قالا باسشىسى الماتى اۋەجايىندا قىزمەت كورسەتۋ ساپاسىنا قاتىستى ءبىرقاتار ماسەلەنى ينۆەستورعا ايتتى
الماتى اكىمى ەربولات دوسايەۆ پەن TAV Airports Holding كومپانياسىنىڭ پرەزيدەنتى سەركان كاپتان الماتى حالىقارالىق اۋەجايىنىڭ جاڭا جولاۋشىلار تەرمينالىنىڭ قۇرىلىس بارىسىن تالقىلادى، دەپ حابارلايدى Almaty-akshamy.kz Almaty.tv. -كە سىلتەمە جاساپ.
س. كاپتان اتاپ وتكەندەي، ءقازىر نەگىزگى قۇرىلىس-مونتاج جۇمىستارى 65%-عا ءبىتتى. قۇرىلىس قارقىنى جەدەلدەپ وتىر. قولدانىستاعى تەرمينالدىڭ ەستاكاداسى بيىل 1 قىركۇيەككە دەيىن اشىلادى. نىساندى پايدالانۋعا بەرۋ بەلگىلەنگەن مەرزىمنەن بۇرىن – 2024 جىلى جاز ايىنىڭ باسىنا جوسپارلانىپ وتىر.
قالا باسشىسى الماتى اۋەجايىندا قىزمەت كورسەتۋ ساپاسىنا قاتىستى ءبىرقاتار ماسەلەنى ينۆەستورعا ايتتى. الماتىلىقتار مەن قالا قوناقتارى بىرنەشە ساعاتتىق كەزەكتى، جۇكتى ۇزاق كۇتۋدى، كولىك تۇراعىنىڭ جەتىسپەۋشىلىگىن جانە ءتيىستى شارا قابىلداۋدى تالاپ ەتەتىن وزگە دە ىڭعايسىز جاعدايعا تاپ بولىپ وتىر.
س. كاپتاننىڭ ايتۋىنشا، جازعى كانيكۋل مەن دەمالىس كەزىندە رەيستەردىڭ كوبەيۋىنە بايلانىستى قوسىمشا كەزەك پەن كەپتەلىس بايقالۋى مۇمكىن. اۋەجاي اكىمشىلىگى قىزمەت كورسەتۋ ساپاسىن جاقسارتۋ بويىنشا شارالار قابىلداپ وتىر – جۇك جەلىلەرى جاڭارتىلدى، جاڭا كونديسيا جۇيەلەرى ورناتىلدى، جايلى اۆتوبۋستار ساتىپ الىندى. جاڭا حالىقارالىق جولاۋشىلار تەرمينالىنىڭ اۋدانى 53،500 م2. ول پايدالانۋعا بەرىلگەن سوڭ الماتى اۋەجايىنىڭ وتكىزۋ قابىلەتى جىلىنا 14 ملن ادامعا دەيىن ارتادى، بۇل اۋە ايلاعىنىڭ جۇمىسىن رەتكە كەلتىرۋگە مۇمكىندىك بەرەدى. ايتا كەتەيىك، بىلتىر الماتى حالىقارالىق اۋەجايى جىلىنا 2،7 ملن ادامعا ەسەپتەلگەن وتكىزۋ قابىلەتى كەزىندە 7،2 ملن جولاۋشىنى قابىلدادى. بيىل جولاۋشىلار سانى 9 ملن ادامعا دەيىن وسەدى دەپ بولجانۋدا.
جاڭا جولاۋشىلار تەرمينالى اشىلعان كەزدە اۋەجاي اكىمشىلىگى ەسكىسىن جاڭارتۋدى كوزدەپ وتىر. وسىلايشا، جاڭا جولاۋشىلار تەرمينالى تەك حالىقارالىق رەيستەرگە، ال قولدانىستاعى تەرمينال ىشكى رەيستەرگە قىزمەت كورسەتەدى.
الماتى حالىقارالىق اۋەجايىن كەڭەيتۋ جونىندەگى اۋقىمدى جوبا جولاۋشىلار تەرمينالى مەن جالپى ماقساتتاعى اۆياسيانىڭ جاڭا عيماراتتارىن سالۋدى، سونىمەن قاتار ەستاكادانى، ۇشۋ-قونۋ جولاعىن جانە ۆوكزال ماڭى اۋماعىن قايتا جاڭارتۋدى قامتيدى.
كەڭەس قورىتىندىسى بويىنشا تاراپتار كورسەتىلەتىن قىزمەتتەردىڭ ساپاسىن جاقسارتۋعا باعىتتالعان بىرلەسكەن جول كارتاسىن ىسكە اسىرۋ تۋرالى ۋاعدالاستى. ەربولات دوسايەۆ قۇرىلىس جۇمىستارىنىڭ اياقتالۋىن جەدەلدەتۋ قاجەتتىگىن اتاپ، نىساننىڭ ستراتەگيالىق ماڭىزىنا بايلانىستى الماتى اكىمدىگى تاراپىنان جان-جاقتى قولداۋ كورسەتۋگە دايىن ەكەنىن ءبىلدىردى. ايتا كەتەيىك، بۇعان دەيىن الماتى حالىقارالىق اۋەجايىنىڭ جاڭا جولاۋشىلار تەرمينالى عيماراتىنىڭ اشۋ 2024 جىلدىڭ تامىزىنا جوسپارلانعان بولاتىن. بۇعان قوسا، سەركان كاپتان جاقىندا قۇرىلىس نىساندارى بويىنشا باسپا ءسوز تۋرىنىڭ وتەتىنىن حابارلادى، كەز كەلگەن نيەت ءبىلدىرۋشى الماتى حالىقارالىق اۋەجايىن كەڭەيتۋ جانە دامىتۋ جونىندەگى جوبانىڭ ىسكە اسىرىلۋ بارىسىمەن تانىسا الادى.