ۇلتتىق قۇندىلىق - باستى بايلىق!
ەلىمىزدەگى Jas Nomad جوباسى ۇلتتىق قۇندىلىقتاردى جاڭعىرتادى، دەپ حابارلايدى Almaty-akshamy.kz.
قازىنالى قازاق حالقىنىڭ ۇلتتىق قۇندىلىقتارى مەن مادەنيەتىن دارىپتەۋ. وسىنىڭ قامىندا ەل استاناسىندا «Jas Nomad» جوباسى جۇزەگە اسىرىلۋدا. ءىس-شارالار كەشەنى 4 باعىتتى قامتيدى.
ونىڭ العاشقىسى – ونلاين ساباقتار. مال ەتىن بولشەكتەۋ، اتاۋلارى، قوناق كادەلەرى، ۇلتتىق تاعامدار، كيىمدەر مەن كونە ويىندار جانە ءتول اسپاپتارىمىز جايىندا سىر شەرتەتىن بەينەساباقتار الەۋمەتتىك جەلىلەردە جۇكتەلەدى. كەلەسى كەزەڭ ۇمىت بولىپ بارا جاتقان اتا كاسىپتەردى جاڭعىرتۋعا باعىتتالعان.
وفلاين فورماتتا قولونەر، قىش ىدىستار مەن اسپاپتار جاساۋ جانە تىگۋ ونەرى كيىز ءۇي قۇراستىرۋ بويىنشا شەبەرلىك سىنىپتارى ۇيىمداستىرىلادى. بۇدان بولەك مادەنيەتىمىز، تامىرى تەرەڭ تارتقان سالت-داستۇرلەرىمىز جايىندا تۇسىرىلگەن بەينە روليكتەر بايقاۋى جاريالانادى. سوڭعى كەزەڭدە ۇلتتىق قۇندىلىقتارعا دەگەن جاستاردىڭ كوزقاراسىن انىقتاۋ ماقساتىندا قازاق جانە ورىس تىلدەرىندە الەۋمەتتىك جەلىلەر ارقىلى ساۋالنامالار جۇرگىزۋ كوزدەلگەن.
تاۋەلسىزدىكتىڭ 30 جىلدىعىنا وراي قولعا الىنعان تانىمدىق باستاما جىل سوڭىنا دەيىن جالعاسادى.