قازاقستاننىڭ دەنساۋلىق ساقتاۋ مينيسترلىگى 2021 جىلعى 15 اقپانداعى "ەمدەلۋ ءۇشىن ءبىرجولعى زەينەتاقى تولەمدەرىن پايدالانۋ قاعيدالارىن بەكىتۋ تۋرالى" بۇيرىعىنا وزگەرىستەر ەنگىزىپ جاتىر. وزگەرىستەر زەينەتاقى جيناقتارىن ءتىس ەمدەۋگە پايدالانۋعا تىيىم سالۋدى كوزدەيدى، - دەپ حابارلايدى اqshamnews.kz ءتىلشىسى.
دەنساۋلىق ساقتاۋ مينيسترلىگى مۇنداي شەشىم زەينەتاقى جيناقتارىن ستوماتولوگيالىق قىزمەتتەر ارقىلى زاڭسىز شىعارۋ دەرەكتەرىنىڭ كوپتىگىنە بايلانىستى قابىلدانعانىن ءتۇسىندىردى.
"جوبادا ءتىس پروتەزدەۋ جانە يمپلانتاسيا سياقتى ستوماتولوگيالىق قىزمەتتەرگە ءبىرجولعى زەينەتاقى تولەمدەرىن پايدالانۋ نورماسىن الىپ تاستاۋ كوزدەلگەن. شەشىم مەديسينالىق قۇجاتتاردى قولدان جاساۋ جانە زەينەتاقى جيناقتارىن ماقساتسىز پايدالانۋ جاعدايىنىڭ كوپتەپ كەزدەسۋىنە بايلانىستى قابىلداندى"، – دەلىنگەن قۇجات جوباسىندا.
تالداۋ ناتيجەلەرى بويىنشا، ازاماتتاردىڭ ستوماتولوگيالىق قىزمەتتەردى تولەۋگە بەرگەن وتىنىمدەرى الاياقتىق سحەمالار ارقىلى ءبىرقاتار كلينيكالاردىڭ پايداسىنا شىعارىلعان. وسىعان بايلانىستى 15 قىركۇيەكتەن باستاپ زەينەتاقى قاراجاتى ەسەبىنەن مەديسينالىق كومەكتىڭ بۇل ءتۇرىن قارجىلاندىرۋعا ءوتىنىم قابىلداۋ توقتاتىلدى.
"وتباسى بانك اقپاراتى بويىنشا، 2021 جىلدان 2025 جىلعى 20 تامىزعا دەيىن enpf-otbasy.kz پلاتفورماسى ارقىلى تەك "ستوماتولوگيالىق قىزمەتتەر" ماقساتى بويىنشا 757 ميلليارد تەڭگەگە 795 424 ترانزاكسيا جۇرگىزىلگەن. تالداۋ ناتيجەسى بويىنشا، 222 ميلليارد تەڭگەدەن استام قارجى توپ-20 ستوماتولوگيالىق كلينيكاعا باعىتتالعان. بۇل كلينيكالاردىڭ باسىم بولىگى قازاقستاننىڭ ءىرى قالالارىندا ورنالاسقان"، – دەپ حابارلادى ۆەدومستۆو.
ءمان-جايى
بۇعان دەيىن دەنساۋلىق ساقتاۋ مينيسترلىگى "اشىق نقا" پورتالىندا ستوماتولوگيالىق قىزمەتتەردىڭ اقىسىن تولەۋ ءۇشىن ءبىرجولعى زەينەتاقى تولەمدەرىن پايدالانۋ نورماسىن تولىقتاي الىپ تاستاۋ ۇسىنىلعان بۇيرىق جوباسىن جاريالاعان بولاتىن. قۇجات قوعامدىق تالقىلاۋعا شىعارىلدى.
اراعا كۇن سالىپ، وتباسى بانك ستوماتولوگيالىق قىزمەتتەرگە ءوتىنىم قابىلداۋدى ۋاقىتشا توقتاتقانىن حابارلادى. بانكتە بۇل شەشىمدى قاراجاتتى ماقساتسىز پايدالانۋ دەرەكتەرىنىڭ كوپتىگى جانە قۇجاتتاردىڭ قولدان جاسالۋىمەن ءتۇسىندىردى.