يگى ءىس!
قازاقستاندا 1 ترلن تەڭگە سومانىڭ نەسيەسى «قاراپايىم زاتتار ەكونوميكاسى» باعدارلاماسى اياسىندا بەرىلىپ، 3،5 مىڭداي جوبا قولداۋ تاپقان، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
ناتيجەسىندە 70 مىڭ جۇمىس ورنى قۇرىلىپ، 3،5 ترلن تەڭگەنىڭ ءونىمى ءوندىرىلىپ، قىزمەتى كورسەتىلدى. قارجىلاي قولداۋ كورسەتىلگەن جوبالاردىڭ اراسىندا قايتا وڭدەۋ، دەنساۋلىق ساقتاۋ، الەۋمەتتىك قىزمەت، ءبىلىم بەرۋ سالالارى باسىم.
مەملەكەت باسشىسى قاسىم-جومارت توقايەۆ بيىلعى جولداۋىندا «قاراپايىم زاتتار ەكونوميكاسى» باعدارلاماسىن 2022 جىلدىڭ سوڭىنا دەيىن ۇزارتۋدى تاپسىرعان ەدى.
وسى رەتتە ۇلتتىق بانك ەكىنشى دەڭگەيلى بانكتەر مەن اگرارلىق نەسيە كورپوراسياسىنىڭ وبليگاسيالارىن ساتىپ الماق.
«ۇلتتىق بانك تاراپىنان بولىنگەن قاراجات 2022 جىلى يمپورتتى الماستىرۋعا جانە جاڭا وندىرىستەردى قۇرۋعا باعدارلانعان كاسىپكەرلەردى جەڭىلدەتىلگەن نەسيەمەن قامتاماسىز ەتۋگە مۇمكىندىك بەرىلىپ وتىر»، - دەدى ق ر ۇلتتىق بانكى دەپارتامەنتى ديرەكتورىنىڭ ورىنباسارى احمەتالي ەرجان.