قولونەر
ءساليما بۇگىندە جارى ەكەۋى ءتورت ۇل تاربيەلەپ وتىر. الماتىداي الىپ مەگاپوليس جاس وتباسىن جاتىرقاعان جوق، بىردەن قۇشاعىنا الدى. سەبەبى، ەكەۋى دە «ماعان ۇكىمەت بىردەڭە بەرسە» دەپ ەمەس، «ءوز كۇنىمىزدى ءوزىمىز كورەيىك، جاقسىلىققا قاراي قول سوزايىق، ءسويتىپ باقىتتى بولايىق» دەپ كەلگەن بولاتىن اۋىلدان. «جانامىن دەگەن جۇرەكتەرگە وت بەرگەن» الماتىنىڭ سەنىمىن اقتاپ جۇرگەن سەكىلدى ءقازىر.
ءبارىن باسىنان ايتايىقشى.
اڭىز-اڭگىمە
ءساليما سەرىك قىزى قاراپايىم، قازاقى ءداستۇردى ۇستانعان وتباسىندا، قازاقى اۋىلدا دۇنيەگە كەلگەن. اناسى ناعيمانىڭ تىگىنگە جاقىندىعى بار. ءىس تىككەننەن قالعان ماتالاردىڭ قيىندىلارىنان ءساليمانىڭ قۋىرشاقتارىنا ادەمى كويلەكتەر، سۇپ-سۇيكىمدى شالبارلار تىگىپ بەرەتىن. ءبىر قىزىعى، اناسى دۇكەننەن الىپ كەلگەن كويلەگىن سول كۇيىندە كيە سالمايتىن، ايتەۋىر ءبىر جەرىن قيىپ، قىسقارتىپ، قايتا تىگىپ، باسقا بىردەڭەلەر جاپسىرىپ جۇرەتىنى ەسىندە. بالاباقشادا، مەكتەپتە وتەتىن مەرەكەلىك ءىس-شارالاردا كىشكەنتاي ءساليما وزگەشە كيىنىپ شىعاتىن. بىردە چەبۋراشكا بولىپ شىقسا، كەلەسىدە جارقىراپ كۇن بولىپ تۇراتىن. انا قانىمەن دارىعان قولونەر ءساليمانى اقىرى وسى كاسىپكە الىپ كەلدى.
– ءالى ەسىمدە. بالا كۇنىمدە اجەمە كىتاپتاردان اڭىز-اڭگىمەلەر وقىپ بەرەتىنمىن. سونداعى ءبىر وقيعا دا ءالى جادىمدا. شاعىن عانا اڭگىمە كەيىپكەرى ءساليما دەگەن قىز كۇندەردىڭ كۇنىندە الىسقا ۇزاتىلادى. اناسى «بارعان جەرىڭە تاستاي باتىپ، سۋداي ءسىڭ» دەپ وسيەتىن، ۇلاعاتىن ايتا كەلە: «ۇستىڭە ءبىر ساباق ءجىپ بولسا دا كۇنىگە ءىلىپ ءجۇر، قىزىم!»، – دەيدى. ارادا جىل ءوتىپ، اناسى قىزىن ساعىنىپ، ارتىنان بارسا، ءۇستى-باسى ءجىپ-جىپ، سابالاق بولىپ قىزى الدىنان شىعىپ تۇر دەيدى. «مىناۋىڭ نە، قىزىم؟»، – دەپ تاڭدانعان اناسىنا: «ءوزىڭىز ايتپاپ پا ەدىڭىز، كۇندە ۇستىڭە ءبىر ساباق ءجىپ بولسا دا ءىلىپ ءجۇر دەپ»، – دەيدى. ال اناسى «ولپى-سولپى بولما، جان-جاعىڭدى ۇقىپتى، كيىمدەرىڭدى ءبۇتىن ۇستا، قولىڭ بوس بولماسىن، ءىس ىستەپ، جىرتىعىڭ بولسا دا جاماپ ءجۇر» دەگەندى مەڭزەگەن عوي. سول ايتقانداي، ايەل زاتى رەتىندە كۇنىگە بىردەڭە تىگۋگە تىرىسامىن. قولىما ينە-جىپ ۇستاماسام، وتىرا المايمىن، – دەپ كۇلەدى ءساليما.
ءمولدىر مونشاقتار
جوعارى وقۋ ورنىندا وقىپ جۇرگەندە دە تىگىنگە اسا قىزىقتىم دەپ ايتا المايدى. قالادا اكەسىنىڭ قارىنداسىنىڭ قولىندا تۇرىپ وقىعاسىن، تىگىنشىلىكپەن اينالىسقان سول كىسىگە ساباق اراسىندا كومەكتەسەتىنى بار-دى. ۋنيۆەرسيتەتتى «قىزىلعا» ءبىتىردى. قيىنداۋ كەزەڭ. ىسكەر بىرنەشە قىز اقىلداسىپ، زەرلەۋ سەحىنا جۇمىسقا تۇرادى. ودان بىرنەشە ءسان سالونىندا، پەردەلەر تىگەتىن سالوندا دا ىستەيدى. سونىڭ ءبارى ءساليماعا ۇلكەن تاجىريبە مەكتەبى بولدى. جۇمىس ىستەپ جۇرگەن ءسان سالونىنا پاندەميا كەزىندە تاپسىرىستار ازايىپ، قىزمەتكەرلەر اقىسىز دەمالىسقا كەتتى. وتاعاسىنىڭ جالعىز قاراجاتىنا قاراپ وتىرعىسى كەلمەي، مەكتەپكە جۇمىسقا كىردى. ءتورتىنشى ۇلىن بوسانىپ، ءقازىر بالامەن ۇيدە وتىر. سول باياعى ادەتپەن ءجاي وتىرا المايدى. قولىنان ينە-جىبى تۇسپەيدى. وتاعاسىن جۇمىسقا، بالالارىن ساباققا جىبەرىپ، بوبەگىن ۇيىقتاتىپ قويىپ، مونشاقتارىن تۇزەدى. كوبىنە قول جۇمىسىمەن اينالىسادى. ءتۇرلى ساپالى ماتالاردان بانتيكتەر تىگىپ، ونىڭ بەتىن مايدا مونشاقتارمەن كومكەرەدى. وبودوك، شاش قىستىرعىشتارعا دا ورنالاستىرىلاتىن ءاربىر مونشاقتىڭ، كانيتەلدىڭ بىركەلكى، ءتۇزۋ ورنالاسۋىنا قاتتى ءمان بەرەدى. بالالاردىڭ مەرەكەلىك كونسەرتتەرگە تاعۋىنا بولاتىن ويۋ-ورنەكتى بەلدىك تە تىگەدى. قولعا العان جۇمىسىن ۇلكەن، كىشى دەپ بولمەيدى، ءبارىن دە ىقىلاسپەن تىگەدى. تىگەتىن بۇيىمدارىنا كەتەتىن شيكىزاتتار قىمبات بولسا دا، دايىن ونىمدەرىنەن تۇسەتىن تابىس اسىپ-توگىلىپ جاتپاسا دا، بارىنا قاناعات ەتەدى. ەڭ باستىسى – سۇيەتىن، جۇرەگىن تىنىشتىققا بولەيتىن كاسىبى بار.
ترەندتە – تاقيا
وسى بۇيىمداردىڭ ءتۇر-تۇرى ءبىر جىلدارى قارا بازاردا تولىپ تۇرىپ ەدى-اۋ. ءبارى قىتايدىكى بولاتىن. ساپاسىز، ءبىر تاققان سوڭ كەلەسى قولدانىسقا جاراماي قالاتىن. ءقازىر ءوزىمىزدىڭ قىز-كەلىنشەكتەر قولونەرمەن مىقتاپ اينالىسىپ، ناتيجەسىندە الگىندەي بۇيىمدار، اشەكەي زاتتار كوپتەپ شىعا باستادى. ءارى ساپالى. تۇتىنۋشى دا ءقازىر قولونەردى جاقسى باعالايتىن دەڭگەيگە جەتكەن، ساپاسىن دا اجىراتا بىلەدى.
بايقايسىز با، ءقازىر ارۋلارىمىز كۇندەلىكتى ومىردە دە تاقيالار كيە باستادى. تاقيا ترەندتە. بۇل قۋانارلىق جاعداي. ۇيدە وتىرعان ءساليماعا دا «تاقيا تىگىپ بەرسەڭىز» دەگەن تاپسىرىستار تۇسە باستادى. قالاعان ولشەم، ديزايندا جاساپ، تىگىپ بەرەدى. ەندى بەلدىگىمەن تىگۋگە ۇسىنىس ءتۇسىپ جاتقان كورىنەدى. قىزدار ونىڭ التىن قولىنان شىققان تاقياسىن قۋانا-قۋانا، راحمەتىن جاۋدىرا كيىپ بارا جاتقاندا، تاعى دا تىككىسى كەلىپ، ودان اسىرىپ تىگۋگە شابىتتانىپ الا جونەلەتىنى بار. ءيا، الماتى كوشەلەرىندە ونەردى، ءومىردى، وتباسىن سۇيەتىن ءساليمانىڭ دا تاقيالارىن كيىپ جۇرگەن بويجەتكەندەر از ەمەس.
ءتوزىم، سابىر جانە ماحاببات
بالامەن وتىرعان سوڭ، بۇگىندە جانىنا كومەكشى العان. ونى دا ءوزى ۇيرەتكەن.
– مىنەزى سالماقتى بولماسا، كوبى شىداي بەرمەيدى بۇل كاسىپكە. ۋاقىتىم بولعاندا ونلاين-ساباق سۇراعاندارعا شەبەرلىك سىنىبىن وتكىزەتىنىم بار. سوندا ۇيرەنەمىن دەۋشىلەردىڭ الدىمەن مىنەزىنە، ورنىقتىلىعىنا كوپ قارايمىن. پەردەلەر سالونىندا شەبەر بولىپ جۇمىس ىستەپ جۇرگەنىمدە شاكىرتتەردى ءوزىم ۇيرەتىپ، ىشىنەن تاڭداپ جۇمىسقا قالدىراتىنمىن. كوزدىڭ مايىن سىعىپ الاتىن بۇل جۇمىستارعا اسا تالعامپازدىقپەن بىرگە ءتوزىم، شىدام، تاباندىلىق جانە قولونەرگە دەگەن ماحاببات كەرەك، – دەيدى ءساليما ەسجانوۆا.
قولداۋشىلارى – جارى، تۋىستارى. ولار ءساليمانىڭ ءتاي-تايلاپ ەندى باستاعان كاسىبى ءجۇرسىن دەپ، جاقسى دۇنيەلەردى بىر-بىرىنە جارنامالاپ جۇرگەنى. ال جۇبايى جاسۇلان – دايىن ونىمدەردى تاپسىرىس بەرۋشىگە جەتكىزۋشى. «سەنىڭ قولىڭنان ءبارى كەلەدى، بوتام! ءبىز ساعان سەنەمىز»، – دەپ، شالعايدا جاتقان اۋىلداعى قوس اناسى دا ءسوز كومەگىن بەرگەندە، شابىتىنا شابىت قوسىلاتىنى بار.
مەنىڭشە، ينە-جىپكە جاقىن كەز كەلگەن ايەل نازىك بولىپ كورىنەتىن سەكىلدى. ياعني كەز كەلگەن قولونەر جۇمىسى ايەلدىڭ ايەلدىگىن ارلەي تۇسەتىن سەكىلدى مە، قالاي. ءساليما قىز-كەلىنشەكتەرگە ونەرى ارقىلى سۇلۋلىق سىيلاعىسى، ولارعا ارناپ ادەمى كويلەكتەر، بەلدەمشەلەر تىككىسى كەلەدى. ءبىراق وعان ازىرگە قولىندا بار قاراپايىم تىگىن ماشيناسى جارامايدى. ال جازدىق كويلەكتەردى تىگۋگە مىندەتتى تۇردە وۆەرلوگ كەرەك.
ءتۇيىن. ول بولاشاقتا كاسىبىن كەڭەيتۋدى ارماندايدى. جەكە كاسىپ اشامىن دەپ نيەتتەنگەندەرگە مەملەكەت تاراپىنان بەرىلىپ جاتقان جەڭىلدەتىلگەن نەسيەگە ءوتىنىش بەرىپ، تالاپتانىپ كورگىسى كەلەدى. ازىرگە بوبەگىنىڭ اياقتانعانىن كۇتىپ ءجۇر. ۇيدە جىلىلىق، بەرەكە-بىرلىك بولسا، بارىنە دە جەتۋگە بولادى دەپ سەنەدى. ءبىز دە وعان سەنەمىز.