كەيبىر اكىمدىكتەر قانتتى وزىندىك قۇنىنان تومەن باعامەن دە ساتقان
اۋىل شارۋاشىلىعى ءمينيسترى ەربول قاراشوكەيەۆ ەلىمىزدە ءقازىر قانت باعاسى قانشا بولۋى كەرەك ەكەنىن ايتتى. ونىڭ ايتۋىنشا، قانت قۇراعى شامامەن ەكى ەسە، 476 دوللارعا دەيىن قىمباتتاعان. لوگيستيكا شىعىندارى دا 2،6 ەسە، 110 دوللاردان 290 دوللارعا دەيىن وسكەن، دەپ حابارلايدى Almaty-akshamy.kz kazbusiness.kz سايتىنا سىلتەمە جاساپ.
«بۇل جاعداي وتاندىق قانت زاۋىتتارىندا قۇراق قانتتىڭ وزىندىك قۇنىنىڭ وسۋىنە اكەپ سوقتى. بۇگىنگى تاڭدا زاۋىتتار 1 كەلى قانتتى 450 تەڭگەگە ساتادى. بۇل رەتتە كوتەرمە جانە بولشەك ساۋدا ساتۋشىلارى قوساتىن 15% ۇستەمە باعانى ەسكەرسەك، قانتتىڭ ەڭ تومەن باعاسى شامامەن ءبىر كەلىسى 595-600 تەڭگە بولۋى قاجەت»، — دەدى قاراشوكەيەۆ ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا.
ول باعانى تۇراقتاندىرۋ جونىندەگى شارالار اياسىندا وڭىرلەردىڭ تۇراقتاندىرۋ قورلارى قانتتى تومەن باعامەن ساتىپ جاتقانىن اتاپ ءوتتى. ال بۇل دۇربەلەڭ مەن ۇلكەن سۇرانىسقا الىپ كەلىپ جاتىر.
ايتۋىنشا، كەيبىر اكىمدىكتەر قانتتى وزىندىك قۇنىنان تومەن باعامەن دە ساتقان. مىسالى، پاۆلودار وبلىسى تۇراقتاندىرۋ قورى قانتتى 448 تەڭگەگە ساتىپ الىپ، 416 تەڭگەگە، ال قىزىلوردا وبلىسى 450 تەڭگەگە ساتىپ الىپ، 370 تەڭگەدەن ساتقان. الماتى وبلىسى قانتتى 276 تگ/كگ، اقتوبە وبلىسى 363 تگ/كگ، ماڭعىستاۋ وبلىسى 400 تگ/كگ ساتقان.
«اكىمدىكتەردىڭ وسى ىس-ارەكەتى دۇرلىكپە سۇرانىس پەن الەۋمەتتىك شيەلەنىستىڭ تۋىنداۋىنا اكەپ سوقتىرۋدا»، — دەدى مينيستر. ۆەدومستۆو باسشىسى ىشكى نارىقتا كوممەرسيالىق قانتتىڭ كولەمى جەتكىلىكتى ەكەنىن مالىمدەدى.