الماتى قالاسى قالا قۇرىلىسىن باقىلاۋ باسقارماسىنىڭ مالىمەتىنشە، بوستاندىق اۋدانىنداعى ءتورت قاباتتى اكىمشىلىك عيمارات ەكسپەريمەنتالنايا كوشەسىنىڭ سولتۇستىگى مەن حودجانوۆ كوشەسىنىڭ شىعىسىندا زاڭدى ورەسكەل بۇزا وتىرىپ سالىنعان. نىسان جوبا ەسكيزىنسىز سالىنعان، سونىمەن قاتار بەكىتىلگەن باس جوسپاردان اۋىتقۋلار تىركەلگەن، دەپ حابارلايدى اlmaty-akshamy.kz.
قالا قۇرىلىسىن باقىلاۋ باسقارماسى جانە مەنشىك يەسى اراسىنداعى سوت پروسەسى ەكى جىلدان استام ۋاقىت بويى جالعاسىپ كەلەدى. قىسقاشا سيپاتى مەن تانىستىرىپ وتەمىز.
2020 جىلدىڭ 6 ناۋرىزىندا تالاپ ارىز بوستاندىق اۋداندىق سوتىنا جىبەرىلدى. سوت ۇيعارىمىمەن تالاپ ارىز قاناعاتتاندىرىلىپ، الماتى قالالىق سوتىنىڭ 16.10.2020 جىلعى ۇيعارىمىمەن ءبىرىنشى ساتىداعى سوت شەشىمى وزگەرىسسىز قالدىرىلدى.
2021 جىلدىڭ 13 مامىرىندا مەملەكەتتىك سوت ورىنداۋشىسى مەنشىك يەسىنە سوت شەشىمىن ەرىكتى تۇردە ورىنداۋ تۋرالى حابارلاما جىبەردى. الايدا، بۇل ۋاقىتقا دەيىن مەنشىك يەسى جەر تەلىمىن باسقا جەكە تۇلعاعا ساتىپ جىبەرگەن، وسىعان بايلانىستى سوت ورىنداۋشىسى قاۋلىنى ورىنداۋسىز قايتارعان.
ءوز كەزەگىندە، قالا قۇرىلىسىن باقىلاۋ باسقارماسى جەر تەلىمىن ساتۋ شارتىن جارامسىز دەپ تانۋ تۋرالى تالاپ ارىزعا باستاماشى بولدى. 27.01.2022 جىلى سوت شەشىمىمەن مامىلە جارامسىز دەپ تانىلدى، الماتى قالالىق سوتىنىڭ 2022 جىلعى 27 ساۋىردەگى قاۋلىسىمەن شەشىم وزگەرىسسىز قالدىرىلدى.
اتقارۋ پاراعى الماتى قالاسى ادىلەت دەپارتامەنتىنە 2022 جىلدىڭ 05 مامىرىندا جولدانعان. نىساندى بۇزۋ 09.08.2022 جىلعا جوسپارلانعان بولاتىن. الايدا، سوت ورىنداۋشىسىنىڭ ارەكەتىنە شاعىمدانۋىن ەسكەرە وتىرىپ، بۇزۋ جۇمىستارى جۇرگىزىلمەگەن.
ودان ءارى جاڭادان اشىلعان ءمان-جايلارعا بايلانىستى ءۇشىنشى تۇلعا الماتى قالالىق سوتىنا بۇزۋ تۋرالى شەشىمگە اپەللياسيالىق شاعىم ءتۇسىردى. الماتى قالالىق سوتىنىڭ شەشىمىمەن اپەللياسيالىق شاعىم قاناعاتتاندىرۋسىز قالدىرىلدى.
بۇگىنگى كۇنى ورىنداۋ الماتى قالاسى ادىلەت دەپارتامەنتىنىڭ وندىرىسىندە، سوت ورىنداۋشىسىمەن نىساندى بۇزۋ مەرزىمى ءالى بەلگىلەنبەگەن.