جۇمىس ىستەۋگە مۇمكىندىك بەرىڭىزدەر
جاڭاوزەن قالاسىنىڭ اكىمى ايبەك قوسۋاقوۆ نارازىلىق اكسياسىن ۇيىمداستىرعان جۇمىسسىزدارعا «جۇمىس جاسايمىن» جوباسى اياسىندا جالاقىسى 140-280 مىڭ تەڭگە ارالىعىندا بولاتىن جۇمىس ۇسىندى. ول بۇل جايىندا الەۋمەتتىك جەلىدەگى پاراقشاسىندا جازدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءقادىرلى جەرلەستەر! بۇگىن ءبىر توپ جۇمىسسىز ازامات جاڭاوزەن قالاسى اكىمدىگىنىڭ الدىنا نارازىلىق اكسياسىن ۇيىمداستىرىپ، مۇناي-گاز سالاسىنا جۇمىسقا ورنالاسپايىنشا، اشتىق جاريالايتىنىن مالىمدەدى. بۇرىندارى ايتقانىمداي، بارلىعىن ءبىر ۋاقىتتا مۇناي-گاز سالاسىنا جۇمىسقا ورنالاستىرۋ مۇمكىن ەمەس. مەملەكەت ۇسىناتىن جۇمىسقا ورنالاسۋدىڭ بارلىق مۇمكىن نۇسقالارىن پايدالانۋ قاجەت. الايدا، وكىنىشكە قاراي، ءبىزدىڭ كەيبىر ازاماتتارىمىز مۇنى تىڭداعىسى دا، مەملەكەت بەرگەن مۇمكىندىكتى پايدالانعىسى دا كەلمەيدى»، - دەدى ايبەك قوسۋاقوۆ.
سونداي-اق ول قولدانىستاعى الگوريتم بويىنشا جۇمىسقا ورنالاسۋ كەزەگىن كۇتىپ وتىرعان ادامدارعا قيانات جاساي المايتىنىن جەتكىزگەن.
«ءبىز جۇمىسقا ورنالاسۋدىڭ باسقا بالاماسىن ۇسىنامىز. ءسىز «جۇمىس جاسايمىن» جوباسى اياسىندا جالاقىسى 140-تان 280 مىڭ تەڭگەگە دەيىن بولاتىن بوس جۇمىس ورىندارى تىزبەگىندەگى جۇمىسقا تۇرا الاسىز. ولاردىڭ كوپشىلىگى ءۇشىن جوعارى ءبىلىمنىڭ بولۋى مىندەتتى ەمەس. جانە دە بۇل مۇناي-گاز سەكتورىنداعى كەزەگىڭىزدى كۇتۋگە ەشقانداي كەدەرگى كەلتىرمەيدى. مەنىڭشە بۇل ۇسىنىس – جۇمىسسىز جۇرگەننەن جاقسى، وتباسىڭىزعا قولداۋ بولارى انىق»، - دەيدى ول.
سونىمەن بىرگە شاھار باسشىسى حالىقتى جۇمىسپەن قامتاماسىز ەتۋدىڭ وزەكتى ماسەلە ەكەنىن ايتىپ، تۇرعىنداردى جاقسى ىستەردى بىرلەسە اتقارۋعا شاقىرعان.
«جاڭاوزەندە ءوز شەشىمىن تالاپ ەتەتىن ءبىرقاتار ماسەلە بار. ارينە، ونىڭ ءبىرى - حالىقتى جۇمىسپەن قامتاماسىز ەتۋ. ءبىراق كوبىنەسە ارىپتەستەرىمىزبەن بىرگە بار ۋاقىتىمىزدى قالامىزدىڭ وزەكتى ماسەلەلەرىن جۇيەلى شەشۋدەن گورى ميتينگىلەر مەن ەرەۋىلدەرگە جۇمساۋىمىزعا تۋرا كەلەدى. قۇرمەتتى جەرلەستەر! بىزگە جۇمىس ىستەۋگە مۇمكىندىك بەرسەڭىزدەر! ءبىزدىڭ ەسىگىمىز سىزدەرگە ءاردايىم ايقارا اشىق. كوپتەگەن قوعام بەلسەندىلەرى ءارتۇرلى ماسەلە بويىنشا ءتۇرلى كوميسسيالارىمىزدىڭ جۇمىسىنا ارالاسىپ، قاتىسىپ كەلەدى. سىزدەردىڭ كومەكتەرىڭىز ءاردايىم قاجەت جانە ءبىز سىزدەرمەن بىرگە ودان دا جاقسى ىستەردى اتقارا الامىز. ورتاق كۇش-جىگەرىمىزدى حالىق مۇددەسىنە جۇمساي وتىرىپ، قالامىزدىڭ جانە ونىڭ ازاماتتارىنىڭ ءومىرىن جاقسارتاتىنىمىزعا بەك سەنىمدىمىن»، - دەيدى اكىم.
ايتا كەتسەك، بۇگىن جاڭاوزەن اكىمدىگى الدىنا جينالعانى ءۇشىن ۇستالعان 17 ادامدى پوليسيا بوساتقانىن جازعان ەدىك.