«سامۇرىق-قازىنا» قورىنىڭ باسقارما ءتوراعاسى نۇرلان جاقىپوۆ قتج-نىڭ IPO (العاشقى قوعامدىق ۇسىنىس) وتكىزۋدى جوسپارلاپ وتىرعانىن ءمالىم ەتتى، دەپ حابارلايدى aqshamnews.kz.
اكسيالاردى ورنالاستىرۋ ءۇشىن الدىمەن زاڭناماعا وزگەرىستەر ەنگىزۋ قاجەت بولادى.
«IPO-عا شىعۋ ءۇشىن ىشكى جانە حالىقارالىق زاڭنامانىڭ تالاپتارىن ساقتاۋ كەرەك. سوندىقتان ءبىز وزگەرىستەر ەنگىزەمىز، ەگەر بۇل مۇمكىن بولماسا، ءتيىستى زاڭ جوبالارىمەن جۇمىس ىستەيمىز»، – دەدى جاقىپوۆ.
ول بولاشاق اكسيونەرلەرگە قانداي اكتيۆتەر مەن قانداي ۇلەس ۇسىنىلاتىنىن ءتۇسىندىردى.
«ءبىز كومپانيانىڭ 20%-عا دەيىنگى اكسيالارىن ساتۋدى جوسپارلاپ وتىرمىز. اكسيونەرلەر ماگيسترالدى تەمىرجول جەلىسىن ەمەس، كتج كومپانياسىنىڭ ءوزىن يەمدەنەتىن بولادى. كومپانيانىڭ مەنشىگىندە ماگيسترالدى تەمىرجول جەلىسى مەن باسقا دا اكتيۆتەر بار»، – دەدى ول.
ال ۆاگوندار، تەمىرجول جانە كومپانيانىڭ باسقا مۇلكى اكسيونەرلەرگە بەرىلۋى جوسپارلانبايدى.
«بۇل Air Astana IPO-عا شىققاندا ۇشاقتاردى نەمەسە ۇشاق دوڭگەلەكتەرىن ساتپادى عوي. بولاشاق جانە قازىرگى اكسيونەرلەر كومپانيانىڭ اكسيالارىنا يە بولادى، ءبىراق ينفراقۇرىلىمعا ەمەس»، – دەپ قوستى كتج ديرەكتورلار كەڭەسىنىڭ ءتوراعاسى بولات جامىشيەۆ.
بۇعان دەيىن «وتباسى بانكى» IPO-عا شىعۋى مۇمكىن ەكەنى تۋرالى اقپارات تاراعان بولاتىن.