16 قازان – دۇنيەجۇزىلىك نان كۇنى. وسىعان وراي الماتى مەملەكەتتىك بيزنەس كوللەدجى «نان-FEST – 2025» اتتى قالالىق كاسىبي شەبەرلىك بايقاۋىن ۇيىمداستىردى.
فەستيۆالدىڭ باستى ماقساتى – جاستاردىڭ ەڭبەككە دەگەن سۇيىسپەنشىلىگىن ارتتىرۋ، ناۋبايشى ماماندىعىنىڭ ماڭىزىن تانىتىپ، جۇمىسشى مامانداردىڭ قوعامداعى بەدەلىن نىعايتۋ. سوعان قوسا، شىعارماشىلىق ارقىلى ۇلتتىق ءداستۇر مەن زاماناۋي كاسىبيلىكتى ۇشتاستىرۋدى كوزدەگەن.
الماتى قالاسى مەن الماتى وبلىسىنىڭ ۇزدىك كوللەدج ستۋدەنتتەرىنەن بولەك، ءىس-شاراعا الماتى قالاسى ءبىلىم باسقارماسىنىڭ وكىلدەرى، الەۋمەتتىك سەرىكتەستەر، جۇمىس بەرۋشىلەر جانە ب ا ق وكىلدەرى قاتىستى. ولار كاسىبي ءبىلىم سالاسىنداعى تاجىريبە الماسۋ مەن سەرىكتەستىك ديالوگتىڭ جاڭا مۇمكىندىكتەرىن تالقىلادى.
– بۇگىنگى ءىس-شارا ءبارىمىز ءۇشىن ماڭىزدى. قاتىسۋشىلار بىر-بىرىمەن سايىسىپ قانا قويماي، دوستىق قارىم-قاتىناس ورناتادى دەپ سەنەمىز. بايقاۋعا قاتىسۋ ءۇشىن كوللەدجەرگە ارنايى شاقىرۋ جىبەردىك، ءارقايسىسى ەڭ مىقتى ستۋدەنتتەرىن وزدەرى ۇسىندى. بايقاۋ جەڭىمپازدارىنا الەۋمەتتىك سەرىكتەستەرىمىز دەمەۋشىلىك ەتەدى. توپ جارىپ، قاراجات قولدارىنا تيگەن ستۋدەنتتەردىڭ ەڭبەككە دەگەن قۇلشىنىسى ارتا تۇسەتىنى انىق، – دەدى الماتى مەملەكەتتىك بيزنەس كوللەدجىنىڭ ديرەكتورى اينۇر مۇقاجانوۆا.
«نان-FEST» بايقاۋى بيىل ءۇشىنشى رەت ۇيىمداستىرىلىپ وتىر. العاشقى جىلدارداعى جەتىستىكتەردىڭ جالعاسى رەتىندە بيىلعى فەستيۆال كاسىبي تاجىريبە مەن شىعارماشىلىقتى توعىستىرعان جاڭا دەڭگەيگە كوتەرىلدى.
– ءبىزدىڭ داستارحانىمىزداعى ناننىڭ وزىندە زور ەڭبەك جاتقانى بارىمىزگە بەلگىلى. ناندى قادىرلەپ اق داستارحانىمىزدىڭ تورىنە قويامىز. ناندى قادىرلەۋ، ونى ۇنەمدەۋ ۇلتتىق داستۇرىمىزگە دە اينالعان. اتا-بابالارىمىزدىڭ دانالىعىن جاستار ۇلگى-ونەگە رەتىندە كورسە ەكەن دەيمىن. بۇل – نانعا دەگەن قۇرمەتتىڭ بەلگىسى، – دەدى «قالالىق ءبىلىم بەرۋدەگى جاڭا تەحنولوگيالار مەن عىلىمي-ادىستەمەلىك ورتالىعى» كمقك تەحنيكالىق جانە كاسىپتىك ءبىلىم بەرۋ ءبولىمىنىڭ باسشىسى گۇلنار سۇلەيمەنوۆا.
بايقاۋعا الماتى قالاسى مەن الماتى وبلىسىنىڭ 12 كوللەدجىنەن ۇزدىك ستۋدەنتتەر قاتىستى. جاس ناۋبايشىلار ءوز شەبەرلىكتەرىن ءۇش باعىتتا تانىتىپ، نان ءپىسىرۋدىڭ ءداستۇرى مەن زاماناۋي تەحنولوگيالارىن ۇيلەستىردى. مۇنداي بايقاۋلار «WorldSkills»، «Jasskills» جانە «جۇمىسشى ماماندىقتار جىلى» جوبالارىنىڭ ساباقتاستىعىن جالعاستىرىپ، ەلدىڭ ەڭبەك نارىعىنا ساپالى ماماندار دايارلاۋعا جول اشادى.
«نان-FEST – 2025» – بۇل تەك كاسىبي بايقاۋ ەمەس، ەڭبەك ادامىنا ارنالعان قۇرمەت مەرەكەسى. بايقاۋ ءۇش مودۋلدەن تۇردى: ا ءمودۋلى – «قيش پيروگى»؛ B ءمودۋلى – «حالا ءورىمى»؛ C ءمودۋلى – «ەڭبەك جانە ءداستۇر» تاقىرىبىنداعى دەكوراتيۆتى جۇمىس.
بايقاۋ تەحنيكا قاۋىپسىزدىگى، ۇيىمداستىرۋشىلىق، ءدام مەن ساپا، كرەاتيۆتىلىك جانە كاسىبي شەبەرلىككە قاراي باعالاندى. بايقاۋ قورىتىندىسى بويىنشا ۇزدىك ستۋدەنتتەر مەن تالىمگەرلەر ارنايى ماراپاتتارعا يە بولدى. ءىس-شارا الماتىنىڭ كاسىبي ءبىلىم بەرۋ كەڭىستىگىندە جاڭا سەرپىن بەرىپ، حالىقارالىق ىنتىماقتاستىق پەن ەڭبەك قۇندىلىعىن دارىپتەۋدىڭ ۇلگىسىنە اينالدى.
جانسۇلۋ ابەنباي، ساراپشى:
تازالىق پەن ساپاعا نازار اۋدارامىز
قاتىسۋشىلار وزدەرىنىڭ قابىلەتتەرىن بارىنشا كورسەتەدى. بايقاۋدا شىدامدىلىق، جەڭىس پەن جەڭىلىس جولىندا توزىمدىلىك سىنالادى. باعالاۋدا ءدام مەن جىلدامدىققا عانا ەمەس، تازالىق پەن ساپاعا دا باسا نازار اۋدارامىز. ءار قاتىسۋشىنىڭ كيگەن كيىمدەرى مەن اس دايىندايتىن ۇستەلدىڭ تازالىعى دا ساي بولۋى كەرەك.
ادەل قالان، قاتىسۋشى:
بايقاۋدان جەڭىس كۇتەمىن
حالىقارالىق ينجەنەرلىك تەحنولوگيالىق ۋنيۆەرسيەتى كوللەدجىنىڭ 2-كۋرس ستۋدەنتىمىن. بايقاۋعا قاتىسقانىما قۋانىشتىمىن. سايىسقا ءبىر اپتا تىڭعىلىقتى دايىندالىپ كەلدىم. مۇنداي بايقاۋعا العاش رەت قاتىسىپ وتىرعاندىقتان، ۇستازدارىما جانە قولداپ كەلگەن دوستارىما العىس ايتامىن. ولاردىڭ قولداۋى مەن ءۇشىن اسا ماڭىزدى.