قازاقستان اسكەرىندە مەملەكەتتىك رامىزدەر كۇنىنە ارنالعان سالتاناتتى شارالار وتۋدە
ەلىمىزدە 4 ماۋسىم - قازاقستان رەسپۋبليكاسىنىڭ مەملەكەتتىك رامىزدەرى كۇنى اتالۋدا. قارۋلى كۇشتەردىڭ اسكەري بولىمدەرى مەن مەكەمەلەرىندە جەكە قۇرامنىڭ سالتاناتتى شەرۋلەرى، مادەني جانە سپورتتىق شارالار ۇيىمداستىرىلىپ، مەملەكەتتىك رامىزدەردىڭ شىعۋ تاريحى مەن ءمان-ماعىناسى جونىندە ساباقتار وتكىزىلدى، دەپ حابارلادى Almaty-akshamy. kz.
ەلوردادا ورتالىق اسكەري وركەستردىڭ مۋزىكانتتارى ۇلتتىق اسكەري-پاتريوتتىق ورتالىعى عيماراتىنىڭ الدىندا مەملەكەتتىك ءانۇراندى شىرقادى. بۇل شاراعا «جاس سارباز» اسكەري-پاتريوتتىق قوزعالىسىنىڭ تاربيەلەنۋشىلەرى دە قاتىستى. ەلوردا تۇرعىندارى مەن قوناقتارى اسكەري مۋزىكانتتار ورىنداعان تۋىندىلاردى ەرەكشە ىلتيپاتپەن، جىلى قارسى الدى.
تارازدا گارنيزون اسكەري بولىمدەرىنىڭ اسكەري قىزمەتشىلەرى «جاستار» اللەياسىنان باستاپ، تۇڭعىش پرەزيدەنت ساياباعىنا دەيىن مەملەكەتتىك رامىزدەردى: تۋ مەن ەلتاڭبانى الىپ ءجۇردى. شەرۋگە «وڭتۇستىك» وڭىرلىك قولباسشىلىعىنىڭ اسكەري وركەسترى دە قاتىستى. مۋزىكانتتار مەملەكەتتىك ءانۇراندى ورىنداپ، اسكەري مارشپەن ءجۇرىپ ءوتتى.
قاراعاندى گارنيزونىندا ونلاين-رەجيمدە ارحيتەكتور ءارى ەلتاڭبا اۆتورى جانداربەك مالىبەكوۆتىڭ قاتىسۋىمەن «ەلتاڭباسىمەن ەڭسەلى، انۇرانىمەن ايبىندى، تۋىمەن تۇعىرلى» اتتى دوڭگەلەك ۇستەل ۇيىمداستىردى. سونداي-اق، گۆاردەيسك گارنيزونىندا ۆولەيبولدان جارىس ءوتتى.
اتىراۋ گارنيزونىنىڭ اسكەري بولىمدەرىندە اسكەري قىزمەتشىلەردىڭ بالالارى اراسىندا «ءبىزدىڭ مەملەكەتتىك رامىزدەر» اتتى شىعارمالار بايقاۋى وتكىزىلدى.
مەملەكەتتىك رامىزدەر كۇنى – قازاقستان حالقىن بىرىكتىرەتىن ەرەكشە مەرەكە. ەگەمەن ەلىمىزدىڭ رەسمي رامىزدەرى – تۋ، ەلتاڭبا مەن ءانۇران وسىدان 29 جىل بۇرىن بەكىتىلگەن. مەملەكەتتىك رامىزدەردە حالقىمىزدىڭ بىرلىك پەن كەلىسىمگە دەگەن ۇمتىلىسى، ەلدەگى قوعامدىق قۇندىلىقتار جانە وتانىمىزعا دەگەن ماقتانىش كورىنىس تاپقان.