كاسىپكەرلەردىڭ پىكىرىنشە، قاتاڭ كارانتيندىك شارالار باسقا سالالارعا دا ءقاۋىپ توندىرەدى
«اتامەكەن» ق ر ۇكپ الاڭىندا كوروناۆيرۋس ينفەكسياسىنىڭ ورشۋىنە بايلانىستى قىزىل ايماققا كوشۋ جاعدايىندا كارانتيندىك شەكتەۋ شارالارى تالقىلاندى. جيىنعا 150-دەن استام كاسىپكەرلىك قاۋىمداستىق وكىلدەرى، سونداي-اق، دەنساۋلىق ساقتاۋ مينيسترلىگى مەن ۇلتتىق پالاتا وكىلدەرى قاتىستى، دەپ حابارلايدى Almaty-akshamy.kz ۆەدومستۆونىڭ باسپا ءسوز قىزمەتىنە سىلتەمە جاساپ.
كارانتين شارالارى تالقىلاۋ كەزىندە بيزنەس-قاۋىمداستىق قاتاڭ شەكتەۋ شارالارىن ەنگىزۋ بۇرىنعى شەكتەۋلەردەن قالپىنا كەلە باستاعان بيزنەسكە ۇلكەن سوققى بەرەدى دەپ سانايدى.
«كاسىپكەر مەن جەكە تۇلعا اراسىنداعى جاۋاپكەرشىلىكتىڭ اراجىگى اجىراتىلىپ جازىلعانىن قالايمىن. الەۋمەتتىك قاشىقتىقتى ساقتاۋ، ماسكا رەجيمى. كەلۋشىلەر ماسكا رەجيمىن ساقتاماعان جاعدايدا شەگى جوق ايىپپۇل سالدارىنان بيزنەستىڭ جابىلىپ قالعان جاعدايلار قانداي بولعانىن ءبارىمىز بىلەمىز. بيزنەسكە ايىپپۇل سالىپ، كەدەرگى كەلتىرەدى. سوندىقتان جاۋاپكەرشىلىكتى ناقتى جازايىق. كاسىپكەر بۇكىل حالىق ءۇشىن جاۋاپ بەرە المايدى»، – دەدى بولشەك ساۋدا جانە تاماقتانۋ قاۋىمداستىعىنىڭ پرەزيدەنتى مارينا بوشەل.
جيىن بارىسىندا كاسىپكەرلەر كارانتين شارالارى نەمەسە لوكداۋن بولسا، مەملەكەتتەن قانداي قارجىلاي كومەك بولاتىنى دا ايتىلدى.
«ەگەر شەكتەۋ ەنگىزىلەتىن بولسا، سالىق تولەۋ جاعىن شەشۋ كەرەك. ويتكەنى شەكتەۋ باستالىسىمەن بيزنەستىڭ شىعىنى ەسەلەنە تۇسەدى. ءتىپتى ماسكالاردىڭ ءوزى ۇلكەن شىعىن. وندا سالىق تولەۋ مەن تەكسەرۋگە موراتوريي ەنگىزۋدى قاراستىرۋ كەرەك. وسى پانەدميا بولعان ءۇش جىلدا بيزنەستى اۋرە-سارساڭعا تۇسىرگەنى ەشكىمگە جاسىرىن ەمەس»، – دەدى مارينا بوشەل.
ال قاۋىمداستىق وكىلى ولگا ەگوروۆا Ashyq-تى ەنگىزۋ، ماسكا رەجيمىن ەنگىزۋ جاڭا جۇمىس بىرلىگىن اشۋدى قاراستىراتىنىن ايتتى. ياعني قايتادان كۇزەتكە ادام جالداپ، قايتادان كىرەبەرىسكە ادام قويۋ قاجەت بولادى.
كاسىپكەرلەردىڭ پىكىرىنشە، قاتاڭ كارانتيندىك شارالار باسقا سالالارعا دا ءقاۋىپ توندىرەدى.
«ءبىز ءالى اياققا تۇرمادىق. تەحنيكانى جاڭارتا المادىق، اقشا تاپپادىق، ءقازىر ءبىز كوپتەگەن جۇرگىزۋشى، بارلىق دەڭگەيدەگى مامانداردان ايىرىلدىق. ياعني، بۇل جاي عانا بيزنەستى ەمەس، تۇتاس سالانى جويۋعا اپارادى»، – دەپ اتاپ ءوتتى «قوستاناي وبلىسىنىڭ جولاۋشىلار كولىگىمەن تاسىمالداۋشىلار قاۋىمداستىعىنىڭ، اۆتوۆوكزالدار مەن اۆتوستانسيالاردىڭ» باس ديرەكتورى لەونيد كۋشنەروۆ.
ءوز كەزەگىندە تۋريستىك سالانىڭ وكىلى يننا رەي بيزنەسكە قاتىستى ەشقانداي شەكتەۋ شارالارى ەنگىزىلمەۋى ءتيىس دەپ ەسەپتەيدى. ونىڭ پىكىرىنشە، سانيتاريالىق جوسپار ورىندى. ويتكەنى بيزنەس ەندىگى قاتاڭ شەكتەۋلەرگە توتەپ بەرە المايدى.
تالقىلاۋ بارىسىندا اقپاراتتىق قاۋىپسىزدىك سەرتيفيكاتى جوق جانە ونەركاسىپتىك پايدالانۋعا بەرىلمەگەن Ashyq ەنگىزۋدىڭ زاڭدىلىعى ماسەلەسى كوتەرىلدى. بۇل ماسەلە بويىنشا كاسىپكەرلەردىڭ الاڭداۋشىلىعىن ق ر دسم سانيتاريالىق-ەپيدەميولوگيالىق باقىلاۋ كوميتەتى ءتوراعاسىنىڭ ورىنباسارى ساۋلە احمەتوۆا سەيىلتتى.
«Ashyq پلاتفورماسى ارۋحانالارداعى توسەك-ورىن قورىنىڭ 50%-دان استامى تولعان كەزدە قولدانىلادى. ەگەر دەنساۋلىق ساقتاۋ جۇيەسى ۇلگەرمەي قالسا، وندا 2020 جىلداعى جاعداي قايتالانادى، سوندا Ashyq ەنگىزىلەدى. قازىرگى كەزدە Ashyq اقپاراتتىق قاۋىپسىزدىككە سىناقتان ءوتىپ جاتىر. باعدارلاما جاقىن ارادا ونەركاسىپتىك پايدالانۋعا بەرىلەدى. جىل بويى ول تاجىريبەلىك پايدالانۋدان ءوتتى. ياعني، تاجىريبەلىك پايدالانۋدان كەيىن ول ونەركاسىپكە ەنگىزىلەدى»، – دەپ ءتۇسىندىردى ساۋلە احمەتوۆا.
دەنساۋلىق ساقتاۋ مينيسترلىگىنىڭ وكىلى سونىمەن بىرگە قازىرگى كەزدە ۇسىنىلعان شارالار دەنساۋلىق ساقتاۋ جۇيەسىنە جۇكتەمەنى ەسكەرە وتىرىپ، جاڭا ماتريساعا نەگىزدەلگەنىن ءتۇسىندىردى. سارى ايماقتا شارالار ۇسىنىمدىق سيپاتتا بولادى. ال قىزىل ايماق كەزىندە وتكەن جىلمەن سالىستىرعاندا جۇمساق نۇسقا ۇسىنىلادى.
كەڭەس قورىتىندىسى بويىنشا بيزنەستىڭ بارلىق ۇسىنىسى، قارسىلىعى مەن قاۋىپتەرى قىزىل ايماق ءۇشىن كارانتيندىك شارالاردى ازىرلەۋ كەزىندە ەسەپكە الۋ ءۇشىن دەنساۋلىق ساقتاۋ مينيسترلىگىنە جىبەرىلەدى.