قارجى مينيسترلىگى ەلدەگى اۋدارىمدارعا باقىلاۋدى كۇشەيتتى

قازاقستاندىق بانكتەر ەندى ازاماتتاردىڭ شوتتارى مەن ونداعى قاراجات قالدىقتارى تۋرالى دەرەكتەردى سالىق ورگاندارىنا بەرەدى. بۇل رەتتەۋدى قاراستىراتىن بۇيرىق جوباسىن قارجى مينيسترلىگى جاريالادى، - دەپ حابارلايدى اqshamnews.kz ءتىلشىسى.

قۇجاتتا جاڭا ەسەپ بەرۋ فورماسى 2026 جىلعى 1 قاڭتاردان باستاپ كۇشىنە ەنەتىن جاڭا سالىق كودەكسى اياسىندا ەنگىزىلگەنى جازىلعان. بۇيرىق جوباسى بيىلعى 29 قىركۇيەككە دەيىن قوعامدىق تالقىلاۋدا بولادى.

بارلىق بانك سالىق ورگانىنىڭ سۇراۋى بويىنشا 10 جۇمىس كۇنى ىشىندە مىناداي مالىمەتتەردى ۇسىنۋعا مىندەتتى:

• ازاماتتىڭ بانك شوتى بار-جوعى؛

• ول شوتتاردىڭ نومىرلەرى؛

• شوتتاعى قالدىق پەن قاراجات قوزعالىسى.

"بۇل تەك مۇلىك پەن مىندەتتەمەلەر تۋرالى دەكلاراسيا تاپسىرۋعا مىندەتتى جەكە تۇلعالارعا قاتىستى. بانكتەر ءۇشىن مۇنداي مىندەتتەمە 2018 جىلدان بەرى بار. بۇل جاڭا تالاپ ەمەس"، – دەپ ءتۇسىندىردى مينيسترلىك Tengrinews.kz رەداكسياسىنىڭ رەسمي ساۋالىنا جاۋاپ بەرىپ.

2025 جىلعى شىلدەدەن نە وزگەردى؟

سالىق كودەكسىنە جاڭا تارماقتار (13-1 جانە 13-2) قوسىلدى. ەندى بانكتەر:

• ەسەپشوتتار، ولاردىڭ نومىرلەرى جانە قالدىقتارى تۋرالى دەرەكتەردى تەك مۇلىك پەن مىندەتتەمەلەر دەكلاراسياسىن تاپسىراتىندارعا عانا ەمەس، سونداي-اق كىرىستەر مەن مۇلىك تۋرالى دەكلاراسيا تاپسىراتىندارعا دا بەرۋ؛

• قاراجات قوزعالىسى تۋرالى دەرەكتەردى تەك ءبىر جاعدايدا ۇسىنۋ: ەگەر ازامات جىل ىشىندە قۇنى 20 000 اەك-تەن اساتىن (2025 جىلى – 78،6 ملن تەڭگە) مۇلىك ساتىپ الىپ، وسىعان بايلانىستى كىرىس تۋرالى دەكلاراسيا تاپسىرۋعا مىندەتتەلسە.

وسىلايشا، بۇرىن بانكتەر تەك مۇلىك پەن مىندەتتەمەلەر دەكلاراسياسىن تاپسىراتىندار بويىنشا دەرەك بەرسە، ەندى باقىلاۋ اۋقىمى كەڭەيدى:

• ەسەپشوتتار مەن قالدىقتار تۋرالى مالىمەت كىرىس پەن مۇلىك دەكلاراسياسىن تاپسىراتىندار بويىنشا دا بەرىلەدى؛

• ال قاراجات قوزعالىسى تۋرالى دەرەك قىمبات مۇلىك ساتىپ العان جاعدايدا عانا ۇسىنىلادى.

بۇل نە ءۇشىن قاجەت؟

قارجى مينيسترلىگىنىڭ مالىمەتىنشە، بۇل جاڭاشىلدىقتىڭ ماقساتى – جاپپاي دەكلاراسيالاۋ اياسىندا ازاماتتاردىڭ كىرىستەرى مەن مۇلكىنە باقىلاۋدى كۇشەيتۋ. سالىق ورگاندارى ءىرى مامىلەلەردى قاشىقتان قاداعالاپ، ولاردى تاپسىرىلعان دەكلاراسيالارمەن سالىستىرا الادى. بۇل ءادىس ءادىل سالىق سالۋعا، بيۋدجەت ءتۇسىمىن ارتتىرۋعا جانە كولەڭكەلى ەكونوميكانى ازايتۋعا باعىتتالعان.