2025 جىلعى قاراشا ايىنىڭ قورىتىندىسى بويىنشا قازاقستان رەسپۋبليكاسىندا جىلدىق ينفلياسيا دەڭگەيى 12،4 پايىزدى قۇرادى. بۇل كورسەتكىش قازان ايىمەن سالىستىرعاندا ازداپ تومەندەگەنىمەن (12،6%)، ەلدەگى باعا ءوسىمىنىڭ ءالى دە جوعارى ەكەنىن كورسەتەدى. ال ءبىر ايداعى ينفلياسيا 0،8 پايىز بولدى. Aqshamnews.kz ءتىلشىسى ۇلتتىق ستاستيتيكا بيۋروسىندا جاريالانعان مالىمەتتەر نەگىزىندە وسى تاقىرىپتى تالداپ كوردى.
ينفلياسيانى نە ءوسىرىپ جاتىر؟
رەسمي دەرەكتەرگە سايكەس، جىلدىق ينفلياسيانىڭ نەگىزگى قوزعاۋشى كۇشتەرى - ازىق-تۇلىك تاۋارلارى، اقىلى قىزمەتتەر جانە ازىق-تۇلىك ەمەس تاۋارلار.
- ازىق-تۇلىك تاۋارلارى ءبىر جىلدا 13،4% قىمباتتادى
- اقىلى قىزمەتتەر باعاسى 12،3% ءوستى
- ازىق-تۇلىك ەمەس تاۋارلار 11،2%-عا قىمباتتاعان
ينفلياسيانىڭ جالپى دەڭگەيىنە ەڭ ۇلكەن ۇلەستى ازىق-تۇلىك پەن الكوگولسىز سۋسىندار قوستى - 5،2 پايىزدىق تارماق. بۇدان بولەك، دەنساۋلىق ساقتاۋ قىزمەتتەرى (1،5 پ.ت.) جانە تۇرعىن ۇي-كوممۋنالدىق قىزمەتتەر (1،2 پ.ت.) دە باعا وسىمىنە ەلەۋلى اسەر ەتتى.
ازىق-تۇلىك: ەت پەن ماي الدا تۇر
ازىق-تۇلىك تاۋارلارى اراسىندا ەڭ جوعارى ءوسىم ەت جانە ەت ونىمدەرىندە تىركەلدى - ءبىر جىلدا 21،7%. بۇل ينفلياسياعا 2،45 پايىزدىق تارماق قوستى.
سونداي-اق:
- ماي جانە توڭ ماي - 6،4%
- الكوگولسىز سۋسىندار - 15،7%
- ءسۇت ونىمدەرى - 10،8 %
- جەمىستەر مەن كوكونىستەر - 9%
باعانىڭ مۇنداي ءوسۋى ماۋسىمدىق فاكتورلارمەن قاتار، ءوندىرىس شىعىندارىنىڭ ارتۋى جانە لوگيستيكاعا بايلانىستى.
قىزمەت كورسەتۋ سالاسىنداعى قىمباتشىلىق
اقىلى قىزمەتتەر ينفلياسياعا 3،7 پايىزدىق تارماق قوستى. اسىرەسە تۇرعىن ۇيگە قاتىستى قىزمەتتەر ايتارلىقتاي قىمباتتاعان.
- تۇرعىن ءۇيدى جالعا الۋ - 15،9%
- تۇرعىن ءۇيدى جوندەۋ جانە قىزمەت كورسەتۋ - 8،2%
- تۇرعىن ۇي-كوممۋنالدىق قىزمەتتەر - 9،9%
كوممۋنالدىق قىزمەتتەر ىشىندە:
- گاز - 15،6%
- ەلەكتر ەنەرگياسى - 8%
- ورتالىقتان جىلىتۋ - 10،2%
تەك سۋىق سۋدىڭ باعاسى 12،3 پايىزعا تومەندەپ، ينفلياسياعا كەرى اسەر ەتكەن ساناۋلى كورسەتكىشتەردىڭ ءبىرى بولدى.
ايماقتار بويىنشا ينفلياسيا: قاي وڭىردە جوعارى؟
2025 جىلعى قاراشادا ەڭ جوعارى جىلدىق ينفلياسيا تىركەلگەن وڭىرلەر:
- ۇلىتاۋ وبلىسى - 14%
- اقمولا وبلىسى - 13،8%
- اتىراۋ وبلىسى - 13،5%
- سولتۇستىك قازاقستان وبلىسى - 13،4%
ال سالىستىرمالى تۇردە تومەن كورسەتكىشتەر:
- الماتى قالاسى - 11،4%
- ماڭعىستاۋ وبلىسى - 11،6%
- قىزىلوردا وبلىسى - 11،7%
بۇل ايىرماشىلىقتار وڭىرلەردەگى تۇتىنۋ قۇرىلىمى، كوممۋنالدىق تاريفتەر مەن لوگيستيكالىق شىعىنداردىڭ ارتۇرلىلىگىنە بايلانىستى.
قاراشا ايىنداعى باعا ديناميكاسى
ءبىر اي ىشىندە:
-
ازىق-تۇلىك تاۋارلارى – 1%
-
ازىق-تۇلىك ەمەس تاۋارلار – 0،9%
-
اقىلى قىزمەتتەر – 0،3%
بۇل كورسەتكىشتەر جىل سوڭىنا قاراي ينفلياسيا قارقىنىنىڭ ءبىرشاما باياۋلاعانىن اڭعارتادى.
2025 جىلعى قاراشادا ينفلياسيانىڭ 12،4 پايىز دەڭگەيىندە قالىپتاسۋى - باعانىڭ ءوسۋى ءالى دە حالىقتىڭ كۇندەلىكتى شىعىندارىنا ايتارلىقتاي اسەر ەتىپ وتىرعانىن كورسەتەدى. اسىرەسە ازىق-تۇلىك باعاسىنىڭ، تۇرعىن ۇيگە قاتىستى قىزمەتتەردىڭ جانە ەنەرگيا رەسۋرستارىنىڭ قىمباتتاۋى نەگىزگى فاكتور بولىپ وتىر.
سونىمەن بىرگە، ايلىق ينفلياسيانىڭ باياۋلاۋى مەن كەيبىر تاۋارلار باعاسىنىڭ تۇراقتانۋى الداعى كەزەڭدە ينفلياسيالىق قىسىم بىرتىندەپ السىرەۋى مۇمكىن دەگەن ءۇمىت بەرەدى. دەگەنمەن، باعا تۇراقتىلىعى كوبىنە ىشكى نارىقتاعى ۇسىنىس، تاريفتىك ساياسات جانە سىرتقى ەكونوميكالىق جاعدايلارعا تاۋەلدى بولا بەرمەك.