وقۋ-اعارتۋ مينيسترلىگىنىڭ جانىنان ءبىلىم بەرۋ سالاسىنداعى مەملەكەتتىك ساياساتتى دامىتۋعا باعىتتالعان كەشەندى شەشىمدەر ازىرلەۋ ماقساتىندا 2023 جىلى ارداگەرلەر كەڭەسى قۇرىلعان بولاتىن.
مۇنداي كەڭەستەر ەلىمىزدىڭ بارلىق وڭىرىندەگى ءبىلىم باسقارمالارى جانىندا دا جۇمىس جاساۋدا. ولاردىڭ قۇرامىنا ءبىلىم سالاسىندا ۇزاق جىلدار قىزمەت اتقارعان زەينەتتەگى ۇستازدار، قوعام جانە مەملەكەت قايراتكەرلەرى ەنگەن، دەپ حابارلايدى aqshamnews.kz وقۋ-اعارتۋ مينيسترلىگىنە سىلتەمە جاساپ.
كەڭەس وتىرىسىندا ءبىلىم ساپاسىن ارتتىرۋ جانە تاربيە جۇمىسىن كۇشەيتۋگە باعىتتالعان ماڭىزدى ماسەلەلەر قارالدى. مينيستر سونداي-اق، جاس پەداگوگتەرگە تالىمگەرلىك كورسەتۋ، كاسىبي تاجىريبە ساباقتاستىعى، بالا تاربيەسىندەگى وتباسى مەن قوعامنىڭ ءرولى سەكىلدى نەگىزگى باسىمدىقتاردى اتاپ ءوتتى.
«سىزدەر وتاندىق ءبىلىم بەرۋ جۇيەسىنىڭ دامۋىنا زور ۇلەس قوستىڭىزدار. بۇگىن ءبىزدىڭ الدىمىزدا – قارقىندى دامىپ جاتقان زاماندا ەلدىڭ جاڭا بۋىنىن تاربيەلەۋ مىندەتى تۇر. ارداگەر ۇستازدار – ءبىزدىڭ قازىنامىز. ۇزاق جىلدار مول تاجىريبەسى بار ارىپتەستەرىمىزدىڭ كاسىبي كومەگىنە سەنىم ارتامىز. بىرلەسكەن كۇش-جىگەرىمىزبەن بالالارىمىز ءۇشىن بارىنشا جاقسى جاعداي جاسايمىز دەپ سەنەمىن»، – دەدى عاني بەيسەمبايەۆ.
مينيستر ارداگەرلەر كەڭەسىنىڭ قوعامداعى ءرولىن نىعايتۋ ماقساتىندا وڭىرلىك ءبىلىم باسقارمالارىنىڭ باسشىلارىنا ولاردىڭ پەداگوگيكالىق ۇجىمدارمەن كەزدەسۋلەرىن ۇيىمداستىرۋدى تاپسىردى.
«ءبىز ءوز بىلىمىمىزبەن، تاجىريبەمىزبەن بولىسۋگە ءاردايىم دايىنبىز. ورتاق ماقساتىمىز – مىقتى دا ادال ۇرپاق تاربيەلەۋ. ءبىلىم سالاسىنىڭ دامۋىنا شىن جاناشىرلىقپەن الاڭداپ وتىرامىز. ۇستاز رەتىندە ەل بولاشاعىنا بەي-جاي قاراي المايمىز. ۇرپاق تاربيەلەۋ ىسىنە بەلسەنە ارالاسۋ – ءبىزدىڭ ازاماتتىق بورىشىمىز»، – دەدى كەڭەس مۇشەسى، قوعام قايراتكەرى كۇلاش ءشامشيدينوۆا.
سونداي-اق جيىندا پەداگوگ ماماندىعىن، ۇستازدار اۋلەتتەرىن دارىپتەۋ تۋرالى ۇسىنىستار ايتىلدى. كەڭەس وتىرىسى ءبىلىم بەرۋ سالاسىنداعى وزەكتى ماسەلەلەردى تالقىلاپ، تاجىريبە الماسۋعا ارنالعان ءتيىمدى الاڭعا اينالدى.