الەمدە دوپينگپەن كۇرەس بارعان سايىن كۇشەيتىلۋدە.
وسى ماسەلەنى قاداعالايتىن دۇنيەجۇزىلىك اگەنتتىك سوڭعى جىلدارى تىيىم سالعان پرەپاراتتاردى قولدانعان سپورتشىلاردى جازالاۋدى قاتاڭداتا ءتۇستى، دەپ حابارلايدى Almaty-akshamy.kz.
دوپينگكە قارسى دۇنيەجۇزىلىك اگەنتتىك ءوزىنىڭ باستى قۇجاتى – دوپينگپەن كۇرەس جونىندەگى كودەكستى 6 جىلدا ءبىر رەت تالقىلايدى. ادەتتە ۇيىمنىڭ كەزەكتى باسقوسۋىنان كەيىن ەرەجەگە وزگەرتۋلەر ەنگىزىلىپ، ءتارتىپ قاتاڭداتىلادى. مىسالى، 2015 جىلى تىيىم سالىنعان زاتتاردى العاش رەت قولدانعان سپورتشىنى جارىستان شەتتەتۋ مەرزىمى 2 جىلدان 4 جىلعا ۇزارتىلدى.
«2012 جىلعا دەيىن دوپينگتى قولدانعان جەڭىل اتلەت سپورتتان 2 جىل عانا شەتتەتىلەتىن ەدى. ءقازىر جازا – 4 جىل. ءتارتىپ بۇزۋ مەن قولدانىلعان پرەپارات ءبىر بولعانىمەن، شەكتەۋ مەرزىمى ۇزارتىلعان»، - دەيدى سپورت ءجۋرناليسى ۆلاديمير يۆانوۆ.
ال سپورتشى دوپينگتى ەكىنشى رەت قولدانسا، جارىستاردان 8 جىلعا الىستاتىلادى. ساراپشىلار ۇزاق ۇزىلىستەن كەيىن ادامنىڭ ۇلكەن سپورتقا ورالۋى ەكىتالاي دەيدى. ءبىراق مۇنداي جاعدايلار جوق ەمەس.
«مىسال رەتىندە 2006 جىلعى امەريكالىق جەلاياق دجاستين گەتلينمەن بولعان وقيعانى ايتۋعا بولادى. ول العاش رەت دوپينگ قولدانىپ ۇستالعان سوڭ سپورتقا قايتا ورالدى. كوپ ۇزاماي تىيىم سالعان ءدارىنى تاعى قولداندى دەگەن ايىپپەن سپورتتان ەكىنشى رەت قۋىلادى. ءبىراق اتلەت بارلىق كىنانى جاتتىقتىرۋشى مەن دارىگەرلەرىنە جاۋىپ، جازا مەرزىمىن قىسقارتۋعا قول جەتكىزدى. كەيىن ۇلكەن دودالارعا قاتىسىپ، ۋسەين بولتتان وزىپ الەم چەمپيونى اتانادى»، - دەيدى سپورت ءجۋرناليسى ۆلاديمير يۆانوۆ.
دۇنيەجۇزىلىك دوپينگكە قارسى اگەنتتىك 2 جىل بۇرىن جاڭا كودەكس قابىلداپ، ءتارتىپ تاعى قاتاڭداتىلدى. ءبىراق جەڭىل ەسىرتكىلەرگە قاتىستى ءتارتىپ ءبىرشاما جەڭىلدەتىلگەن. اتلەت ولاردى جارىستان تىس كەزدەردە قولدانسا، سپورتتان باياعىداي بىرنەشە جىلعا ەمەس 3 ايعا عانا شەتتەتىلۋى مۇمكىن.
«ەگەر سپورتشى بۇل زاتتاردى سپورتتىق ماقساتتا قولدانباعانىن دالەلدەسە، شەكتەۋ شارالارىن 2-4 جىلدان 3 ايعا دەيىن ازايتۋىنا بولادى. ال وڭالتۋ باعدارلاماسىن وتۋگە كەلىسسە، شەكتەۋ 1 ايعا عانا سوزىلادى»، - دەيدى زاڭگەر سەرگەي لىسەنكو.
قالاي دەگەنمەن حالىقارالىق سپورتتا دوپينگكە جازا قاتال. تىيىم سالىنعان زاتتاردى پايدالانۋ سوڭى ۇلكەن سپورتپەن قوش ايتىسۋعا اكەلۋى مۇمكىن.