جاڭا قۇرىلىس ەرەجەلەرى الماتى تۇرعىندارىنىڭ تالابىنا سايكەس كەلەدى

الماتى ادەمى، جايلى جانە ءقاۋىپسىز قالا بولۋى ءتيىس.

جاڭا قۇرىلىس ەرەجەلەرى الەۋمەتتىك ينفراقۇرىلىممەن كەشەندى قامتۋدى قاراستىردى. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگ بارىسىندا ق ر قۇرىلىس سالاسى وداعىنىڭ باسقارما ءتوراعاسى ەرالى ساۋرانبايەۆ مالىمدەدى، دەپ حابارلايدى Almaty-akshamy.kz.

الماتى وكق الاڭىندا ءسوز سويلەگەن ەرالى ساۋرانبايەۆ جاڭا قۇرىلىس ەرەجەلەرىنە سايكەس تۇرعىن جانە تۇرعىن ەمەس عيماراتتار قالانىڭ ماگيسترالدىق كوشەلەرىنىڭ قىزىل سىزىقتارىنان كەمىندە 6 مەتر، جەرگىلىكتى ماڭىزى بار جولداردان كەمىندە 3 مەتر ورنالاساتىن بولادى. بۇل شەشىم جالپى قاۋىپسىزدىك پەن الاڭداردى كوگالداندىرۋعا مۇمكىندىك بەرەدى.

«قۇرىلىستىڭ شارتتارى الەۋمەتتىك ينفراقۇرىلىممەن كەشەندى قامتۋدى كوزدەيدى. جوبالاۋ كەزىندە بالاباقشالار، مەكتەپتەر، ەمحانالار، ۋچاسكەلىك پوليسيا پۋنكتتەرى قارالاتىن بولادى. الەۋمەتتىك نىساندار قولجەتىمدى بولۋى ءتيىس»، — دەدى ەرالى ساۋرانبايەۆ.

ءارى قاراي ول ساۋلەت تالاپتارى جايلى ايتتى. مىسالى، جاڭا ەرەجەلەردە قالا اۋماعىنداعى عيماراتتار مەن قۇرىلىستاردىڭ قاسبەتتەرى قالا ساپاسىنىڭ ەستەتيكالىق سيپاتىن كورسەتۋى ءتيىس دەدى.

«قاسبەتتەگى تەرەزەلەر مەن ۆيترينالاردىڭ بولۋى، ولاردىڭ ولشەمدەرى، سىرتقى كورىنىسى مەن ءتۇسى عيماراتتىڭ تەحنيكالىق قۇجاتىنا سايكەس بولۋى كەرەك. كىرۋ توپتارى قۇرىلىمنىڭ سەنىمدىلىگى مەن قاۋىپسىزدىگىن قامتاماسىز ەتە وتىرىپ، جوبالاۋ قۇجاتىنىڭ تالاپتارىنا سايكەس بولۋى ءتيىس»، — دەپ حابارلادى ەرالى ساۋرانبايەۆ.

ق ر قۇرىلىس سالاسى وداعى باسقارماسىنىڭ ءتوراعاسى قۇرىلىستىڭ جاڭا ەرەجەلەرى قالا تۇرعىندارى، اكىمدىك پەن قۇرىلىس سالۋشىلار اراسىندا ورتاق كەلىسىمگە كەلۋگە مۇمكىندىك بەرەتىنىن ايتتى.

«الماتى ادەمى، جايلى جانە ءقاۋىپسىز قالا بولۋى ءتيىس»، — دەدى ەرالى ساۋرانبايەۆ.