كوپشىلىك ويلاعانداي، ەگەر ءبىز اەس سالاتىن بولساق، بۇل شەتەلدىك تەحنولوگياعا تولىقتاي تاۋەلدى بولۋ دەگەندى بىلدىرمەيدى. سەبەبى، الەمدە بىردە-بىر مەملەكەت اتوم ەلەكتر ستانسياسىن تولىقتاي وزدىگىنەن سالعان ەمەس.
بۇل جەردە تاجىريبە، تەحنولوگيالىق بازا جانە مامانداردىڭ بولۋى ماڭىزدى ءرول اتقارادى. ەگەر ەلدە اەس سالۋ تاجىريبەسى بولماسا، بۇل باعىتتا دايىندىق قاجەت.
اەس سالۋ كەزىندە مىندەتتى تۇردە باس مەردىگەر بولۋى قاجەت. مەنىڭ ويىمشا، بۇل ەل اتوم ونەركاسىبىندە كەم دەگەندە 30 جىلدىق تاجىريبەسى بار ەل بولۋى ءتيىس. بۇل شەشىم ساياسي ەمەس، تەك ەكونوميكالىق تۇرعىدان قاراستىرىلۋى قاجەت. بىزگە ەڭ سەنىمدى، ءتيىمدى جانە قازاقستانعا قولايلى نۇسقانى تاڭداۋ ماڭىزدى.
مەن ەلىمىزدىڭ ماماندارى لوكاليزاسيا ماسەلەلەرىن بارىنشا قاراستىرادى دەپ سەنەمىن. وعان وتىن ءوندىرىسى، قازاقستاندىق كادرلاردى دايارلاۋ، جابدىقتاردى جەتكىزۋ جانە سەرۆيستىك قىزمەتتەردى كورسەتۋ سياقتى ماسەلەلەر كىرەدى. وسىلايشا، قازاقستان اەس-تى وزدىگىنەن باسقارىپ، قىزمەت كورسەتە الادى جانە تەحنولوگيالىق تاۋەلدىلىكتەن ساقتانادى.
اتوم ەنەرگەتيكاسى ءبىزدىڭ بولاشاعىمىز ءۇشىن ماڭىزدى، سوندىقتان ءبىز بۇل قادامدى بارىنشا ءتيىمدى تۇردە جاساۋىمىز كەرەك.