ەندى حقو-دان قۇجاتتاردى ۇيگە جەدەل جەتكىزۋ ارقىلى الۋعا بولادى

مەملەكەتتىك قىزمەتتەردىڭ 150 ءتۇرى بويىنشا قۇجاتتاردى الا الاسىز

حقو-دان دايىن قۇجاتتاردى الۋعا ەندى ۇيدەن تاپسىرىس بەرۋگە بولادى، ولاردى ياندەكس دوستاۆكا كۋرەرلەرى اكەپ بەرەدى، دەپ حابارلايدى Almaty-akshamy.kz.

جەتكىزۋ ۋاقىتى ورتا ەسەپپەن ءبىر ساعاتتى قۇرايدى. وسىلايشا ءسىز تانىمال مەملەكەتتىك قىزمەتتەردىڭ 150 ءتۇرى بويىنشا قۇجاتتاردى الا الاسىز. قىزمەت قازاقستاننىڭ 17 قالاسىندا قولجەتىمدى.

پايدالانۋشىنىڭ سمارتفونىنا 1414 نومىرىنەن قۇجاتتاردىڭ دايىن بولعانى تۋرالى، سونداي-اق express.gov4c.kz پورتالىندا دايىن قۇجاتتاردى جەتكىزۋدى رەسىمدەۋگە ۇسىنىس بىلدىرەتىن SMS-حابارلاما جولدانادى. بۇدان ءارى فورمانى تولتىرىپ، جەتكىزۋ مەكەن-جايى مەن تەلەفونىن كورسەتىپ، جەتكىزىلىم اقىسىن تولەۋ كەرەك.

كۋرەر بىردەن تاعايىندالادى، ال جەتكىزۋدىڭ ناقتى ۋاقىتى تاپسىرىس بەرىلگەن كەزدە بەلگىلى ءبىر ايماقتاعى كۋرەرلىك قىزمەتتەرگە سۇرانىستىڭ بولۋىمەن، مەجەلى جەرگە دەيىنگى قاشىقتىققا جانە جولداعى جاعدايعا بايلانىستى انىقتالادى. ورتاشا العاندا، ول ءبىر ساعاتتى قۇرايدى. جەتكىزۋ مارتەبەسىن ياندەكس Go قوسىمشاسىندا، ەگەر ول پايدالانۋشىدا ورناتىلعان بولسا، نەمەسە SMS-حابارلامادا كورسەتىلگەن سىلتەمە بويىنشا كارتا ۆيدجەتى ارقىلى باقىلاۋعا بولادى.

حقو-دان قۇجاتتاردى جەتكىزۋ ازاماتتاردى ورتالىققا قايتا بارۋدان بوساتادى، سونىمەن بىرگە ۋاقىتتى ۇنەمدەيدى. بۇل جۇمىس ىستەيتىن ادامدارعا، قالدىرىپ كەتۋگە بولمايتىن كىشكەنتاي بالالارى نەمەسە باسقا تۋىستارى بار ازاماتتارعا قولايلى بولۋى مۇمكىن.