الماتى اپورتىنىڭ دامىمەن "قازاقستان" قوناق ءۇيىن قاعاز بەتىنە بەينەلەپ تۇرعان سۋرەتشىنىڭ جەلىدەگى بەينەجازباسىن كورگەن بولارسىز. قۇددى ءبىر كوركەم شىعارمانىڭ سۋرەتتەۋىن كوز الدىڭىزعا اكەلەتىن جاننىڭ كىم ەكەنىن بىلەسىز بە؟ بۇل - ەۋروپانى باعىندىرعان جالعىز الماتىلىق كاسىبي سۋرەتشى رىسبەك يسكاكوۆ. اqshamnews.kz ءتىلشىسى جەلى جۇلدىزىنا اينالعان سۋرەتشىمەن تىلدەستى.
كەمەل كەلەشەككە جەتەلەگەن بالا ارمان
رىسبەك يسكاكوۆ - 1956 جىلى تالدىقورعان وبلىسى، ۇشتوبە قالاسىندا دۇنيەگە كەلدى. ول بالا كەزىنەن-اق سۇيىكتى ءىسى - بەينەلەۋ ونەرىنە ءومىرىن ارنادى. سىبىردەگى يركۋتسك ونەر ۋچيليششەسىندە ءبىر جىل ءبىلىم الىپ، كەيىن نيكولاي گوگول اتىنداعى كوركەمسۋرەت ۋچيليششەسىن ءتامامدادى. بىرنەشە جىل مۇحتار اۋەزوۆ اتىنداعى تەاتردا قويۋشى-سۋرەتشى بولىپ جۇمىس ىستەدى.
"ەگەر قۇداي ماعان تۋعانىمنان وسىنداي تالانت دارىتسا، وندا مەنىڭ ميسسيام - ونى وزگە جۇرەكتەرگە جەتكىزۋ. بەينەلەۋ ونەرى - سۋرەتشى الەمىن سيپاتتاۋعا ۇمتىلاتىن ءتىل. مەن ءۇشىن ول ەڭ الدىمەن، حالقىمىزدىڭ باي تابيعاتى مەن بىرەگەي مادەنيەتى"، - دەيدى رىسبەك اتا.
سۋرەت: كەيىپكەردىڭ جەكە مۇراعاتىنان
ەۋروپاعا باستاعان داڭعىل جول
سۋرەتشى وقۋىن ءتامامداعان سوڭ رەسەي، گەرمانيا، فرانسيا ەلدەرىندە 8 جىلدان اسا ۋاقىت جۇمىس ىستەپ، ءوزىنىڭ قولتاڭباسىن قالىپتاستىردى. يسكاكوۆ كارتينالارىندا قازاقى ءومىردى رومانتيكالىق رەڭكتە بەينەلەپ، ۇلتتىق تەماتيكاداعى زاماناۋي كارتينالاردىڭ اۆتورى اتاندى.
"پاريجدە ءبىراز ۋاقىت جۇمىس ىستەدىك. مونمارتر، ەيفەل تاعىسىن-تاعى ادەمى نۇكتەلەردى قاعازعا تۇسىردىك. ەۋروپا ماعان ۇلكەن تاجىريبە سىيلادى"، - دەيدى سۋرەتشى.
سۋرەتشى پاريجدە ناتاليا بونداريەۆا اتىنداعى گالەرەياعا جۇمىستارىن ۇسىنعان. كەيىن پلەنەر (اشىق اسپان استىندا سۋرەت سالۋ - ەسك.) باعىتىن جانىنا جاقىن تارتىپ، سۋرەت ونەرىنىڭ سول تۇسىنا قاراي ويىسقان. ءقازىر ول وتانعا ورالعان سوڭ دا پلەنەرگە وتە ءجيى شىعاتىنىن ايتتى.
سۋرەت: كەيىپكەردىڭ جەكە ارحيۆىنەن (پاريجدەگى پلەنەر سۋرەتتەرى)
"ەڭ قىمبات كارتينامدى ءبىر كۇندە سالىپ، 4،5 مىڭ دوللارعا ساتتىم"
پلەنەر باعىتىنان ەرەكشە شابىت الاتىن رىسبەك يسكاكوۆ الماتى تاۋلارىن، تابيعاتىن جاقسى كورەتىنىن ايتتى. بىرنەشە جىل بويى الماتى پەيزاجىن بەينەلەپ ءجۇرىپ، ءوزىنىڭ ەڭ قىمبات كارتيناسىن ءبىر كۇندە سالىپ بىتكەن:
"ەڭ قىمبات وتكەن تۋىندىم - كولەمى شامامەن 2×4 مەترلىك تاپسىرىسپەن سالىنعان كارتينا. ونى رامازان ايىندا، بەلگىلەنگەن مەرزىمگە ۇلگەرۋ كەرەك بولعاندىقتان، ءبىر كۇندە جازىپ شىقتىم. باعاسى - 4،5 مىڭ دوللار (تەڭگەگە شاققاندا 2025 جىلعى قۇنمەن - 2 423 521 تەڭگە). ونەردىڭ باعاسى ءوز الدىنا بولەك اڭگىمە، ءبىراق مەن ءۇشىن ماڭىزدىسى - ويدىڭ ايقىندىعى مەن نيەتتىڭ تازالىعى" ، - دەيدى سۋرەتشى يسكاكوۆ.
ول جەلىدە تاراعان ۆيدەودا پلەنەردە "قازاقستان" قوناق ءۇيىن بەينەلەپ تۇرعان ەدى. رىسبەك اتا ءوزىنىڭ جەلى جۇلدىزىنا اينالعانىن بىلمەي دە قالعان:
"مەن الماتىدا پلەنەرگە وتە ءجيى شىعامىن. ءقازىر پەيزاجدان اۋىسىپ، ارحيتەكتۋرالىق كارتينالاردى سالىپ ءجۇرمىن. جاقىندا مەنىڭ ۆيدەومدى جەلىدە ءبىر كىسى تاراتىپتى. كورگەن جاندار كەلىپ، تانىپ جاتىر. مەن ولارعا العىسىمدى ءبىلدىردىم دە قويدىم"، - دەيدى سۋرەتشى.
ونەر قۇندىلىعى، جي ماسەلەسى: سۋرەتشىنىڭ ويى قانداي؟
سۋرەتشى ونەرگە ارناعان ومىردە تۇيگەنىن، ويىن ءبولىستى:
"سۋرەت سالۋ - ءارى ەڭبەك، ءارى دەمالىس؛ كەيدە ورىندىعىڭ ىڭعايسىز، شاي دا جوق، تۇسكى اسقا دا ۇلگەرمەيسىڭ. ءبىراق شىعارماڭ ءساتتى شىقسا، ءبارى ۇمىتىلادى. ويتكەنى ونەردى قادىرلەۋ - سول قولايسىزدىقتارعا ءتوزۋ. ال ءقازىر شىعىپ جاتقان جاساندى ينتەللەكت جۇمىستى جەڭىلدەتكەنىمەن، وندا سەزىم جوق، سوندىقتان ول قانشا ۋاقىت وتسە دە شىنايى تالانتتىڭ قولتاڭباسىن، جۇرەك جىلۋىن، بوياۋدى سەزىنۋىن الماستىرا المايدى" ، - دەدى سۋرەتشى رىسبەك اتا.
