندىق ۆاكسينا.
وتكەن 2019 جىل ەلىمىز ءۇشىن اسا ماڭىزدى وقيعالارعا تولى بولدى. ءوز وكىلەتتىگىن توقتاتقان تۇڭعىش پرەزيدەنت – ەلباسى نۇرسۇلتان نازاربايەۆتىڭ ستراتەگيالىق جولى ساقتالاتىندىعىن مالىمدەگەن جاڭادان سايلانعان مەملەكەت باسشىسى قاسىم-جومارت توقايەۆ ۇسىنعان «حالىق ۇنىنە قۇلاق اساتىن مەملەكەت» تۇجىرىمداماسى ەل دامۋىنا جاڭا سەرپىن اكەلدى. قازاقستان ءۇشىن تاريحي دامۋدىڭ جاڭا كەزەڭى باستالدى. حالىق پەن بيلىك اراسىنداعى ديالوگتى كۇشەيتۋ ءۇشىن ماڭىزدى رەفورمالار ۇسىنىلدى. جاڭا پرەزيدەنت الەۋمەتتىك جاعدايى تومەن ادامدارعا قولداۋ كورسەتۋ ءۇشىن بۇرىن-سوڭدى بولماعان بىرەگەي شەشىم قابىلدادى. سونىڭ ارقاسىندا 500 مىڭنان استام بورىشكەردىڭ قارىزى ايتارلىقتاي ازايدى. بيۋدجەت سالاسى قىزمەتكەرلەرىنىڭ جالاقىسى، زەينەتاقى، جاردەماق جانە ستۋدەنتتەردىڭ ستيپەندياسىن كوبەيەتىن بولدى.شاعىن جانە ورتا بيزنەستى قولداۋ ءۇشىن تەڭدەسسىز شارالار قابىلداندى. جاڭا جۇمىس ورىندارى اشىلاتىن بولدى. جاھاندىق تۇراقسىزدىققا قاراماستان ەل ەكونوميكاسى ورنىقتى دامۋ جولىنا ءتۇستى. 2020 جىلى قازاقستاندىقتاردىڭ تۇرمىس ساپاسىن جاقسارتۋ جولىندا ناقتى شارالار قولعا الىندى. Nur Otan پارتياسى حالىقارالىق تاجىربيەدە مويىندالعان پارتياىشىلىك ىرىكتەۋ ءتاسىلى – پرايمەريزدى ەلىمىزدە قولدانىسقا ەنگىزدى.
2020 جىل – ەرىكتىلەر جىلى دەپ جاريالاندى. بۇل جىلى دا تاريحي اتاۋلى داتالار مەن ەلەۋلى وقيعالار از بولعان جوق. مەملەكەتتىك ەگەمەندىك تۋرالى دەكلاراسيانىڭ قابىلدانۋىنىڭ 30 جىلدىعى، قازاقستان كونستيتۋسياسىنىڭ 25 جىلدىعى، الەم مادەنيەتىنىڭ تاسقا تاڭبالانعان ماڭىزدى قۇندىلىعى – تونىكوك ەسكەرتكىشىنىڭ 1300 جىلدىعى، قازاقتىڭ باس اقىنى، ۇلى ھاكىم ابايدىڭ – 175 ، ادامزاتتىڭ اقىل-ويىنىڭ شامشىراعى ءال-فارابيدىڭ – 1150، التىن وردانىڭ 750 جىلدىق مەرەيتويلارى، ۇلى وتان سوعىسىنداعى جەڭىستىڭ 75 جىلدىعى، قازاقستان حالقى اسسامبلەياسىنىڭ قۇرىلۋىنىڭ شيرەك عاسىرلىق مەرەكەسى – مىنە وسى داتالارعا وراي ءىس-شارالاردىڭ بارلىعىن ىسىراپشىلدىققا جول بەرمەي، مازمۇندى وي تۋدىراتىن دەڭگەيدە وتكىزۋ جوسپارلاندى.
الايدا، 2020 جىلعا جوسپارلانعان ساياسي-ەكونوميكالىق، مادەني-رۋحاني، مەرەكەلىك ءىس-شارالاردىڭ بارلىعىنا دەرلىك شەكتەۋ قويۋعا تۋرا كەلدى. ادامزات بالاسى باستاۋىن جۇڭگو ەلىنەن الىپ، الەمدى شارپىعان الاپات ۆيرۋستىڭ قۇرساۋىندا قالدى. ءقاۋىپتى ىندەتپەن جاھاندىق كۇرەس باستالدى. بۇل كۇرەستە سىن-قاتەرلەر از بولعان جوق.
ەل بيلىگىنە شۇعىل شارالار قولدانۋعا، قاۋىرت قيمىلدار مەن ىس-ارەكەتتەرگە بارۋعا تۋرا كەلدى. كوروناۆيرۋس ينفەكسياسىنىڭ جىلدام ورشۋىنە بايلانىستى سانەپيداحۋالعا قاتاڭ باقىلاۋ كۇشەيتىلدى. جۇڭگو ەلىندەگى قازاقستان ازاماتتارىن ەلگە جەتكىزۋگە شەشىم قابىلداندى. ناۋرىز ايىنىڭ 13-ىندە ەلىمىزدە COVID-19 ينفەكسياسىنىڭ العاشقى جاعدايى تىركەلدى. ال، 20-ناۋرىزدان باستاپ كوروناۆيرۋستىڭ ۋشىعۋىنا بايلانىستى تاۋەلسىز قازاقستان تاريحىندا العاش رەت ەلىمىزدە توتەنشە جاعداي ەنگىزىلدى. قالاارالىق كولىك قوزعالىسى جابىلىپ، مەملەكەتتىك شەكارادان وتۋگە شەكتەۋ قويىلدى. ءساۋىر ايىندا مەملەكەت پاندەميا سالدارىنان كىرىسىن جوعالتقاندارعا 42500 تەڭگەدەن الەۋمەتتىك تولەمدەر تولەي باستادى. وسى ايدان باستاپ وقۋشىلار قاشىقتان وقۋعا كوشىرىلدى. وتاندىق تەلەارنالاردا مەكتەپ وقۋشىلارى ءۇشىن قوسىمشا بەينەساباقتار ۇيىمداستىرىلدى. 11 مامىردان ەلىمىزدە توتەنشە جاعداي توقتاتىلعانىمەن، كارانتيندىك شەكتەۋ شارالارى ساقتالىپ قالدى. بۇقارالىق ءىس-شارالارعا تىيىم سالىندى.
بارلىق ويىن-ساۋىق ورىندارى دا جابىلدى. شىلدە ايىنان قازاقستاندا لوكداۋن رەجيمى جۇمىس ىستەي باستادى. ايماقتار اراسىنداعى اۆتوبۋس قوزعالىسى توقتاتىلدى. ءقاۋىپتى ىندەتتەن قايتىس بولعاندار ءۇشىن 13 شىلدە ۇلتتىق ازا تۇتۋ كۇنى بولىپ جاريالاندى. 17 تامىزدا ەلدە كارانتين جەڭىلدەتىلىپ، بۇرىن جابىلعان كەيبىر نىساندارعا جۇمىس ىستەۋگە رۇقسات بەرىلگەنىمەن، دەمالىس كۇندەرى لوكداۋن جانە بەتپەردە تاعۋ رەجيمى قاتاڭ ساقتالدى. جاڭا وقۋ جىلى باستالعان قىركۇيەك ايىنان باستاپ مەكتەپتەر مەن جوعارى ءبىلىم بەرۋ ورىندارىندا، كاسىپورىندار مەن مەكەمەلەردە، جالپى قوعامدا قاشىقتان وقۋ، ونلاين جۇمىس تەرميندەرى قالىپتاستى. قازان ايىندا زەينەتاقى جيناعىن ەمدەلۋگە جانە باسپانا ساتىپ الۋعا جۇمساۋعا مۇمكىندىك بەرىلەتىنى، وعان كىم ءۇمىت ارتا الاتىنى جونىندە اڭگىمە قوزعالدى. جەلتوقساندا بوكستان ورتا سالماقتاعى IBF جانە IBO تۇجىرىمدارى بوي̆ىنشا الەم چەمپيونى قازاقستاندىق بوكسشى گەنناديي̆ گولوۆكين پولياك كاميل شەرەمەتامەن جۇدىرىقتاسىپ، تيتۋلدارىن 21-رەت قورعاپ قالىپ، جاڭا رەكورد ورناتتى. شەرەمەتا ءتورتىنشى رەت نوكداۋنعا تۇسكەننەن كەيىن كەزدەسۋدى جالعاستىرۋدان باس تارتتى. قازاقستاندىق بوكسشى تەحنيكالىق نوكاۋتپەن جەڭىسكە جەتتى.
تاعى ءبىر اقجولتاي اقپارات، ەگەر بجزق-دا قاراجات جيناعانداردىڭ زەينەتاقىسى جەتكىلىكتىلىك شەگىنەن اسىپ تۇرسا، ونىڭ ارتىعىن الىپ الۋعا بولاتىنى كوپتەگەن قازاقستاندىقتار ءۇشىن جاقسى جاڭالىق ەدى. قاراشا ايىندا ديدجەي يمانبەك زەيكەنوۆ تاريحقا گرەمميگە ۇسىنىلعان العاشقى قازاقستاندىق رەتىندە ەندى. ول Billboard جىل سايىنعى كەستەسىندە Black Eyed Peas، J Balvin، Lady Gaga جانە Kygo-نى باسىپ وزىپ، ءبىرىنشى ورىنعا شىقتى.
4 قاڭتار
قاسىم-جومارت توقايەۆ پرەزيدەنت اكىمشىلىگى باسشىلىعىمەن 2020 جىلعى جۇمىستاردىڭ باسىم باعىتتارى جونىندە جيىن وتكىزدى. جيىندا ەلىمىزدىڭ الەۋمەتتىك-ەكونوميكالىق، قوعامدىق-ساياسي دامۋى مەن سىرتقى ساياسات جونىندەگى ماسەلەلەرى تالقىلاندى. 2020 جىلعا جوسپارلانعان نەگىزگى ءىس-شارالار تىزبەسى قارالدى. ابايدىڭ 175 جىلدىعى مەن ءال-فارابيدىڭ 1150 جىلدىعىن اتاپ ءوتۋدى ۇيىمداستىرۋ شارالارى دا پىسىقتالدى.
21 قاڭتار
مەملەكەت باسشىسى قاسىم-جومارت توقايەۆ پەن قازاقستاننىڭ تۇڭعىش پرەزيدەنتى – ەلباسى نۇرسۇلتان نازاربايەۆ قازاقتىڭ ۇلى ويشىلى، عۇلاما اقىن اباي قۇنانباي ۇلىنىڭ 175 جىلدىق مەرەيتويىنىڭ باستالۋىنا ارنالعان سالتاناتتى شاراعا قاتىستى.
27 قاڭتار
قاسىم-جومارت توقايەۆ بىرىككەن اراب امىرلىكتەرىنىڭ ىسكەر توپتارى وكىلدەرىنىڭ قاتىسۋىمەن وتكەن دوڭگەلەك ۇستەلدە قازاقستاننىڭ ەكونوميكالىق جانە ينۆەستيسيالىق الەۋەتى تۋرالى ايتتى. «قازاقستاندا بىرىككەن اراب امىرلىكتەرىنىڭ 350-گە جۋىق زاڭدى تۇلعالارى، فيليالدارى مەن وكىلدىكتەرى تابىستى جۇمىس ىستەيدى. بىرلەسكەن ينۆەستيسيالىق جوبالاردى جۇزەگە اسىرۋ جونىندە قۇنى 11 ميلليارد دوللار بولاتىن اۋقىمدى جوسپار بار»، – دەدى پرەزيدەنت.
28 قاڭتار
قازاقستان پرەزيدەنتى بىرىككەن اراب امىرلىكتەرىنىڭ ۆيسە-پرەزيدەنتى، پرەمەر-مينيسترى، دۋباي بيلەۋشىسى شەيح مۇحاممەد بەن راشيد ءال ماكتۋممەن كەزدەستى. ەكى ەلدىڭ وڭىرلىك جانە جاھاندىق دەڭگەيدەگى سەرىكتەستىك ماسەلەلەرى تالقىلاندى.
29 قاڭتار
الماتىدا ءابۋ ناسىر ءال-فارابيدىڭ مەرەيتويىنىڭ باستالۋىنا ارنالعان سالتاناتتى شارا ءوتتى.
2 اقپان
قاسىم-جومارت توقايەۆ «اقوردا» رەزيدەنسياسىندا نۇر-سۇلتان قالاسىنا رەسمي ساپارمەن كەلگەن اقش-تىڭ مەملەكەتتىك حاتشىسى مايكل پومپەونى قابىلدادى. «امەريكا قۇراما شتاتتارى – قازاقستاننىڭ تاۋەلسىزدىگىن العاشقىلاردىڭ ءبىرى بولىپ مويىنداعان ەل. ءبىز بۇل تاريحي فاكتىنى ۇنەمى ەسىمىزدە ۇستايمىز. مەملەكەتتەرىمىز اراسىندا كوپتەگەن باعىت بويىنشا، ونىڭ ىشىندە، يادرولىق قارۋدى تاراتپاۋ، حالىقارالىق تەرروريزممەن كۇرەس جانە ەكونوميكالىق ىنتىماقتاستىق سەكىلدى سالالاردا تىعىز قارىم-قاتىناس ورناعان. سونىمەن قاتار ءوزارا ىقپالداستىعىمىزدى ودان ءارى دامىتۋ ماقساتىندا پايدالانۋعا بولاتىن الەۋەتىمىز دە بار»، – دەدى قازاقستان پرەزيدەنتى.
12 اقپان
مەملەكەت باسشىسى «Birgemiz» اتتى رەسپۋبليكالىق ۆولونتەرلەر ءفرونت-وفيسىنىڭ اشىلۋ راسىمىنە قاتىستى. «Qazvolunteەr.kz» ونلاين-پلاتفورماسىنىڭ جۇمىسىمەن تانىستى.
15 ناۋرىز
قازاقستان رەسپۋبليكاسىندا توتەنشە جاعدايدى ەنگىزۋ تۋرالى پرەزيدەنت جارلىعى جاريالاندى (2020 جىلعى 15 ناۋرىز، № 285). سوعان سايكەس قازاقستان رەسپۋبليكاسىنىڭ بارلىق اۋماعىندا 2020 جىلعى 16 ناۋرىزداعى 08 ساعات 00 مينۋت پەن 2020 جىلعى 15 ساۋىردەگى 07 ساعات 00 مينۋت كەزەڭىندە توتەنشە جاعداي ەنگىزىلدى.
25 ناۋرىز
قازاقستان پرەزيدەنتى ۇلتتىق بيوتەحنولوگيا ورتالىعىنا بارىپ، وتاندىق عالىمداردىڭ زەرتتەۋ جۇمىستارىمەن تانىستى. ورتالىق قىزمەتكەرلەرى مەملەكەت باسشىسىنا دنق جاساندى سينتەز جولىمەن ازىرلەنگەن جانە جۇقپالى كوروناۆيرۋس اۋرۋىنىڭ جاڭا ءتۇرىن جىلدام انىقتاۋعا مۇمكىندىك بەرەتىن پوليمەرازدى تىزبەكتى رەاكسيا (پسر) نەگىزىندەگى تەست جۇيەسىن تانىستىردى.
10 ءساۋىر
مەملەكەت باسشىسى قاسىم-جومارت توقايەۆ بەينەكونفەرەنسيا فورماتىندا «سوVID-19 پاندەمياسىمەن كۇرەسۋدەگى نيەتتەستىك جانە ىنتىماقتاستىق» تاقىرىبىندا وتكەن تۇركى تىلدەس مەملەكەتتەرى ىنتىماقتاستىق كەڭەسىنىڭ (تتمىك) توتەنشە سامميتىنە قاتىستى.
14 ءساۋىر
قازاقستان پرەزيدەنتى قاسىم-جومارت توقايەۆ بەينەكونفەرەنسيا فورماتىندا وتكەن جوعارى ەۋرازيالىق ەكونوميكالىق كەڭەستىڭ جۇمىس ماجىلىسىنە قاتىستى.
جيىننىڭ كۇن تارتىبىندە كوروناۆيرۋس ىندەتىنىڭ تارالۋىن بولدىرماۋ جانە ەۋرازيالىق ەكونوميكالىق وداققا مۇشە ەلدەردىڭ ەكونوميكالىق تۇراقتىلىعىن قامتاماسىز ەتۋ ماسەلەلەرى قاراستىرىلدى.
27 ءساۋىر
مەملەكەت باسشىسى قاسىم-جومارت توقايەۆ مالىمدەمە جاسادى. ەلىمىزدەگى احۋالعا بايلانىستى جانە مەملەكەتتىك كوميسسيانىڭ ۇسىنىسىنا وراي توتەنشە جاعداي رەجيمى 2020 جىلعى 11 مامىرعا دەيىن ۇزارتىلدى.
27 مامىر
ۇلتتىق قوعامدىق سەنىم كەڭەسىنىڭ ءۇشىنشى وتىرىسى ءوتتى. قاسىم-جومارت توقايەۆ ءوز سوزىندە «قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» جاڭا زاڭعا قول قويعانىن اتاپ ءوتتى. اتالعان زاڭ بويىنشا جيىن وتكىزۋدىڭ الدىن الا ەسكەرتۋ قاعيداتى ەنگىزىلدى. جاڭا زاڭ ازاماتتاردىڭ بەيبىت جيىندار وتكىزۋگە كونستيتۋسيالىق قۇقىعىن تولىق قامتاماسىز ەتەدى.
29 مامىر
مەملەكەت باسشىسى قاسىم-جومارت توقايەۆ ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە وراي ۇندەۋ جاسادى. پرەزيدەنت تاريحي ادىلدىكتى قالپىنا كەلتىرۋ جۇمىستارىن اياقتاپ، ساياسي قۋعىن-سۇرگىن قۇرباندارىن اقتاۋ ءۇشىن ارنايى مەملەكەتتىك كوميسسيا قۇرۋدى تاپسىردى.
13 شىلدە
مەملەكەت باسشىسىنىڭ وكىمىمەن 13 شىلدە – جالپىۇلتتىق ازا تۇتۋ كۇنى بولىپ بەلگىلەندى. وسىعان وراي تۇنگى ساعات 00:00-دەن باستاپ ەلىمىزدەگى بارلىق مەملەكەتتىك تۋ تومەن ءتۇسىرىلدى. قازاقستاندىقتار نۇر-سۇلتان قالاسىنىڭ ۋاقىتىمەن ساعات 12:00-دە رەسپۋبليكا بويىنشا كوروناۆيرۋس پاندەمياسىنىڭ قۇرباندارىن ءبىر مينۋت ۇنسىزدىكپەن ەسكە الدى.
1 قىركۇيەك
قازاقستان پرەزيدەنتى قاسىم-جومارت توقايەۆ پارلامەنت پالاتالارىنىڭ بىرلەسكەن وتىرىسىندا «جاڭا جاعدايداعى قازاقستان: ءىس-قيمىل كەزەڭى» اتتى جولداۋىن جاريالاپ، ەلىمىزدى ودان ءارى دامىتۋ ستراتەگياسىمەن تانىستىردى.
25 قىركۇيەك
قازاقستان پرەزيدەنتىنىڭ الماتىعا جاساعان جۇمىس ساپارى ي.جەكەنوۆا اتىنداعى قالالىق كلينيكالىق جۇقپالى اۋرۋلار اۋرۋحاناسىنىڭ جاڭا فيليالىنا بارۋدان باستالدى.قاسىم-جومارت توقايەۆ 500 ادامعا ستاسيونارلىق مەديسينالىق جاردەم بەرۋگە ارنالعان جانە زاماناۋي قۇرىلعىلارمەن جابدىقتالعان پالاتالاردى ارالاپ كوردى.
21 قازان
پرەزيدەنت قاسىم-جومارت توقايەۆتىڭ توراعالىعىمەن «اقوردا» رەزيدەنسياسىندا رەفورمالار جونىندەگى جوعارى كەڭەستىڭ ءبىرىنشى وتىرىسى ءوتتى.
9 قاراشا
مەملەكەت باسشىسى قازاق ءالىپبيىن لاتىن گرافيكاسىنا كوشىرۋ ماسەلەسى بويىنشا كەڭەس وتكىزدى. جەتىلدىرىلگەن ءالىپبي حالقىمىزدىڭ جازۋ داستۇرىندە ورنىققان «ءبىر دىبىس – ءبىر ءارىپ» پرينسيپىنە تولىق سايكەس كەلەدى، ديگرافتار، ياعني ءبىر دىبىستى ەكى نەمەسە ودان كوپ تاڭبامەن بەلگىلەۋ ءپرينسيپى قولدانىلمايدى. بۇل ءالىپبي جوباسىندا قازاق ءتىلىنىڭ 28 دىبىسى تولىق قامتىلعان.
8 جەلتوقسان
مەملەكەت باسشىسى ۆولونتەر جىلىنىڭ رەسمي جابىلۋ راسىمىنە قاتىستى. قاسىم-جومارت توقايەۆ جيىنعا قاتىسۋشىلار الدىندا سويلەگەن سوزىندە ۆولونتەر جىلىنىڭ تابىستى بولعانىن اتاپ ءوتتى. ونىڭ ايتۋىنشا، بۇل جىل ءبىزدىڭ ەلىمىزدە عانا ەمەس، بۇكىل الەم تاريحىندا اسا كۇردەلى كەزەڭدەردىڭ ءبىرى بولعانىنا قاراماستان، «قايىرىمدى ىستەر» جالپىۇلتتىق يدەياسى ون مىڭداعان قازاقستاندىقتىڭ قايىرىمدىلىعى مەن جاناشىرلىعىنىڭ ارقاسىندا ءومىر شىندىعىنا اينالدى.
14 جەلتوقسان
مەملەكەتتىك ناگرادالار مەن سىيلىقتار تاپسىرۋعا ارنالعان سالتاناتتى ءراسىم ءوتتى. مەملەكەت باسشىسى ءوز سوزىندە جيىنعا قاتىسۋشىلاردى تاۋەلسىزدىك كۇنىمەن قۇتتىقتادى. «تاريحى باي، تامىرى تەرەڭ قازاق ەلى ءۇشىن بۇدان اسقان قاستەرلى قۇندىلىق جوق. ونى ەڭ قىمبات قازىناعا، ەڭ اسىل اماناتقا بالايمىز. سوندىقتان، بابالار اڭساعان تاۋەلسىزدىكتىڭ ءقادىرىن جان-جۇرەگىمىزبەن سەزىنەمىز. ەگەمەندىك – ءار حالىققا بۇيىرا بەرمەيتىن باعا جەتپەس باقىت. تاۋەلسىزدىك شەجىرەسى تۇڭعىش پرەزيدەنتىمىز – ەلباسىنىڭ تاريحي تۇلعاسىمەن تىعىز بايلانىستى»، – دەدى پرەزيدەنت.
جىل ءتۇيىنى
پاندەميا سالدارىنان 2020 جىلعا بەلگىلەنگەن اتاۋلى مەرەيتويلار مەن ءىس-شارالاردى، ەلىمىزدىڭ باستى ۇلتتىق مەرەكەلەرىن كەڭ كولەمدە اتاپ ءوتۋ مۇمكىن بولماعانى بەلگىلى. بارلىق جوسپارلانعان ءىس-شارالار شەكتەۋلى فورماتتا جانە ونلاين رەجيمدە ءوتتى. ءبىراق، پرەزيدەنت تۇجىرىمداعانداي، بۇل جاعداي مەرەيتويلار مەن مەرەكەلەردىڭ قۇنى مەن ماڭىزىن ەش تومەندەتە العان جوق. مەملەكەت باسشىسى ۇلىق مەرەكەلەردىڭ سالتاناتتى رۋحى ءار شاڭىراقتى شاتتىققا بولەپ، ءار قازاقستاندىقتىڭ جۇرەگىن قۋانىشقا تولتىراتىنىنا سەنىم ءبىلدىردى.
«ءوتىپ بارا جاتقان جىل كۇللى الەم جۇرتشىلىعىنىڭ ەسىندە قالاتىن ەرەكشە جىل بولدى. دۇنيە ءجۇزى بۇرىن-سوڭدى بولماعان الاپات ىندەتپەن بەتپە-بەت كەلدى. ءبىزدىڭ حالقىمىزعا دا ونىڭ زاردابى ءتيدى. وسىنداي قيىن كەزەڭدە تۇتاس ۇلت بولىپ بىرلىگىمىزدىڭ قادىر-قاسيەتىن جەتە سەزىندىك. دەرتكە شالدىققان ءاربىر ادامنىڭ تەزىرەك ساۋىعىپ كەتۋىن تىلەدىك. ءبىراق، ىندەت ادام تالعامايدى. پاندەميانىڭ سالدارىنان كوپتەگەن ازاماتتارىمىزدان ايىرىلىپ قالدىق. ولاردىڭ ىشىندە ەلىمىزدى وركەندەتۋگە زور ۇلەس قوسقان تانىمال تۇلعالار دا بار. ومىردەن وتكەن ادامداردىڭ يماندارى سالامات بولسىن! ەندى مۇنداي قاسىرەت قايتالانباسىن. بۇل ءۇشىن قولدان كەلگەننىڭ ءبارىن جاسايمىز. ءار ازامات مەملەكەتتىڭ قامقورلىعىندا بولادى. الداعى جىلدان باستاپ كوروناۆيرۋسقا قارسى تەگىن ۆاكسينا ەگۋدى باستايمىز. ونى ازاماتتاردىڭ قالاۋىمەن، ەرىكتى تۇردە جۇرگىزەمىز. وسى كۇردەلى كەزەڭدە حالقىمىز بەرەكە-بىرلىگى مەن ىنتىماعىن ارتتىرا ءتۇستى. وتانداستارىمىز بىر-بىرىنە قول ۇشىن بەرىپ، جاناشىرلىق تانىتتى. بۇل – شىن مانىندە، ىزگىلىك پەن قايىرىمدىلىقتىڭ ۇلگىسى. ەڭ باستىسى، ءبىز ءبارىمىز بىرگە بولدىق. مەملەكەت تاراپىنان ميلليونداعان ادامعا قولداۋ جاسالدى. ءبىز قوعامنىڭ يگىلىگى ءۇشىن قاجىرلى ەڭبەك ەتىپ جۇرگەن ازاماتتاردىڭ جۇمىسىن باعالاي بىلدىك. دارىگەرلەر، مۇعالىمدەر، ءتارتىپ ساقشىلارى، ەرىكتىلەردىڭ ەرەن ەرلىگىنە كۋا بولدىق. بۇل ازاماتتار – بەيبىت كۇننىڭ ناعىز باتىرلارى. ولارعا حالقىمىز شەكسىز ريزا. كەلە جاتقان جاڭا جىل – قاسيەتتى تاۋەلسىزدىگىمىزدىڭ 30 جىلدىعى. ءبىز ەگەمەن ەلىمىزدىڭ تاريحىنداعى ءتورتىنشى ونجىلدىققا قادام باسامىز. بۇل – شىن مانىندە، اسا ماڭىزدى بەلەس. ءبىز كەلەشەكتە قازاق ەلىنىڭ قۋاتىن ودان ءارى ارتتىرا تۇسەمىز. بارلىق سالاداعى رەفورمالار لايىقتى جالعاسىن تابادى»،– دەدى قاسىم–جومارت توقايەۆ.
ول پرەزيدەنت لاۋازىمىنداعى ءوزىنىڭ باستى مىندەتى – الەۋمەتتىك ادىلدىك جانە حالىقتىڭ ءال-اۋقاتىن ارتتىرۋ ەكەنىنە ماڭىز بەردى. سوندىقتان مەملەكەتتىڭ كۇندەلىكتى ىس-ارەكەتى ازاماتتارىمىزدىڭ تۇرمىس ساپاسىن جاقسارتۋعا باعىتتالادى. اتاپ ايتساق، 2020 جىلى 4 ميلليونعا جۋىق ازاماتتىڭ زەينەتاقىسى مەن الەۋمەتتىك تولەماقىلارىنىڭ كولەمى ءوستى. الەۋمەتتىك ساقتاندىرۋ تولەماقىسى 5 پايىزعا كوبەيدى. از قامتىلعان وتباسىلاردىڭ 500 مىڭنان استام بالالارى ءۇشىن كەپىلدەندىرىلگەن الەۋمەتتىك توپتاما ەنگىزىلدى. پاندەميا كەزىندە قيىن جاعدايعا تاپ بولعان ادامدارعا قولداۋ كورسەتۋ ءۇشىن مەملەكەت بۇرىن-سوڭدى بولماعان قادامعا باردى. ازاماتتارعا 42500 تەڭگە كولەمىندە تىكەلەي تولەماقى بەرىلدى. مەملەكەتتەن 4،5 ميلليوننان استام ادام قارجىلاي كومەك الدى. نەسيەلەردىڭ شەگەرىلۋى 1 ميلليون 900 مىڭعا جۋىق قازاقستاندىقتىڭ دەفولتقا تۇسۋىنە جول بەرمەدى.
پرەزيدەنت تاۋەلسىزدىگىمىزدىڭ 29-شى جىلى كۇردەلى، قيىن ءارى ەرەكشە بولعانىن اتاپ ءوتتى. مۇنداي تاعدىرشەشتى سىناقتار ءار ۇرپاقتىڭ باسىنا تۇسە بەرمەيدى. جاھاندىق داعدىرىستى ەڭسەرگەن مەملەكەتىمىز بۇدان دا زور ماقساتتار مەن مىندەتتەردى كوزدەيدى. «الداعى جىل – مەجەلى كەزەڭ. بۇل جىل ەل تاۋەلسىزدىگىنىڭ 30 جىلدىعى اياسىندا وتەدى. بۇل وتكەنگە كوز جۇگىرتىپ، قورىتىندى جاسايتىن ۋاقىت. حالقىمىز ءۇشىن وسى ماڭىزدى داتانى ناقتى ىستەرمەن جانە جاڭا جوبالارمەن قارسى الامىز. داڭعازا اقسيالار مەن داۋرىقپا شارالاردان باس تارتىپ، بۇكىل ءىس ناقتىلىققا قۇرىلاتىن بولادى. ەكونوميكا، الەۋمەتتىك سالا، ەكولوگياداعى جۇيەلى شارالاردىڭ كولەمدى كەشەنىن ىسكە اسىرۋدى جالعاستىرامىز. تۇرعىنداردىڭ بارلىق توپتارىنىڭ، اسىرەسە جاستار، ايەلدەر، مۇمكىندىگى شەكتەۋلى جانداردىڭ قاجەتتىلىكتەرىنە باسا ءمان بەرەمىز. ءبىز ەلىمىزدەگى ساياسي جاڭعىرتۋ ۇدەرىسىن جالعاستىرا بەرەمىز»، – دەدى پرەزيدەنت.