قازاقستاندا قابىلدانعان جاڭا زاڭ بويىنشا، لەگيونەرلەرگە مەملەكەتتەن جانە كۆازيمەملەكەتتىك سەكتوردىڭ بيۋدجەتى ەسەبىنەن قارجى بولۋگە تىيىم سالىندى. بۇل نورما ەلدەگى سپورت سالاسىن ءتيىمدى باسقارۋ جانە رەسۋرستاردى دۇرىس ءبولۋ ماقساتىندا ەنگىزىلدى، دەپ حابارلايدى aqshamnews.kz
جاڭا زاڭدا بيۋدجەت قاراجاتى ەندى تەك جوعارى جەتىستىكتەر سپورتى، باسىم سپورت تۇرلەرىن دامىتۋ، مەملەكەتتىك ۇيىمداردىڭ جۇمىسى، بۇقارالىق سپورت جانە سپورتتىق ينفراقۇرىلىم سياقتى ماڭىزدى سالالارعا باعىتتالاتىن بولادى. بۇل شارالار ەلىمىزدەگى سپورتتىڭ دامۋ دەڭگەيىن ارتتىرۋعا، اسىرەسە جاستار اراسىندا بۇقارالىق سپورتتى دامىتۋعا جانە ۇلتتىق سپورتشىلاردىڭ كاسىبي دەڭگەيىن كوتەرۋگە مۇمكىندىك بەرەدى.
ايتۋ كەرەك، قازاقستاندا لەگيونەرلەردىڭ سانى ارتىپ، ولاردىڭ ەلىمىزدەگى سپورتتىق كلۋبتاردا ويناۋى جيىلەي تۇسكەنىن بايقاۋعا بولادى. الايدا، مەملەكەت تاراپىنان لەگيونەرلەرگە قارجى ءبولۋ ماسەلەسى ءجيى سىنعا ۇشىراپ، بۇل قادامداردىڭ ەكونوميكالىق تيىمدىلىگى كۇمان تۋدىردى. وسىعان بايلانىستى، جاڭا زاڭ ارقىلى بيۋدجەت قاراجاتىن تەك قانا ۇلتتىق سپورتشىلار مەن ىشكى سپورتتىق ينفراقۇرىلىمعا باعىتتاۋ شەشىمى قابىلداندى.
بيۋدجەت قاراجاتىنىڭ باعىتتالاتىن سالالارى
- جوعارى جەتىستىكتەر سپورتى: بۇل سالانى دامىتۋ ءۇشىن ۇلتتىق قۇرامالار مەن سپورتشىلارعا قولداۋ كورسەتۋ ماقساتىندا قارجى بولىنەدى.
- باسىم سپورت تۇرلەرى: قازاقستاندا كەڭىنەن تانىمال جانە بولاشاعى زور سپورت تۇرلەرىنە قارجى باعىتتالاتىن بولادى.
- مەملەكەتتىك ۇيىمدار مەن بۇقارالىق سپورت: سپورتتىق ۇيىمدار مەن حالىقتىڭ دەنساۋلىعىن جاقسارتۋ ءۇشىن بۇقارالىق سپورتتى قولداۋ شارالارى جالعاسادى.
- سپورتتىق ينفراقۇرىلىم: سپورت الاڭدارى مەن جاتتىعۋ ورتالىقتارىن دامىتۋ، جاڭا سپورت كەشەندەرىن سالۋ ماسەلەلەرى دە باستى نازاردا بولادى.
جاڭا زاڭنىڭ قابىلدانۋى قازاقستاننىڭ سپورت سالاسىن جاڭا دەڭگەيگە كوتەرۋگە، ۇلتتىق سپورتشىلار مەن جاستار اراسىنداعى دەنە شىنىقتىرۋدى دامىتۋعا مۇمكىندىك بەرەدى. قارجىلاردى تەك ىشكى سپورتتىق قاجەتتىلىكتەرگە باعىتتاۋ ارقىلى ەلىمىزدەگى سپورتتىڭ بولاشاعى جارقىن بولاتىنىنا سەنىم ارتۋعا بولادى.
بۇل وزگەرىس قازاقستاننىڭ سپورتتىق ساياساتىن ءادىل ءارى ءتيىمدى تۇردە باسقارۋعا باعىتتالعان ماڭىزدى قادام بولىپ تابىلادى.