ەندى دەكلاراسيانى ءموبيلدى قوسىمشا ارقىلى تاپسىرۋعا بولادى

بيىل 1 قاڭتاردان باستاپ جالپىعا بىردەي دەكلاراسيالاۋدىڭ ءۇشىنشى كەزەڭى باستالدى.

قارجى مينيسترلىگىنىڭ مەملەكەتتىك كىرىستەر كوميتەتى تاراتقان اقپارات بويىنشا، جالپىعا بىردەي دەكلاراسيانى ەندى Kaspi.kz ءموبيلدى قوسىمشاسىندا تاپسىرۋعا بولادى، دەپ حابارلايدى Almaty-akshamy.kz

ءساۋىر ايىندا قولدانىستاعى ەلەكتروندى سەرۆيستەرمەن قاتار Kaspi.kz ءموبيلدى قوسىمشاسىندا جاڭا ىڭعايلى سەرۆيس ىسكە قوسىلدى. وندا جەكە تۇلعالار 250.00 فورمالى اكتيۆتەر مەن مىندەتتەمەلەر تۋرالى دەكلاراسيانى تاپسىرا الادى.

ەستەرىڭىزگە سالا كەتەيىك، 2024 جىلعى 1 قاڭتاردان باستاپ جالپىعا بىردەي دەكلاراسيالاۋدىڭ ءۇشىنشى كەزەڭى باستالدى. بيىل جەكە كاسىپكەرلەر، زاڭدى تۇلعالاردىڭ باسشىلارى، قۇرىلتايشىلار (قاتىسۋشىلار)، سونداي-اق ولاردىڭ جۇبايلارى "كىرۋ" دەكلاراسياسىن (250.00 فورما) ۇسىنۋعا مىندەتتى.

2025 جىلعى 1 قاڭتاردان باستاپ وسى دەكلاراسيانى حالىقتىڭ قالعان ساناتتارى ۇسىنۋعا مىندەتتى.

حالىققا ىڭعايلى بولۋ ءۇشىن سالىق تولەۋشىنىڭ كابينەتى، (cabinet.salyk.kz)، "ەلەكتروندى ۇكىمەت" پورتالى (egov.kz)، "ە-Salyq Azamat" ءموبيلدى قوسىمشاسى، Halyk، bcc.kz جانە Kaspi.kz بانكتەردىڭ ءموبيلدى قوسىمشالارى ارقىلى دەكلاراسيانى تاپسىرۋعا ارنالعان ەلەكتروندى سەرۆيستەر ىسكە قوسىلدى.

Kaspi.kz ءموبيلدى قوسىمشاسىندا 250.00 فورمالى دەكلاراسيانى تاپسىرۋ تۋرالى تولىعىراق "گيد" بولىمىنەن وقىساڭىز بولادى.

دەكلاراسيالاردى تاپسىرۋ مەرزىمى – 2024 جىلعى 15 قىركۇيەككە دەيىن.