قونايەۆ قالاسىندا جەرگىلىكتى اۋقىمداعى توتەنشە جاعداي جاريالاندى، دەپ حابارلايدى aqshamnews.kz
قونايەۆ قالاسىندا 12 جەلتوقسانعا قاراعان ءتۇنى سەكۋندىنا 25 مەتردەن اسقان قاتتى جەلدىڭ سالدارىنان ءبىرقاتار تۇرعىن ۇيلەر مەن عيماراتتاردىڭ شاتىرلارى زاقىمدالىپ، كوشەلىك جارىقتاندىرۋ تىرەكتەرىنىڭ جۇمىسى بۇزىلدى.
قازاقستان رەسپۋبليكاسىنىڭ «ازاماتتىق قورعاۋ تۋرالى» جانە «جەرگىلىكتى مەملەكەتتىك باسقارۋ جانە ءوزىن-وزى باسقارۋ تۋرالى» زاڭدارىنىڭ تالاپتارىنا سايكەس، قالا اكىمى تابيعي سيپاتتاعى جەرگىلىكتى اۋقىمداعى توتەنشە جاعداي رەجيمىن ەنگىزۋ تۋرالى شەشىم قابىلدادى.
17 جەلتوقساننان باستاپ قونايەۆ قالاسىندا توتەنشە جاعداي رەجيمى رەسمي تۇردە كۇشىنە ەندى.
زاقىمدانعان نىسانداردا جوندەۋ-قالپىنا كەلتىرۋ جۇمىستارىن جۇرگىزۋ ءۇشىن توتەنشە رەزەرۆ قاراجاتىن پايدالانۋ جوسپارلانىپ وتىر.
11 جەلتوقساننان بەرى قالانىڭ كوممۋنالدىق قىزمەتتەرى كۇشەيتىلگەن رەجيمدە جۇمىس ىستەپ كەلەدى. قازىرگى ۋاقىتتا قونايەۆتاعى جاعداي تۇراقتى: ەلەكترمەن جابدىقتاۋ، سۋ جانە جىلۋمەن قامتۋ جۇيەلەرى شتاتتىق رەجيمدە جۇمىس ىستەپ تۇر.