ەۋروپالىق قايتا قۇرۋ جانە دامۋ بانكىنىڭ (ەقدب) قازاقستانداعى ديرەكتورى حۋسەين وزحان استانا حالىقارالىق فورۋمى اياسىندا Jibek Joly تەلەارناسى ستۋدياسىندا قوناق بولدى. سۇحبات بارىسىندا ول جانە تەلەجۇرگىزۋشى كۇنسايا قۇرمەت ەقدب جۇرگىزگەن «ورتا ءدالىز» زەرتتەۋى، قازاقستان ەكونوميكاسىن كومىرتەكسىزدەندىرۋ جانە قازاقستاننىڭ 2060 جىلعا قاراي كومىرتەگىنەن بەيتاراپ بولۋى مۇمكىندىگى جايلى اڭگىمەلەستى، دەپ حابارلايدى Almaty-akshamy.kz.
سۇحبات بارىسىندا حۋسەين وزحان ەقدب قازاقستانداعى 310-نان استام جوباعا 10 ميلليارد اقش دوللارىنان استام ينۆەستيسيا سالعانىن اتاپ ءوتتى.
«بۇل جوبالار ءاربىر سالانى، ءبىراق نەگىزىنەن ينفراقۇرىلىمدى، ەنەرگەتيكانى، اسىرەسە سوڭعى جىلدارى قارجى سەكتورىن، ءوندىرىس پەن قىزمەتتەردى، تابيعي رەسۋرستاردى، تاۋ-كەن ونەركاسىبىن قامتيدى. وسىلايشا ينۆەستيسيا جۇمىستىڭ كەڭ اۋقىمىن قامتىدى. ەلدىڭ بارلىق وڭىرىندە ينۆەستيسيا بار ەكەنىن ريزاشىلىقپەن اتاپ وتكىم كەلەدى. مەن ءۇشىن بۇل قۋانىش. ويتكەنى ساياحاتتاعان كەزىمدە جوبالاردىڭ بۇكىل قازاقستان بويىنشا ىسكە اسىپ جاتقانىن كورەمىن. مۇنى كورۋ جانە ەل دامۋىنىڭ ءبىر بولىگى بولۋ - ناعىز ءلاززات»، - دەپ اتاپ ءوتتى ول.
«ورتا ءدالىز» باستاماسىنا قاتىستى سۇراققا جاۋاپ بەرگەن ول «ورتا ءدالىز» نەمەسە ترانسكاسپيي باعىتى، اسىرەسە سوڭعى جىلدارى قازىرگى گەوساياسي جاعدايدى ەسكەرە وتىرىپ، ۇلكەن ماڭىزعا يە بولعانىن اتاپ ءوتتى.
«ءبىز وتكەن جىلى ەۋروپالىق وداق قارجىلاندىراتىن، ءبىراق ەقدب جۇرگىزگەن ۇلكەن زەرتتەۋ جاسادىق»، - دەدى حۋسەين وزحان.
قازاقستانداعى ەقدب ديرەكتورى ورتالىق ازيانىڭ بارلىق ەلىن قامتيتىن ەڭ ءتيىمدى باعىت رەتىندە قورعاستان شىعاتىن، ودان ءارى قازاقستاندا الماتى، شىمكەنت ارقىلى وتەتىن، تاشكەنتكە كىرىپ، ودان كەيىن قايتادان قازاقستانداعى اقتاۋ ارقىلى كاسپيي تەڭىزىنەن باكۋگە دەيىن كەسىپ وتەتىن جانە باكۋدەن گرۋزياعا باراتىن، ءارى قاراي ەۋروپاعا شىعۋ ءۇشىن قارا تەڭىزگە جانە تۇركياعا جەتەتىن جولدى اتادى.
«بۇل بارىنشا ەكونوميكالىق ينكليۋزيۆتى ءارى ەڭ ءتيىمدى باعىت سانالادى»، - دەدى ول.
ونىڭ پايىمىنشا، قازاقستان 2060 جىلعا قاراي كومىرتەگى بەيتاراپ ەل بولا الادى دەپ ەسەپتەيدى. ءبىراق ول وڭايعا سوقپايدى.
«بۇل ءورشىل ماقسات. ءبىراق بۇل مۇمكىن ەمەس دەگەندى بىلدىرمەيدى. مۇمكىن بۇل اقىلعا قونىمدى دا شىعار. ءبىز تەك جاڭارتىلاتىن ەنەرگيا تۋرالى عانا ەمەس، سونىمەن قاتار ەنەرگيا تيىمدىلىگى، بارلىق سەكتوردا ەنەرگيا تيىمدىلىگىن ارتتىرۋ تۋرالى ايتىپ وتىرمىز. جاڭارتىلاتىن ەنەرگيا ماڭىزدى كومپونەنت بولىپ سانالعانىمەن جالعىز ەمەس. ەنەرگيا ءوندىرىسىن ۇلعايتۋمەن قاتار، ەلەكتر ەنەرگياسىن ءوندىرۋدىڭ قۇرامى، سايىپ كەلگەندە، كومىردەن ەلەكتر ەنەرگياسىن ءوندىرۋدى ازايتۋ ماڭىزدى سانالادى. ءبىراق بىزدە ەكولوگيالىق تازا تەحنولوگياعا اۋىسا الاتىن ءوندىرىس ورىندارى دا بار. سونداي-اق، سامۇرىق-قازىنا سياقتى كوپتەگەن كومپانيالاردىڭ كومىرتەكسىزدەندىرۋگە قاتىستى وزىندىك ستراتەگيالارى ازىرلەنگەن. سونىمەن قاتار ءبىز قالالارمەن دە جۇمىس ىستەيمىز. قازاقستاندا «جاسىل قالالار باعدارلاماسىنا قوسىلعان ءتورت جاسىل قالا بار. ولار – الماتى، شىمكەنت، سەمەي جانە وسكەمەن. وسى كۇش-جىگەردىڭ بارلىعىن جۇيەلى تۇردە بىرىكتىرگەندە كومىرتەكتى بەيتاراپتىق ارمان ەمەس، اقيقات. 2060 جىلى كومىرتەگى بەيتاراپ قازاقستاندى كورەمىز دەپ سەنەمىن»،-دەدى ول.