ەرەكشە قاجەتتىلىكتەرى بار ازاماتتاردى الەۋمەتتىك قولداۋ – ەرەكشە باقىلاۋدا
الماتى اكىمى ەربولات دوسايەۆ قالانىڭ ينكليۋزيۆتى ورتاسىن دامىتۋ جونىندەگى كەڭەستىڭ I وتىرىسىن وتكىزدى، وندا ەرەكشە قاجەتتىلىكتەرى بار ادامداردىڭ قۇقىقتارىن ىسكە اسىرۋ ءۇشىن ولاردى الەۋمەتتەندىرۋ جانە قوعامعا ينتەگراسيالاۋدا تەڭ مۇمكىندىكتەر جاساۋ ماسەلەلەرى قارالدى
كەڭەستىڭ قۇرامىنا بارلىق ساناتتاعى ەرەكشە قاجەتتىلىكتەرى بار ادامداردىڭ مۇددەلەرىن بىلدىرەتىن قوعامدىق بىرلەستىكتەردىڭ باسشىلارى، ادام قۇقىقتارى جانە بالا قۇقىقتارى جونىندەگى ۋاكىلدەر، ءماسليحات دەپۋتاتتارى، قوعامدىق كەڭەس مۇشەلەرى، مەملەكەتتىك ورگانداردىڭ باسشىلارى ەندى. كەڭەستى قالا اكىمى ەربولات دوسايەۆ باسقارادى، ءتوراعانىڭ ورىنباسارى - قالا اكىمىنىڭ ينكليۋزيا ماسەلەلەرى جونىندەگى شتاتتان تىس كەڭەسشىسى قاسيەت وماروۆا.
وتىرىس بارىسىندا قالانىڭ الەۋمەتتىك-ەكونوميكالىق سالاسىنا ينكليۋزيۆتى قاعيداتتاردى ەنگىزۋ ماسەلەلەرى تالقىلاندى.
«بۇگىندە الماتىدا ەرەكشە قاجەتتىلىكتەرى بار 58 مىڭنان استام ادام تۇرادى، ونىڭ 9 مىڭى — ءبىزدىڭ بالالارىمىز. ءاربىر ازاماتتىڭ ەركىن دامۋعا، وقۋعا، جۇمىس ىستەۋگە جانە سۇيىكتى قالامىزدىڭ دامۋىنا ءوز ەلەۋلى ۇلەسىن قوسۋعا مۇمكىندىگى بولا وتىرىپ، ءوزىن قوعامنىڭ تولىققاندى مۇشەسى رەتىندە سەزىنۋى ماڭىزدى»، - دەدى ەربولات دوسايەۆ وتىرىسقا قاتىسۋشىلارعا ارناعان سوزىندە.
سونداي-اق، قالا اكىمى ينكليۋزيۆتى قالانىڭ قولجەتىمدى جانە ساپالى الەۋمەتتىك ينفراقۇرىلىمى بار تەڭ مۇمكىندىكتەر قاعيداتتارىن ەنگىزۋ الماتى اكىمدىگى جۇمىسىنىڭ باستى مىندەتى بولىپ تابىلاتىنىن اتاپ ءوتتى. ءدال وسىنداي ماقسات الماتى قالاسىن دامىتۋدىڭ 2025 جىلعا دەيىنگى باعدارلاماسىندا جانە 2030 جىلعا دەيىنگى ورتا مەرزىمدى پەرسپەكتيۆادا كورىنىس تاپقان.
الماتى اكىمىنىڭ تاپسىرماسى بويىنشا مۇمكىندىگى شەكتەۋلى ازاماتتاردىڭ، ونىڭ ىشىندە ەرەكشە قاجەتتىلىكتەرى بار بالالاردىڭ الدىن الۋ، وڭالتۋ جانە الەۋمەتتەندىرۋ شارالارى ىسكە اسىرىلۋدا. ماسەلەن، مەملەكەتتىك الەۋمەتتىك تاپسىرىس اياسىندا 2023 جىلى ۇەۇ 500-دەن استام بالانى قامتي وتىرىپ، وڭالتۋدىڭ ينتەگراسيالانعان مودەلى بويىنشا «ەرتە ارالاسۋ» پيلوتتىق جوباسىن ىسكە اسىردى. سونىمەن قاتار، تاۋەكەل توبىنداعى بالالار مەن سەرەبرالدى سال اۋرۋى بار بالالار ءتىزىلىمىنىڭ ءبىرىڭعاي بازاسى قۇرىلادى.
قالانىڭ پەريناتولوگيا جانە بالالار كارديوحيرۋرگياسى ورتالىعىنىڭ بازاسىندا 2023 جىلى «ءبىر تەرەزە» قاعيداتى بويىنشا جۇكتىلىكتى قورعاۋ ورتالىعى ۇيىمداستىرىلدى، وندا وتكەن جىلى 1،8 مىڭنان استام جۇكتى ايەلگە كەڭەس بەرىلدى. 2024 جىلى ەلىمىزدە العاش رەت تۋا بىتكەن اقاۋلار مەن حروموسومالىق پاتولوگيالاردى ۋاقتىلى انىقتاۋ ءۇشىن «ءبىر كۇندىك كلينيكا» جوباسى ىسكە اسىرىلدى. بيىل 10 مىڭ جۇكتى ايەلدى قامتۋ جوسپارلانۋدا.
ەرەكشە قاجەتتىلىكتەرى بار بالالاردى قۇرداستارىنىڭ ورتاسىنا قوسۋ ماقساتىندا پسيحولوگيالىق-مەديسينالىق-پەداگوگيكالىق كونسۋلتاسيالاردان ءوتۋ مەرزىمدەرىن قىسقارتۋ جونىندە شارالار قابىلدانۋدا. ماسەلەن، 100 مىڭنان استام بالا تۇراتىن الاتاۋ جانە اۋەزوۆ اۋداندارىندا كونسۋلتاسيالاردىڭ فيليالدارى اشىلدى. الاتاۋ، ناۋرىزباي اۋداندارىنىڭ تۇزەتۋ كابينەتتەرى وقۋشىلاردىڭ يننوۆاسيالىق شىعارماشىلىق ورتالىقتارىنىڭ جاڭا عيماراتتارىنا ورنالاستىرىلدى، پەداگوگ كادرلاردىڭ قۇرامى ۇلعايتىلدى. بۇل تەكسەرۋدەن ءوتۋ مەرزىمىن 30-دان 15 كۇنگە دەيىن قىسقارتۋعا مۇمكىندىك بەردى.
- 2023 جىلدىڭ قازان ايىنان باستاپ ەرەكشە قاجەتتىلىكتەرى بار بالالارعا ارنالعان 15 ۇيىمدا 1400 ورىندىق مەملەكەتتىك ءبىلىم بەرۋ تاپسىرىسى ورنالاستىرىلدى.
- ينكليۋزيا ءۇشىن جاعداي جاساۋ شارالارى اياسىندا وتكەن جىلى 433 ادامعا ارنالعان يننوۆاسيالىق تەحنيكالىق وڭالتۋ قۇرالدارى قوسىمشا ساتىپ الىندى. جالپى، وتكەن جىلى تەحنيكالىق وڭالتۋ قۇرالدارىمەن قامتۋ 90% -دى قۇرادى. بيىلعى جىلى 95% قامتۋدى قامتاماسىز ەتۋ جوسپارلانۋدا، بۇل رەتتە جەرگىلىكتى بيۋدجەت ەسەبىنەن يننوۆاسيالىق قاراجاتتى قوسىمشا ساتىپ الۋ باعدارلاماسى دا جالعاستىرىلاتىن بولادى.
- قالا اكىمىنىڭ تاپسىرماسى بويىنشا «ياندەكس.تاكسي». ارنايى كولىك سانى 64-تەن 100 بىرلىككە دەيىن ۇلعايتىلدى، قىزمەتتى 2 مىڭنان استام ادام پايدالانادى، ونىڭ 800 – ءى بالالار.
- كەدەرگىسىز ورتا قۇرۋ جانە مۇمكىندىگى شەكتەۋلى جانداردىڭ موبيلدىلىگىن ارتتىرۋ ماقساتىندا وتكەن جىلى الماتىدا العاش رەت 7،5 مىڭ ينفراقۇرىلىم نىساندارىنا پاسپورتتاۋ جۇرگىزىلدى. بيىل تاعى 15 مىڭ نىساندى زەرتتەۋ جوسپارلانۋدا. اعىمداعى جىلى ەرەكشە قاجەتتىلىكتەرى بار قالا تۇرعىندارى ءۇشىن 750 نىساندى بەيىمدەۋ جوسپارلانۋدا.
- ەرەكشە قاجەتتىلىكتەرى بار قالا تۇرعىندارىنىڭ ءوزىن-وزى بەيىمدەۋىن جانە ءومىر ءسۇرۋ ساپاسىن ارتتىرۋ ءۇشىن جالاقىنىڭ كەمىندە 70% -ىن سۋبسيديالاۋ، سونداي-اق جۇمىس بەرۋشىلەردىڭ ارنايى جۇمىس ورىندارىن جابدىقتاۋعا ارنالعان قۇرىلىمداردى ساتىپ الۋعا جانە ورناتۋعا جۇمساعان شىعىندارىن وتەۋ كوزدەلگەن.
وتىرىسقا قاتىسۋشىلار كەڭەستىڭ اعىمداعى جىلعا ارنالعان جۇمىس جوسپارىن تالقىلادى. وعان مەديسينالىق قىزمەتتەردىڭ قولجەتىمدىلىگى؛ ينكليۋزيۆتى ءبىلىم بەرۋ جانە سپورت ماسەلەلەرى كىرەدى. سونىمەن قاتار، كەڭەس مۇشەلەرى قالالىق ينفراقۇرىلىم نىساندارىنىڭ قولجەتىمدىلىگىن زەرتتەۋدى جالعاستىرادى، ينكليۋزيۆتى تۋريزم جانە قوعامدا ينكليۋزيۆتى مادەنيەتتى قالىپتاستىرۋ ماسەلەلەرىن زەرتتەيدى.
«ءبىزدىڭ جۇمىسىمىزدىڭ باستى قاعيداتتارى - ينكليۋزيۆتى قوعامدى قالىپتاستىرۋ يگىلىگى جولىندا بۇل ىسكە كەڭەستىڭ ءاربىر مۇشەسىن كەڭىنەن تارتۋ، كونسترۋكتيۆتىلىك جانە تيىمدىلىك. قالا تۇرعىندارىنىڭ الدىندا دامۋ، وقۋ، جۇمىس ءۇشىن تەڭ جاعداي جاساۋ ءۇشىن مۇمكىندىكتەردى پايدالانۋدا جانە وكىلەتتىكتەردى عانا ەمەس، سونىمەن قاتار جاۋاپكەرشىلىكتى دە كۇشەيتۋگە شاقىرامىن. ءاربىر قالا تۇرعىنىنىڭ الماتىنىڭ وركەندەۋىنە ءوز ۇلەسىن قوسۋى ءۇشىن ءوزىن - ءوزى بەيىمدەۋگە مۇمكىندىگى بولۋى ءتيىس»، - دەپ قورىتىندىلادى ءسوزىن ەربولات دوسايەۆ.