اەس-تە جىلۋ بالانسى دەگەن ۇعىم بار، ول تەمپەراتۋرانى رەتتەۋ ءۇشىن قاجەت. جىلۋدى الۋ ءۇشىن ارنايى گراديرنيالار قولدانىلادى، سول سەبەپتى اتوم ەلەكتر ستانسيالارىنىڭ جانىندا تۇرعان ۇلكەن مۇرجالاردان اق بۋ شىعادى — بۇل ارتىق جىلۋدىڭ سالدارى.
بالقاش كولىنىڭ ءوزى جىل سايىن شامامەن 1،5 مەتر بۋلانىپ وتىرادى، ءبىراق ءالى كۇنگە دەيىن تولىق قۇرعاعان جوق. ال اتوم ستانسياسى كولدەن تەك تابيعي بۋلاناتىن سۋدىڭ 0،32%-ىن عانا پايدالانادى. بۇل وتە از كولەم، سوندىقتان ول بالقاشتىڭ سۋ دەڭگەيىنە ەشقانداي اسەر ەتپەيدى. سونىمەن قاتار، الەمدە ەشبىر سۋ قويماسى اتوم ستانسياسى سالدارىنان كەۋىپ قالماعان. كەرىسىنشە، مۇنداي ايماقتاردا بالىق شارۋاشىلىعى دامىپ، بالىق اۋلاۋ ونەركاسىبى گۇلدەنىپ، حالىقارالىق سپورتتىق بالىق اۋلاۋ تۋرنيرلەرى وتكىزىلەدى.
اەس-تى سۋ قويمالارىنىڭ جانىندا سالۋ — الەمدىك تاجىريبەدە قالىپتى جاعداي. بالقاش كولىنىڭ سۋى ستانسيانى تەك سالقىنداتۋ ءۇشىن پايدالانىلادى، ال ەشقانداي پايدالانىلعان سۋ قايتادان كولگە قۇيىلمايدى. سۋ تەك ءبىر جاقتى قولدانىلادى.
سونىمەن قاتار، رادياسيانىڭ كولگە ءتۇسۋ ءقاۋپى مۇلدەم جوق، ءتىپتى اۆاريا بولعان جاعدايدا دا. اەس-تە ەكى جابىق سۋ كونتۋرى قولدانىلادى: ءبىرىنشى كونتۋر رەاكتورمەن بايلانىستا جانە تولىقتاي وقشاۋلانعان. ال ەكىنشى كونتۋر — كادىمگى سۋ، ول جىلىتىلادى، بۋعا اينالىپ، تۋربينانى اينالدىرىپ، ەلەكتر ەنەرگياسىن وندىرەدى، سودان كەيىن قايتا سالقىنداتىلادى. بۇل ەكى كونتۋر ەشقاشان بىر-بىرىمەن قيىلىسپايدى، سول سەبەپتى ەكولوگياعا ءقاۋىپ توندىرمەيدى.
اتوم ەنەرگياسى — بۇل تۇراقتى جانە ەكولوگيالىق تازا ەنەرگيا كوزى. قازاقستاننىڭ ەنەرگيا قاجەتتىلىگىن قامتاماسىز ەتۋ ءۇشىن وسى سالانى دۇرىس ءتۇسىنۋ جانە دامىتۋ وتە ماڭىزدى.