سپورت عىلىمى مەن سپورتتىق مەديسيناعا باسا كوڭىل ءبولۋ ماڭىزدى.
الماتىداعى قازاق ۇلتتىق اگرارلىق زەرتتەۋ ۋنيۆەرسيتەتىندە 5ء-شى دۇنيەجۇزىلىك كوشپەندىلەر ويىندارىنا دايىندىق اياسىندا «قر-دا ات سپورتى مەن ۇلتتىق جىلقى شارۋاشىلىعىنىڭ قازىرگى جاعدايى مەن دامۋ پەرسپەكتيۆالارى» اتتى دوڭگەلەك ۇستەل ءوتتى، دەپ حابارلايدى Almaty-akshamy.kz
دوڭگەلەك ۇستەلگە ۇلتتىق عىلىم اكادەمياسىنىڭ پرەزيدەنتى، قازاق ۇلتتىق اگرارلىق زەرتتەۋ ۋنيۆەرسيتەتىنىڭ رەكتورى اقىلبەك كۇرىشبايەۆ، ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ، ءماجىلىس دەپۋتاتى امانجول ءالتاي، سونداي-اق تۋريزم جانە سپورت مينيسترلىگىنىڭ، اۋىل شارۋاشىلىعى مينيسترلىگىنىڭ، عىلىمي قوعامداستىقتىڭ، سپورت كلۋبتارىنىڭ، ۇلتتىق سپورت قاۋىمداستىعىنىڭ وكىلدەرى جانە ونىڭ قۇرامىنا كىرەتىن فەدەراسيالاردىڭ باسشىلارى مەن اتبەگىلەر قاتىستى.
ءىس-شارا بارىسىندا قازاقستاندا سپورتتىق جىلقى شارۋاشىلىعىن دامىتۋ، ات سپورتى مەن ۇلتتىق سپورت تۇرلەرىنەن ماماندار دايارلاۋ ماسەلەلەرى تالقىلاندى.
ۇلتتىق سپورت قاۋىمداستىعىنىڭ باسشىسى يسلامبەك سالجانوۆ ۇلتتىق سپورت سالاسىن رەتتەۋ ماسەلەلەرىنە جەكە توقتالىپ، قازاقستاندا وسىعان دەيىن بۇل سالانى رەتتەيتىن بىردە-بىر زاڭ قابىلدانباعانىن اتاپ ءوتتى.
«ۇلتتىق سپورت قاۋىمداستىعى پارلامەنت ءماجىلىسىنىڭ دەپۋتاتتارىمەن بىرگە ۇلتتىق سپورت تۋرالى زاڭ جوباسىن ازىرلەۋ باستاماسىن كوتەرىپ وتىر. ونىڭ اياسىندا قازاقستاندا ەتنوسپورتتى دامىتۋ ءۇشىن جۇيەلى قولداۋ شارالارى كوزدەلەدى»، – دەدى يسلامبەك سالجانوۆ.
ءقازىر مەملەكەت باسشىسىنىڭ تاپسىرماسى بويىنشا قاۋىمداستىق قازاقستان رەسپۋبليكاسىندا ۇلتتىق سپورتتى دامىتۋدىڭ 2024-2029 جىلدارعا ارنالعان تۇجىرىمداماسىنىڭ جوباسىن ازىرلەپ جاتىر. وندا ۇلتتىق سپورت تۇرلەرىن دامىتۋ ماسەلەلەرى جانە ولاردى شەشۋ جولدارى كورسەتىلىپ، ءىس-قيمىل جوسپارى مەن نىسانالى ينديكاتورلارى ۇسىنىلادى.