تاۋەلسىزدىككە تارتۋ
ماڭعىستاۋلىق ۆەلوشاباندوز تاۋەلسىزدىكتىڭ 30 جىلدىعىنا وراي 1750 شاقىرىمدى ءجۇرىپ ءوتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بەينەۋ اۋدانىنىڭ مەسەناتى، جەكە كاسىپكەر ءراببىم بوراشيەۆ «بەينەۋ-شالقار-تورعاي-نۇر-سۇلتان» باعىتىندا ۆەلوساياحاتقا شىققان ساپارىن ءساتتى اياقتادى.
ۆەلوشاباندوزدىڭ قۇرمەتىنە اۋىل جاستارىمەن كەزدەسۋ ۇيىمداستىرىلدى. جيىن بارىسىندا جيھانكەز ساپار كەزىندە ارالاعان جەرلەرى مەن قىزىقتى وقيعالاردى ايتىپ، سۇحبات بەردى.
«باستى ماقسات – ىشكى ءتۋريزمدى دامىتۋ. مەن ساياحات كەزىندە «بەينەۋ-شالقار-تورعاي-نۇر-سۇلتان» باعىتىندا ءجۇرىپ ءوتتىم. ءار ءوڭىر ەرەكشە قارسى الدى. ءار جەردىڭ وزىندىك ەرەكشەلىگى بار. وتە قاتتى ۇنادى. وسى ورايدا جاستاردى بوس ۋاقىتتى ءتيىمدى جۇمساپ، سپورتپەن شۇعىلدانۋعا شاقىرامىن»، - دەدى ءراببىم بوراشيەۆ.
ءراببىم بوراشيەۆ ەندى ەلىمىزدىڭ شىعىسىنا ساياحاتتاۋدى جوسپارلاپ وتىر. سونداي-اق ۆەلوساياحات جايىندا كىتاپ جازۋعا نيەتتى. اۋدان اكىمىنىڭ ورىنباسارى راقىمجان شالابايەۆ «بەينەۋ اۋدانىنىڭ ءبىرىنشى ۆەلوشاباندوزى» دەگەن جازۋى بار سپورتتىق كيىم مەن جاڭا ۆەلوسيپەدتى سىيعا تارتتى.