پروموۋتەر ەددي حيرن گەنناديي گولوۆكين مەن ساۋل «كانەلو» الۆارەس اراسىندا بيىلعى قىركۇيەكتە وتەتىن ءۇشىنشى جەكپە-جەكتىڭ باستاپقى جوسپارىن راستادى، دەپ حابارلايدى almaty-akshamy.kz Sports.kz سايتىنا سىلتەمە جاساپ.
«Matchroom Boxing ءتوراعاسى ەددي حيرن كانەلو-بيۆول جەكپە-جەگىنىڭ پروموۋشنى بارىسىندا لاس-ۆەگاس قالاسىنىڭ كانەلو الۆارەس پەن گەنناديي گولوۆكين اراسىنداعى ءۇشىنشى جانە سوڭعى جەكپە-جەكتى وتكىزۋگە «ءسوزسىز فاۆوريت» ەكەنىن ايتتى. ونىڭ ايتۋىنشا، بولجامدى كۇن - 17 قىركۇيەك، ءبىراق ءالى تولىق شەشىم شىققان جوق»، - دەپ حابارلايدى Las Vegas Review Journal ءتىلشىسى سەم گوردون.
ەسكە سالا كەتسەك، GGG مەن كانەلو اراسىنداعى العاشقى ەكى جەكپە-جەك تە لاس-ۆەگاستىڭ T-Mobile ارەناسىندا ءوتتى.
ولاردىڭ ناتيجەسى تەڭ ەسەپ جانە تورەشىلەردىڭ كوپشىلىك شەشىمىمەن الۆارەستىڭ جەڭىسىمەن اياقتالعان.