نازىم قىزايبايدىڭ سپورتتاعى جەتىستىكتەرى – قازىرگى زامانعى سپورت پەن قوعام ءۇشىن ماڭىزدى كورىنىس. ونىڭ جاستارعا ۇلگى بولىپ، قاجىرلى ەڭبەك، تەمىردەي ءتارتىپتىڭ ارقاسىندا ماقساتقا جەتۋگە بولاتىنىن دالەلدەيدى. نازىمنىڭ جەڭىستەرىنىڭ ارتىندا كۇندەلىكتى جاتتىعۋ مەن ۇلكەن جىگەر جاتىر. بۇل قاسيەتتەر كەز كەلگەن جاس سپورتشى ءۇشىن ۇلگى بولىپ تابىلادى.
بۇگىن №110 مەكتەپ-گيمنازياسىندا ەل سپورتىنىڭ ابىرويىن اسقاقتاتىپ جۇرگەن، قازاق بوكسىنىڭ ماقتانىشى، الەمنىڭ بىرنەشە دۇركىن چەمپيونى نازىم قىزايبايمەن جۇزدەسۋ ءوتتى. چەمپيوننىڭ كەلۋى ءبىلىم وردامىز ءۇشىن مارتەبە، وقۋشىلار ءۇشىن ناعىز رۋحاني سەرپىلىس بولدى. زالعا جينالعان جاس جەتكىنشەكتەردىڭ كوزىندەگى جالىن مەن قىزىعۋشىلىق – چەمپيونمەن كەزدەسۋدىڭ قۇندىلىعىن ايقىن كورسەتتى.
كەزدەسۋ بارىسىندا نازىم قىزايبايدىڭ سپورت الەمىندەگى جولىن باياندايتىن تانىستىرۋ ۆيدەوسى كورسەتىلدى. بەلدى سپورتشىنىڭ رينگتەگى ەرلىگى، الەمدىك دودالارداعى جەڭىسى وقۋشىلارعا ەرەكشە اسەر قالدىردى. شارانىڭ اشىلۋ سالتاناتىن «كاۋسار» دومبىراشىلار ءانسامبلى كەرەمەت كۇيمەن باستادى. دومبىرانىڭ كيەسىن سەزدىرگەن بۇل اسەرلى ءسات رۋحتى كۇيىمەن زالدا وتىرعانداردى بىردەن باۋراپ الدى. شارانى ودان ءارى كوركەمدەگەن – مەكتەبىمىزدىڭ مىڭ بۇرالعان «سامال بي» توبى شارانىڭ ءسانىن كەلتىرىپ، ءوز ونەرلەرىن تارتۋ ەتتى.
كەزدەسۋ سۇحبات الاڭىنا ۇلاسىپ، وقۋشىلار ءوز ساۋالدارىن جولداپ، وزدەرىن قىزىقتىرعان سۇراقتارىن قويىپ، چەمپيوننىڭ بالالىق شاعى، سپورتقا كەلۋى، العاشقى جەڭىستەرى تۋرالى تىڭ مالىمەتتەر الدى. سپورتشى ءار سۇراققا شىنايى جاۋاپ بەرىپ، تابىسىنىڭ سىرى ەڭبەكتە، توزىمدە، ماقساتتان تايماۋدا ەكەنىن ايتتى.
كەزدەسۋ سوڭىندا چەمپيون ءوزىنىڭ بالالىق شاعى اينابۇلاق شاعىن اۋدانىندا وتكەنىن، وسى ءوڭىردىڭ جۇرەگىنە جاقىن ەكەنىن تەبىرەنە ايتتى.
"وسكەن جەرىم – مەن ءۇشىن ەرەكشە سەزىم. بۇل جەردە ارماندار باستالىپ، ماقساتتار قالىپتاستى. بۇگىنگى جۇزدەسۋدەن ءوزىم دە قۋات الدىم»، – دەگەن سوزدەرى زالدى جىلى سەزىمگە بولەدى. ءاربىر جاۋاپتىڭ وزەگى – ەڭبەك، تاباندىلىق جانە وتانعا دەگەن سۇيىسپەنشىلىك. نازىم قىزايباي جاس سپورتشىلاردى نامىسقوي، قايسار، ارمانشىل بولۋعا شاقىردى. بۇل كەزدەسۋ جاس بۋىنعا تەك اقپارات ەمەس – جىگەر، سەنىم، بيىككە ۇمتىلۋ رۋحىن سىيلاپ، بولاشاق چەمپيونداردىڭ جۇرەگىندە وت تۇتاتىپ، جاس بۋىنعا ۇلگى بولىپ ۇلكەن ارمانعا جەتەلەرىنە سەنىمىمىز مول."
الەمدى مويىنداتقان ءۇش دۇركىن چەمپيون نازىم قىزايبايدىڭ اينابۇلاقتاي شاعىن اۋداندا بالالىق شاعى ءوتىپ، تۇرعىنداردىڭ ىستىق ىقىلاسىنان قۋات العان سپورتشى بۇگىنگى جەڭىستەرىن ءوز ەلىنە، تۋعان جەرىنە ارنايتىنىن ءار سوزىندە ايتىپ توقتالدى. اينابۇلاق – ونىڭ العاشقى قادامى، العاشقى ارمانىمەن ۇشتاسقان قاسيەتتى مەكەنى. سوندىقتان نازىم قىزايبايدىڭ الەمدىك دەڭگەيگە دەيىن جەتۋ جولى – وسى توپىراقتان تۇلەپ ۇشقان ءاربىر جاسقا جىگەر بەرەتىن جارقىن ۇلگى. قورىتا كەلگەندە، ءبىر عانا سپورتشىنىڭ ءومىر جولى – تۇتاس ءبىر بۋىنعا ۇلگى، ۇلت رۋحىن كوتەرەتىن قۇندىلىق ەكەنى تاعى دا دالەلدەندى.
ءور رۋحتى نازىم قىزايباي سىندى تۇلعالاردىڭ ءومىر جولى – ۇرپاققا ونەگە، ەلگە ماقتانىش.