قاتەرلى ىسىككە شالدىققاندار شەتەل اسپاي-اق، قۇرىلعى كومەگىنە جۇگىنە الادى
بۇگىن قازاق ونكولوگيا جانە راديولوگيا عىلىمي-زەرتتەۋ ينستيتۋتىندا اشىلعان بىرەگەي توموتەراپيا ورتالىعى الەمنىڭ نەبارى 8 ەلىندە عانا قولجەتىمدى. قاتەرلى ىسىك اۋرۋىن ەمدەۋدە ساۋلەلىك تەراپيا جۇرگىزەتىن قۇرىلعىنىڭ ارقاسىندا دەرتىنە داۋا ىزدەگەن ناۋقاستار ەندى ەلىمىزدە دە ەمدەلە الادى. مۇندا كۇنىنە 100 ادام، جىلىنا 12 مىڭعا دەيىن ادام قابىلداۋ مۇمكىندىگى بار. ايتا كەتەيىك، بارلىق شىعىندى مىندەتتى الەۋمەتتىك ساقتاندىرۋ قورى وتەيدى. جوبا ينۆەستورى – تۇركيالىق كومپانيا، دەپ حابارلايدى Almaty-akshamy.kz.
«بۇل قۇرىلعىنىڭ مۇمكىندىكتەرى وتە كوپ. توموتەراپيا، گاممو، كيبەر پىشاق فۋنكسياcى قاراستىرىلعان. ءبىزدىڭ ماماندار 1 اي بويى ارنايى وقىتۋ كۋرستارىنان ءوتىپ، ناۋقاستاردى قابىلداۋعا دايىندالادى. وتاندىق مەديسينا سالاسى ءۇشىن بۇل ۇلكەن جەتىستىك دەپ سانايمىن»،– دەدى قازاق ونكولوگيا جانە راديولوگيا عزي باسقارما ءتورايىمى ديليارا قايداروۆا.
ەلىمىزدىڭ سىرتقى ىستەر مينيسترلىگى، قازاقستاننىڭ تۇركياداعى ەلشىلىگى وكىلدەرى، شەتەلدىك ينۆەستورلاردان قۇرالعان دەلەگاسيا كەلەسى كەزەكتە يندۋستريالدى ايماقتان بوي كوتەرەتىن جاڭا زاۋىتتىڭ ىرگەتاسىن قالادى. سەندۆيچ-پانەلدەر ءوندىرۋ زاۋىتى جىلىنا 1 ميلليون شارشى مەترگە دەيىن ءونىم شىعارۋعا نيەتتى. جوبا قۇنى – 3،7 ميلليارد تەڭگە، مۇندا 100-گە جۋىق جۇمىس ورنى اشىلادى دەپ كۇتىلۋدە.
يندۋستريالدى ايماقتا نەگىزى قالانعان مەتالل قورشاۋلار شىعاراتىن زاۋىت 2023 جىلى پايدالانۋعا بەرىلىپ، 25 جاڭا جۇمىس ورنىمەن قامتاماسىز ەتپەك. كاسىپورىن جىلىنا 12 مىڭ توننا جول قورشاۋلارىن جانە 15 مىڭ توننا ىستىق مىرىشتاۋ بۇيىمدارىن وندىرۋگە قاۋقارلى.
ايتا كەتۋ كەرەك، بۇگىندە قازاقستاندا تۇركيادان كەلگەن ينۆەستورلاردىڭ قاتىسۋىمەن 50-دەن استام ينۆەستيسيالىق جوبا ءساتتى جۇزەگە اسىرىلعان.